Paghatag og Epektibong Pakigpulong

Ni Marcus Sheridan

Ang pagkamiyembro sa Ang Simbahan ni Jesukristo sa mga Santos sa Ulahing mga Adlaw nagpasabut nga labaw pa kaysa maglingkod sa simbahan, maminaw sa uban nga mamulong. Ang Manluluwas nag-organisar sa Iyang Simbahan sa paghatag kanatong tanan og oportunidad nga motubo sa espirituhanong paagi. Usa niadtong mga oportunidad mao ang pagpamulong sa simbahan, nga makapakulba—hinam ug makapatagbaw sa espirituhanong paagi nga kasinatian.

Aron sa pagpahimulos sa ilang mga pakigpulong, ang epektibong mga mamumulong mopakita og kadasig, mopakigbahin og mga istorya ug personal nga mga kasinatian, mogamit og mga kinutlo ug mga kasulatan, ug mamulong pinaagi sa gahum sa Espiritu Santo.

Pagpakita og Kadasig

Kon mas madasigon kita kabahin sa ebanghelyo, mas makita sa uban ang atong interes ug makabaton og tinguha sa pagsinati sa sama nga mga pagbati. Sa laing bahin, kon ang atong pakigpulong—ilabi na sa sinugdanan—napuno sa pagpangayo og pasaylo o negatibong mga pahayag, atong gipaubos ang atong kaugalingon, gipakawalay bili ang atong mensahe, ug gipasilo ang Espiritu. Pinaagi sa pagkamahinamon ug andam sa pagpakigbahin sa ilang mensahe—ang mensahe sa Ginoo—ang may pagsalig sa kaugalingon nga mga mamumulong mopanalangin sa uban.

Pagpakigbahin og mga Istorya ug Personal nga mga Kasinatian

Kon kita mopakigbahin og makatandog nga istorya o personal nga kasinatian, ang atong mensahe adunay mahangturong epekto sa atong tigpaminaw. Ang mga tawo gusto nga maminaw og mga istorya. Mao kana nga ang mga tawo maminaw og maayo ug madugangan ang atensyon kon kita mopakigbahin niini.

Kitang tanan nakasinati og dili makalimtan nga mga hitabo. Nagkinahanglan lamang nga paninduton ug kalagsik sa pagsulti sa istorya nga makapainteres. Kon kita dili makahunahuna og angay nga personal nga istorya, kita kanunay mahimong mopakigbahin og istorya gikan sa mga magasin sa Simbahan.

Kon mopakigbahin og personal nga mga kasinatian, ang epektibong mga mamumulong:

Magpraktis og sulti sa ilang sa mga istorya og una aron dili na kini nila basahon ug makapadayon sa pagtan-aw sa kongregasyon.
Maghimo sa ilang mga istorya nga mubo ug makapainteres.
Mag-usab-usab sa tuno sa ilang tingog ug magpakita og pagbati.
Magsulti og mga detalye sa paghulagway kon angay.
Usahay magpakatawa apan nakasabut nga dili tanang mga pakigpulong nagkinahanglan og komedya.
Maghimo sa ilang punto sa katapusan sa matag istorya.

Maggamit og mga Kinutlo ug mga Kasulatan

Ang mga pulong sa Ginoo ug sa Iyang mga sulugoon makatudlo, makadasig, makagiya, ug makapaawhag. Kon atong mahimo nga ang ilang mga pulong makahatag og kinabuhi sa atong mga pakigpulong, kita makaapekto sa uban sa usa ka positibo ug lawom nga paagi.

Kon mokutlo og mga kasulatan ug mga kinutlo, ang maayong mga mamumulong:

Mopakigbahin sa background ug kasaysayan kabahin sa mga kasulatan ug mga kinutlo aron sa pagtabang sa mga tigpaminaw sa pagsabut sa ilang kaimportante.
Mopokus lamang sa pipila ka mga kasulatan ug mga kinutlo.
Mohatag og gibug-aton sa importanting mga bahin.

Mosulti pinaagi sa Gahum sa Espiritu Santo

Ang pagsulti pinaagi sa gahum sa Espiritu Santo mao ang labing mahinundanong paagi nga kita makapasabut. Si Nephi miobserbar, “Kon ang tawo mamulong pinaagi sa gahum sa Espiritu Santo ang gahum sa Espiritu Santo modala niini ngadto sa mga kasingkasing sa katawhan” (2 Nephi 33:1).

Kita angay alang nianang impluwensya kon kita magpuasa, mag-ampo, ug makugihong mangandam alang sa atong mga pakigpulong. Kon kita husto gayud nga nakaandam, kita dili kinahanglan nga mahadlok (tan-awa sa D&P 38:30).

Pinaagi sa pagsagol sa pagpakig-uban sa Espiritu Santo uban sa kadasig, pagsulti sa mga istorya, mga kasulatan ug mga kinutlo, ug dayon pinaagi sa pagdugang sa atong pagpamatuod sa mga kamatuoran nga atong ipakigbahin, kita makapabayaw ug makapadasig.

Ang Ehemplo ni Presidente Monson

Si Presidente Thomas S. Monson usa ka gamhanan ug makapatandog nga mamumulong. Ang pag-eksamin sa iyang estilo sa pagsulti ug pipila sa iyang bag-o nga mga pakigpulong sa kinatibuk-ang komperensya nagpakita og mga abilidad sa usa ka maayo nga mamumulong.¹

Si Presidente Monson kanunay naghatag og gibug-aton nga iyang pribelihiyo ang pagpamulong sa mga miyembro sa Simbahan, ug siya nagpasalamat alang niining oportunidad. Dugang pa, siya kanunay nagpakita niana nga pasalamat pinaagi sa pagpakita og kadasig sa sinugdanan sa iyang mga pakigpulong.

Human sa iyang pangbukas nga mga pahayag, si Presidente Monson mokutlo og mga kasulatan sa paghatag og direksyon sa iyang pakigpulong ug mosulti sa iyang mga tigpaminaw unsa ang iyang hilisgutan. Siya usab mokutlo sa mga General Authority ug sa uban pa aron sa pagdugang og pagsabut sa iyang hilisgutan.

Si Presidente Monson naila sa pagpakigbahin og personal nga mga kasinatian gikan sa iyang kinabuhi. Siya nasayud nga ang iyang tigpaminaw mainteresado ug makasabut sa personal nga mga istorya. Siya usab nasayud nga usa sa labing maayo nga paagi sa pagtudlo mao ang pagpakigbahin unsa ang gitudlo sa kinabuhi ngadto kaniya.

Sa pagsulti og mga istorya, si Presidente Monson maggamit og makapatandog nga mga detalye aron sa pagkuha sa interes. Kanunay, siya usab naggamit og balak sa paghatag og gibug-aton sa iyang mensahe.

Sa katapusan, si Presidente Monson nakasabut sa kaimportane sa pagpamatuod, diin iyang buhaton kanunay ug makapatandog.

Aron sa pagpanindot sa paghatag sa inyong pakigpulong, pagpakita og kadasig, pagpadayon og tan-aw sa kongregasyon, ug pahiyum.