Pagbugkos sa Atong mga Kasingkasing
Gikan sa usa ka pakigpulong sa Oktubre 2008 nga kinatibuk-ang komperensya.
Ang mga propeta sa Ginoo kanunay nga nagtawag alang sa paghiusa.
Ako gidapit nga moluhod sa tingkatulog uban sa usa ka pamilya sa dihang ako usa ka bisita sa ilang balay. Ang kinagamyang anak ang gihangyo nga mag-ampo. Siya nag-ampo alang sa matag tawo diha sa pamilya, nga gihinganlan ang pangalan. Akong gibuka ang akong mga mata sa makadiyot aron tan-awon ang mga nawong sa ubang mga bata ug mga ginikanan. Makaingon ko nga ilang gihiusa ang ilang hugot nga pagtuo ug ilang kasingkasing diha nianang pag-ampo sa gamay nga batang lalaki.
Ang milagro sa panaghiusa ihatag kanato samtang kita mag-ampo ug maningkamot alang niini. Ang atong mga kasingkasing mahimong mabugkos diha sa panaghiusa.
Sa Mosiah atong mabasa: “Ug siya misugo kanila nga kinahanglan walay panagbingkil sa usag-usa, apan sila kinahanglan molantaw sa unahan uban sa nagkahiusa nga panan-aw, may usa ka hugot nga pagtuo ug usa ka bunyag, diin ang ilang mga kasingkasing nabugkos diha sa pagkahiusa ug diha sa gugma sa usag-usa” (Mosiah 18:21).
Ang mga anak sa Dios labaw pa nga may daghang pagkapareha kay sa mga panaglahi. Pagsulti og maayo sa usag-usa. Tingali ikaw mahinumduman sa imong inahan nga miingon—ang akong inahan mihimo—“Kon ikaw walay masulti nga maayo mahitungod sa usa ka tawo, ayaw na lang og sulti.” Ako makasaad kaninyo og usa ka pagbati sa kalinaw ug hingpit nga kalipay kon kamo manggihatagong modayeg sa uban.
Ako mohatag sa akong balaang pagsaksi nga ang Dios nga Amahan buhi. Siya maminaw ug motubag sa atong mga pag-ampo. Ang Manluluwas nga si Jesukristo buhi ug nagtabang kanato diha sa kalooy. Kini mao ang Iyang tinuod nga Simbahan. Si Presidente Thomas S. Monson mao ang buhi nga propeta sa Dios. Kon kita magkahiusa sa pagpaluyo kaniya uban sa atong tibuok nga kasingkasing, uban sa kaandam nga magmasulundon, kita kaubang magpadayon diha sa gahum sa pag-adto kon asa kita paadtoon sa Dios ug mamahimo kon unsay Iyang gusto nga kita mahimo.
Paghulagway sa litrato pinaagi ni Matthew Reier; paghulagway pinaagi ni Avalone