Seminary o Sports?
Wala na ako mobati og balanse. Dili na ako makapadayon sa akong panahon alang sa simbahan, akademik, ug sa sports.
Dihang nagsugod ako sa high school, miapil ako sa usa ka atheletic team sa eskwelahan. Ang pagdagan maoy ganahan nakong buhaton—Usa na ako ka runner sukad siyam pa ang akong edad—ug gipaningkamutan ko gayud kini. Mitambong ako og mga sesyon sa pagbansay pinakaminus katulo sa usa ka semana sa gabii. Gani aduna akoy kahigayunan sa pagrepresentar sa akong siyudad sa nasyonal nga mga dula sa Costa Rica.
Sa kasagaran, ang mga pagpraktis molungtad hangtud sa lawum nga kagabhion. Nakahimo kana sa akong pagmata og sayo alang sa seminary, diin magsugod sa alas 5:00 sa buntag nga usa ka dugang nga hagit, apan gipadayon nako sa paghimo kana nga sakripisyo.
Sa tunga-tunga sa akong pag-eskwela sa high school, hinoon, sa nag-edad na ako og 16 namatngunan nako nga ang akong kasingkasing wala na mapunting sa seminary. Motambong man ako, apan kulang ang akong pahulay, kaandam, o ang pagpaminaw nga angay unta nakong buhaton. Nasayud usab ako nga ang pagniwang sa akong lawas tungod sa dugay nakong pagkatulog sa gabii ug pagmata og sayo sa buntag nakaapekto sa akong pisikal nga panglihok, nga dili makiangayon sa akong team.
Bisan og ako kanunay nga nag-uswag sa akong pag-apil sa daghang mga kalihokan ug nakahigayon pa gihapon sa simbahan, sa mga akademik, ug mga sports hangtud niana nga punto, wala na ako mobati og kabalanse. Nagsugod ako sa paghunahuna kon gikinahanglan ba nako ang paghunong sa ubang butang. Ang pagdagan makalingaw, makaayo sa lawas nga kalihokan, usa ka butang diin hanas ako. Usa kadto ka kahigayunan alang kanako nga makagamit sa akong mga talento ug sa pag-establisar ug mga sundanan sa pagdisiplina. Ug sa akong eskwelahan, ang pagkaatleta gibantog kaayo. Aduna akoy maayong mga higala sa akong team, ug kon mobiya ako niini, mingawon ako sa among panag-uban.
Sa laing bahin, aduna akoy tumong nga maka-gradwar sa seminary, ug nasayud ako nga kon magpabilin ako sa team, dili ko kana mahimo.
Samtang akong gitimbang-timbang ang akong desisyon, akong gihunahuna kon unsa gayud ang makaayo kanako sa tanang aspeto sa akong kinabuhi, atol sa akong mga katuigan sa high school ug sa nahibilin sa akong kinabuhi. Gihunahuna nako ang akong taas og tagal nga mga tumong. Akong namatngunan nga ang akong kinaiya mahitungod sa seminary adunay implikasyon sa nahibilin sa akong kinabuhi—alang sa kahangturan, sa pagkatinuod. Nahibaloan nako kon unsay kinahanglan nakong buhaton.
Sa pagkatapos sa akong ikaduhang tuig sa high school, gisultihan nako ang akong coach ug mga kaubanan sa team nga dili na ako moapil sa team. Nakalitan sila. Walay bisan usa nga nakasabut nganong dili na nako ipadayon ang akong ganahan kaayong butang nga mao ang lumba sa pagdagan—pipila ka butang nga akong gihimo hapit katunga sa akong kinabuhi—“sa pag-adto sa simbahan alas 5:00 sa buntag.” Sila akong gipasabut nga kana akong responsibilidad ug akong prayoridad ug pinaagi sa pagpili niining husto nga mga butang, mas malipayon ako nga tawo. Maayo gani kay, bisan og wala sila makasabut sa akong desisyon, kadaghanan sa akong mga higala mitahud niini.
Sulod sa sunod nga duha ka tuig sa pag-eskwela, mas daghan na ang akong panahon sa pagbasa sa mga kasulatan ug sa pagpamalandong niini. Tungod kay dili na ako magdali-dali sa tanang panahon, akong namatngunan ang akong kaugalingon nga nagdawat og mga inspirasyon nga mas kanunay. Kadtong mga butanga nakahatag kanako og balanse nga kinabuhi, kalinaw, ug kalipay nga wala gayud nako masinati kaniadto.
Sa pagkatapos sa high school, migradwar ako sa seminary. Kana nga kalampusan dako kaayo og kahulugan ngari kanako. Nakabaton ako og gugma alang sa mga kasulatan ug sa mga sugilanon ug sa mga leksyon nga anaa niini, nakakat-on ako nga madisiplina sa pagmata og sayo, ug napanalanginan ako og maayong mga pakighigala nga nalig-on pinaagi nianang oras sa sayo sa buntag nga among gigahin nga magkauban sa matag adlaw. Apan ang pinakaimportante, nakakat-on ako pinaagi sa seminary mahitungod sa pagsiguro nga akong unahon kanunay ang Ginoo.
Kana nga sundanan nagpadayon sa pagpanalangin sa akong kinabuhi karon samtang nag-eskwela ako sa unibersidad. Ang akong mga klase mas lisud kay sa didto sa high school. Mas daghan ang akong mga responsibilidad sa simbahan. Apan tungod kay naestablisar na nako ang kinaiya nga unahon ang Ginoo, mas sayon ang pagpadayon og han-ay sa husto nga mga prayoridad, ug nanghinaut ako nga makapadayon ako niana nga sundanan sa nahibilin sa akong kinabuhi.
Paghulagway pinaagi ni Scott Greer