Sila Namulong Kanato
Kadto Sila nga mga Lahi
Gikan sa usa ka pakigpulong nga gihatag atol sa usa ka sibya sa komperensya sa stake sa Utah County, Utah, niadtong Septyembre 7, 2008.
Hinaut ang Dios manalangin kanato sa pagkahibalo nga ang importante nga sukod sa atong kalamboan sa pagduol ngadto kang Kristo mao nga kita makit-an kon unsa ka maayo ang atong pagtratar sa uban, ilabi na ngadto sa mga tawo nga lahi.
Duha ka tuig sa wala pa ako matawo niadtong 1942, nanganak ang akong mama sa akong magulang nga lalaki, si Gary. Si Gary usa ka espesyal kaayo nga tawo. Sa iyang pagkatawo, ang iyang utok nadaot tungod sa kakulang og oxygen. Ang iyang hunahuna wala na gayud motubo nga lapas sa unom o pito ka tuig ang pangidaron.
Kapin sa 60 ka tuig, akong gipanid-an ang akong mga ginikanan nga nag-atiman kang Gary. Mitabang sila sa pag-brush sa iyang ngipon, pagsudlay sa iyang buhok, ug sa pagtaod sa iyang kurbata inig ka Dominggo. Tungod kay ganahan siya og mga kabayo ug sa mga cowboy, ila siyang dalhon ngadto sa mga rodeo ug sa Western nga mga salida. Gihimo nila ang dili maihap nga lihok sa paghigugma ug kamabination alang kaniya.
Makasubo lang , ang mga tawo dili kaayo kanunay mabination ngadto sa lahi nga mga tawo. Pasayloa ako sa pag-ingon nga pipila ka mga bata—bisan gani ang mga bata nga gikan sa aktibong mga pamilya nga mga miyembro sa Simbahan—dili mabination ngadto kaniya. Dili siya paapilon sa mga dula, tawgon siya og bati nga ngalan, ug walay kalooy nga sungugon siya.
Si Gary usa ka tawo nga daw sama sa bata nga dali rang mopasaylo. Gimahal niya ug gidawat ang tanang tawo. Nagtuo ako nga gawas sa akong mga ginikanan, kini nga espesyal nga igsoon mihimo og daghan kay ni bisan kinsa pa, panahon sa akong pagkabata aron hulmahon ang akong panglantaw sa kinabuhi. Usahay maghunahuna ako kon unsa kaha unya inig kahuman sa Pagkabanhaw, diin gihulagway ni Alma nga, “ang tanan nga butang ipahiuli ngadto sa ilang tukma ug hingpit nga bayanan” (Alma 40:23). Dayon mailhan nato ang tinuod gayud nga Gary, ug ako nagtuo nga kami mapasalamaton kaayo alang sa tanang maayo nga butang nga among gihimo alang kaniya ug labihan ka magul-anon mahitungod sa mga panahon nga unta ikapakita ang labaw nga paghigugma ug pagsabut sa iyang espesyal nga kahimtang.
Ang Panginahanglan alang sa Paghigugma ug Pagsabut
Adunay daghang mga tawo nga sama kang Gary dinhi sa atong kalibutan. Bisan dinhi sulod sa Simbahan adunay mga kaigsoonan kinsa tingali makonsidera nato nga “lahi” ug nagkinahanglan kaayo sa atong gugma ug pagsabut. Ang ilang panginahanglan sa gugma ug pagsabut naggikan sa bahin sa usa ka kultura nga milambo samtang naningkamot kita sa pagpuyo sumala sa plano sa Dios alang kanato. Sama sa ubang mga kultura, ang kultura nga nahimo gikan sa atong mga paningkamot sa pagpuyo subay sa ebanghelyo ni Jesukristo naglakip og piho nga ekspektasyon ug sa makalig-on sa moral nga kustombre. Sama pananglit, ang kaminyoon ug ang pamilya gihatagan og taas nga bili, ug ang mga amahan ug inahan gitugahan sa balaanong mga tahas nga tumanon. Ang mga bata ug mga kabatan-onan gidasig sa pagpuyo subay sa piho nga mga sumbanan ug paglakaw sa gitudlo nga mga dalan aron pagkab-ut sa piho nga mga tumong sa edukasyon ug sa pagka-espirituhanon.
Ang gitinguha nga mga sangputanan sa kinabuhi nga nagsentro sa ebanghelyo gihimo nga mga sumbanan diin kitang tanan giawhag sa pagpaningkamot. Bisan og ang ingon nga mga sumbanan gibase sa doktrina ug nagrepresentar ug madanihon nga mga katuyoan sa atong misyon sa pagpangita og kinabuhing dayon, kini usahay mamahimo nga tinubdan sa kahigawad ug kasakit alang niadtong kansang mga kinabuhi lahi kay sa gihimong sumbanan.
Ang pagkadili komportable ug ang kapakyas sa mga ekspektasyon maanaa, sama pananglit, alang sa usa ka nagdiborsyo nga miyembro sa Simbahan, alang sa usa ka tawo nga wala gihapon maminyo bisan sa edad nga angay na siyang maminyo, alang sa tawo nga nakigbisog sa nahitabo nga mga kapakyasan o sa may kakulian sa gana sa pagkaon, o alang sa mga ginikanan nga adunay badlungon nga anak. Ang ubang mga miyembro sa Simbahan nga tingali mobati og kultural nga pagkadayag mao kadtong anaa sa minoriya nga kaliwatan, kadtong nakigbisog sa mga pagbati og atraksyon ngadto sa kapareho nila og sekso, o sa batan-ong lalaki kinsa, sa bisan unsa nga katarungan, mipili sa dili pagserbisyo og misyon sa kasagaran nga edad. Ang mga miyembro nga naghinulsol ug kansang mga kalapasan nanginahanglan og pormal ug dugang nga publikong pagdisiplina sa Simbahan makakita usab sa ilang sosyal nga pakigsuod diha sa Simbahan nga ingon og may pagka-kiwaw.
Bisan kon sila takus, ang mga miyembro kansang kinabuhi dili makahaum sa sumbanan ug sa ingon gikonsidera nga lahi sa kasagaran mobati og kaubos sa kaugalingon og sad-an. Kini nga mga pagbati madugangan kon kita nga ilang mga igsoon mapakyas sa pagka manggihunahunaon ug sa pagka sensitibo ngadto kanila nga mao unta ang angay natong buhaton. Hunahunaa, pananglit, ang dili tinuyo nga epekto sa usa ka magtiayon nga walay anak kon ang usa ka miyembro sa ward mangutana kanila kon kanus-a sila magkaanak, nga wala hunahunaa nga dugay na kaayo silang nangandoy og mga anak apan wala gayud manganak.
Samtang molihok kita sa pagsulbad niining mahagitong mga sitwasyon, importante ang pag-ila nga ang solusyon dili mao ang pagtangtang o gani ang pagpaubos sa sumbanan. Ang mga propeta ug mga apostoles kanunay nga adunay katungdanan sa pagtudlo ug sa pagdasig kanato sa pagpaningkamot alang sa mao nga sumbanan. Ingon niana ang gibuhat sa Manluluwas. Ang Iyang sugo mao “Busa kamo kinahanglan magmahingpit” (Mateo 5:48), dili lamang kaysa “Pag-ayo-ayo kamo.”
Tanan Kita Managlahi
Usa ka makatabang nga pagtulun-an miabut kanako daghang tuig na ang milabay sa dihang nagbasa ako sa pagtulun-an sa Manluluwas kabahin sa tawo nga adunay usa ka karnero nga nawala. Ang Manluluwas nangutana, “Dili ba niya biyaan ang kasiyaman ug siyam diha sa kabungturan, ug molakaw siya sa pagpangita niadtong usa nga nahisalaag?” (Mateo 18:12).
Isip lider sa priesthood, kanunay akong maghunahuna sa kaugalingon sulod sa daghang katuigan isip tigbalantay sa karnero—sa usa nga migawas sa pagpangita sa nawala nga karnero. Apan sa panahon sa pagpamalandong, akong nasayran nga sa pipila ka paagi o sa lain kitang tanan mao kanang nawala nga karnero. Tanan kita adunay mga kapakyasan, ug ang atong mga kinabuhi magkalahi sa pipila ka pamaagi gikan sa sumbanan. Tanan kita managlahi! Usa kini ka makapaubos apan makatabang nga pag-ila
Makatabang usab ang paghinumdom sa pagtudlo sa sumbanan, ang Manluluwas miila nga ang sumbanan dili sa kanunay makab-ot diha-diha dayon. Sa paghisgot mahitungod sa esprituhanong mga gasa—kadtong talagsaon nga mga pagtuga sa Espiritu Santo—miingon ang Manluluwas, “Sila gihatag alang sa kaayohan niadto kinsa nahigugma kanako ug naghupot sa akong mga sugo.” Ang pagsunod sa tanang mga kasugoan aron makatagamtam sa espirituhanong mga gasa maingon og usa ka imposible nga taas nga sumbanan, apan salamat nga ang Manluluwas midugang nga ang espirituhanong mga gasa gihatag usab alang sa kaayohan “kaniya nga nangita sa paggamit niini” (D&P 46:9; pagpasabut gidugang). Ang paningkamot sa pagsunod sa tanang mga kasugoan—bisan kon usahay wala nato masunod ang sumbanan—usa ka butang nga sulod sa gahum sa matag usa kanato ug madawat sa atong Langitnong Amahan.
Sukad sa bunyag kitang tanan nanaad “sa pagbangutan uban niadto nga nagbangutan; oo, ug sa paghupay niadto nga nagkinahanglan sa kahupayan” (Mosiah 18:9), ang pagka manggiloy-on ug kamabination niadtong adunay espesyal nga mga kahimtang—niadtong mga lahi—usa ka importtante nga aspeto sa atong mga paningkamot nga mahimong disipulo ni Kristo. Kang Jesus, si Nephi misulat, “Dili siya maghimo og bisan unsa gawas kon kini alang sa kaayohan sa kalibutan” (2 Nephi 26:24). Dili katuohan nga ang Manluluwas mohimo o mosulti og bisan unsang butang nga mopagrabe sa mga kasakit o makadaot ni bisan kinsa nga mga anak sa Dios. Sa pagkatinuod, si Alma mitudlo nga isip usa ka bahin sa Pag-ula, si Kristo boluntaryo nga misinati sa mga kasakit, mga sakit, ug mga kakulangan aron “siya [tingali] mahimo nga masayud sumala sa unod unsaon pagtabang ang iyang mga katawhan” (Alma 7:12).
Makakuha kita og dakong kahupayan sa katakus ni Kristo nga mobati sa kaugalingon natong mga kasinatian—usa ka kinaiya nga nailhan nga kalooy alang sa uban. Ang rekord sa pagpangalagad ni Kristo puno sa gipakita nga kalooy alang sa uban ug kamabination ngadto sa mga tawo nga lahi.
Sa dihang ang bag-o nga Children’s Songbook sa Primary gi-compile niadtong 1989, usa ka kanta ang gikinahanglan nga mamulong ngadto sa mga bata—ug ingon man kanatong tanan—mahitungod niadtong kinsa, tungod kay lahi sila, adunay linahi nga panginahanglan sa atong paghigugma ug pagsabut. Kanang simple nga kanta, “Mouban Ko Nimo,” nindot kaayong nag-summarize kon sa unsang paagi kita makapakita sa atong gugma ug pagsabut:
Kon lahi ang pamaagi mo,
Sila mopalayo nimo,
Ug ako! Dili!
Kon lahi ang pag-istorya mo,
Kataw-an ka sa ubang tawo,
Ug ako! Dili!
Mag-uban ug, Mag-istorya.
Pagpakita sa akong gugma.
Jesus ‘wa magpalayo.
Gihigugma N’ya ang tanan.
Ako sab! Oo!
Jesus mipanalangin,
Ug miingon, “Sunda, ako.”
Sundon ko! Oo!
Sundon! Oo!
Mag-uban ug, Mag-istorya.
Pagpakita’s akong gugma.1
Unta ang Dios mopanalangin kanato aron mahibalo nga ang importante nga sukod sa atong kalamboan sa pagduol ngadto kang Kristo makita kon giunsa nato sa pagtagad ang uban, ilabi na kadtong mga may pagkalahi. Ug unta kita mahinumdom nga tanan kita managlahi sa pipila ka mga paagi.
Kausa Nawala, pinaagi ni Del Parson, dili mahimong pakopyahan
Paghulagway sa litrato pinaagi ni Robert Casey