Unsa ang Atong Gituohan

Pagpakatakus sa Pagsulod sa Templo

Ang mga templo sa literal nga paagi mga balay sa Ginoo. Sa templo kita mohimo og sagradong mga pakigsaad, o mga saad, uban sa Dios nga atong gikinahanglan aron kita makauban Kaniya sa labing taas nga langitnong himaya (tan-awa sa D&P 131:1–4). Kining mga pakigsaad sa templo modala ngadto sa dagkong mga panalangin nga anaa pinaagi kang Jesukristo.

Wala paabuta nga kita hingpit sa pagsulod sa templo. Hinoon, ang katuyoan sa mga butang nga atong nakat-unan ug mga pakigsaad nga atong buhaton sa templo makatabang kanato nga mahingpit. Kita kinahanglan, hinoon, takus sa pagsulod.

Usa ka rekomend sa templo ang mopaila nga kita takus pinaagi sa usa ka interbyu uban sa usa ka sakop sa bishopric o sa atong presidente sa branch ug interbyu usab sa usa ka miyembro sa atong kapangulohan sa stake o kapangulohan sa misyon. Ang mga interbyu sa rekomend sa templo mao ang mga oportunidad alang kanato sa pag-eksamin sa atong mga katakus. Sa kada interbyu, ang atong mga priesthood lider mangutana kanato kabahin sa atong personal nga pamatasan ug hugot nga pagtuo. Ang atong mga priesthood lider mohimo niining mga interbyu nga pribado ug kompidensyal.

Kon ang atong mga priesthood lider makakita nga kita takus sa pagsulod sa templo, kita makadawat og rekomend sa templo. Kita mopirma sa atong rekomend sa pagmatuod sa atong katakus sa pagsulod sa templo. Ang atong mga priesthood lider mopirma usab sa atong rekomend isip dugang nga mga saksi sa atong pagkatakus. Kini nga rekomend motugot kanato sa pagsulod sa templo sulod sa duha ka tuig, kon kita magpabiling takus.

Ang Unang Kapangulohan miestablisar og mga pangutana nga ipangutana sa interbyu sa rekomend sa templo. Ang mga pangutana pareha alang sa tanan.

Ang mosunod mao ang pipila sa mga hilisgutan nga ipangutana sa inyong mga priesthood lider:

1. Ang inyong pagpamatuod sa Langitnong Amahan, ni Jesukristo, ug sa Espiritu Santo.

2. Kon kamo ba nagsuporta sa Presidente sa Simbahan.

3. Kon kamo ba nagsunod sa balaod sa kaputli, nagbayad og ikapulo, nagmatinud-anon ngadto sa uban, ug nagsunod sa Pulong sa Kaalam.

4. Kon kamo ba naningkamot sa pagsimba, naghupot sa mga pakigsaad nga inyong gihimo, ug nagpahiuyon sa inyong kinabuhi sa mga sugo sa ebanghelyo.

Tan-awa sa Mga Baruganan sa Ebanghelyo (2009), 226–27; ug Matinud-anon sa Tinuhoan (2004), “Mga Templo,” 228–33.

Ang Ginoo nagpahiluna og mga sumbanan sa katakus sa pagsulod sa templo, sama sa gipahayag sa usa ka Salmista:

“Kinsa ang mosaka ngadto sa bungtod ni Jehova? o kinsa ba ang motindog sa iyang dapit nga balaan?

“Siya nga malinis ug mga kamot, ug may usa ka putli nga kasingkasing” (Salmo 24:3–4).

Litrato sa Templo sa Bountiful Utah pinaagi ni Steve Tregeagle; paghulgaway sa litrato pinaagi ni Christina Smith, John Luke, Steve Bunderson, ug Matthew Reier; litrato sa bunyaganan sa Templo sa Vernal Utah Temple pinaagi ni Tamra Hamblin.

• Ang Inyong Rekomend sa Templo