Ang 10-anyos nga Magtutudlo
“Ako mohimo og usa ka himan kaninyo sa akong mga kamot ngadto sa kaluwasan sa daghan nga mga kalag” (Alma 17:11).
Si Chance nagdali-dali ngadto sa balay sa iyang iyaan human sa taas nga biyahe. Siya ug ang iyang mama ug ang manghod nga lalaki naghinam-hinam nga makabisita kaniya. “Kumusta, Tiya Barbie!” Miingon si Chance samtang iyang gigakos ang iyang iyaan. “Aduna ka bay mga krayola ug mga gunting?”
Si Tiya Barbie mipahiyum ug gipahiluna si Chance didto sa lamesa sa kusina dala ang mga gamit.
Sa pagluto ni Tiya Barbie og panihapon, gitan-aw niya ang proyekto ni Chance. “Unsa man nang imong gi-drawing, Chance?” nangutana siya.
“Akong gikoloran ang litrato nga nakuha nako sa Primary,” miingon si Chance. Mainampingon niyang gikoloran og hayag nga mga kolor ang black-and-white nga mga hulagway. “Pagkahuman nato og pangaon, mahimo bang mag-family home evening ta?” hangyo ni Chance. “Aduna akoy leksyon nga gustong itudlo.”
“Maanindot kana,” miingon si Tiya Barbie. “Salamat ha, Chance!”
Pagkahuman sa panihapon si Tiya Barbie midapit sa iyang kauban sa kwarto sa pag-apil kanila alang sa family home evening. Ang kauban niya sa kwarto dili miyembro sa Simbahan, ug kuryuso siya mahitungod sa pagpundok sa pamilya.
Gisugdan ni Chance ang leksyon pinaagi sa pagpangutana, “Diin man kita gikan?” Dayon mipakita siya og usa ka litrato sa kalibutan sa espiritu nga iyang gikoloran. Daghan pa siyang gihatag nga mga pangutana ug mipakita og drawing nga daghan og kolor mahitungod sa plano sa Langitnong Amahan. Sa katapusan, si Chance nangutana, “Aduna bay nakahibalo sa ngalan niini nga plano?”
Ang kauban sa kwarto ni Tiya Barbie miingon, “ako wala. Unsa man diay kini?”
“Kini ang plano sa kaluwasan,” si Chance miingon, nga nagpahiyum. “Tungod niini, kita magkauban sa kahangturan uban sa atong pamilya.”
Human sa leksyon, gipatapad ni Tiya Barbie si Chance. “Chance, imo nga natabangan ang akong kauban nga makakat-on kabahin sa plano sa langitnong Amahan. Salamat,” miingon siya.
Si Chance nahilum og kadiyot. Dayon nangutana siya, “Nganong mibati man ako nga kataw-unon sa kaugalingon? Akong gibati ang kainit ug kalipay.”
“Mao kana ang Espiritu Santo nga nagpamatuod kanimo nga ang bag-ohay pa lamang nimong gitudlo tinuod,” miingon si Tiya Barbie. “Sigurado ako nga nalipay kaayo ang Langitnong Amahan kanimo.”
Si Chance mipahiyum og dako. Nalipay siya nga siya makatudlo ngadto sa uban kabahin sa plano sa kalipay sa atong Langitnong Amahan.