Gikan sa Natad sa Misyon
Ang Ginoo Mibutang Kaniya sa Among Agianan
Kinahanglan kitang mopaambit sa ebanghelyo ngadto sa tanan natong ikahimamat tungod kay wala gayud kita masayud kon si kinsa ang andam sa pagpaminaw sa atong mensahe.
Usa kadto ka init, sidlak nga adlaw sa Shìlín, Taipei, Taiwan, ug ang akong kompanyon, si Sister Verhagen, ug ako nagsakay sa among mga bisikleta sa pagbisita sa usa ka miyembro. Sama sa naandan, ang traffic grabe kaayo ug busy. Mga awto, mga motor scooter, ug mga bisikleta mipuno sa mga karsada, padulong sa lain-laing direksyon.
Nagpadagan ako, sama sa kanunay nakong gihimo, sa may ngilit sa karsada aron ang ubang mga sakyanan makaagi. Sa kalit lang, nabangga ko ug nalabay sa yuta. Sa akong paghangad, akong nakita ang usa ka tawo nga nagsige og balik-balik sa pagpangayo og pasaylo. Maingon og, gikan siya sa giparking niya nga awto sa kilid sa karsada. Sa iyang pag-abli sa pultahan aron mogawas, nabangga ako niini. Wala ako makakita kaniya, ug siya wala makakita kanako.
Sa dihang gitan-aw nako ang akong tuo nga paa, akong nakita kon asa ako naigo. Ang akong mga paa nalupyak og dako ug minghubag ug milagom. Ang ambulansya nga diha sa among luyo mihunong, misusi kanako, ug midala kanako diretso sa ospital. Ang akong mga paa gieksamin ug gi-X-ray sa pagsuta kon nabali ba kini. Ang tawo nga nakaadsidente kanako miadto usab sa ospital sa pagsusi kon ako OK ra ba.
Samtang nagpaabut sa mga resulta sa X-ray, si Sister Verhagen ug ako nakigsulti ngadto sa tawo, nga si Hsu Chung Wei. Gibalik-balik niya sa pagpangutana kon kumusta ako ug nangayo og pasaylo sa nahitabo. Nangayo usab ako og pasaylo ug misulti kaniya nga nalipay nga ang paa ra nako ang nakaangkon og kadaot.
Among nahibaloan nga si Chung Wei usa ka estudyante sa kolehiyo nga nagtuon og violin. Human sa kadiyot nga pagpakig-istorya kaniya, miingon kami, “dili kami buot nga mopugos kanimo, apan kon gusto ka nga maminaw sa among mensahe, ganahan kaming moiskedyul og panahon alang kanimo sa pakighimamat sa mga elder.” Mihunong siya sa makadiyot ug dayon miuyon. Naghinatagay kami og mga impormasyon ug mitakda og oras alang kaniya sa pakighimamat sa mga elders.
Ang resulta sa akong X-ray miabut na. Swerte kaayo, ang akong paa wala mabali. Sakit lang gayud kaayo ug bati nga tan-awon.
Sa wala madugay niana nga semana si Elder Criddle miingon kanako nga siya ug ang iyang kompanyon nakahimamat na ni Chung Wei. Maayo ang dagan sa leksyon. Duha ka semana human niana akong nahibaloan nga mitambong siya sa simbahan kaduha ug nagplano nga magpabunyag. Nalipay kaayo ako ug naghinam-hinam.
Pagka Abril 27, 2002, si Chung Wei nabunyagan, siya ang pinakabag-o nga miyembro sa Tien Mu Ward. Wala ako makahigayon og tambong sa iyang bunyag tungod kay nabalhin ako, apan akong nadunggan nga maayo ra ang tanan sa bunyag.
Sa wala madugay nakita nako ang misyonaryo, si Elder Packer, kinsa mihimo sa interbyu ni Chung Wei alang sa bunyag. Si Elder Packer nangutana kaniya kon nganong misugod siya sa pagpaminaw sa mga diskusyon ug nakahukom sa pagpabunyag. Si Chung Wei miingon kaniya nga nadani siya sa kinaiya ni Sister Verhagen ug sa akong kinaiya ngadto kaniya. Tungod kay kami mabination ngadto kaniya ug wala masuko bisan sa aksidente, miingon siya nga nasayud siya nga tingali mao kini ang tinuod nga Simbahan. Wala madugay, panahon sa mga diskusyon, gibati niya ang Espiritu ug naglig-on sa iyang pagpamatuod.
Mapasalamaton ako nga si Chung Wei naandam. Nalipay ako nga gisunod niya ang mga pag-aghat sa Espiritu, nabunyagan, ug karon anaa na kaniya ang ebanghelyo ni Jesukristo.
Wala ako masayud nga ang Amahan sa Langit mibutang ni Chung Wei sa akong agianan nianang adlawa. Wala ako masayud nga siya andam na sa pagpaminaw sa ebanghelyo. Apan ako nasayud nga kita kinahanglan nga mamahimo nga disipulo ni Kristo ug maningkamot sa pagbuhat sama sa Iyang pagbuhat. Nasayud ako nga kinahanglan kitang mopaambit sa ebanghelyo ngadto sa atong mga ikahimamat tungod kay wala gayud kita masayud kon si kinsa ang giandam sa Ginoo sa pagpaminaw sa ebanghelyo.
Paghulagway pinaagi ni Dan Burr