Si Reyna Ester ang Nagluwas sa mga Katawhan ni Jehova
May kahadlok si Ester nga naglakaw sa dakong hawanan sa palasyo sa Susan. Maanindot nga mga banner ang gibitay sa tag-as nga mga haligi. Ang marmol nga mga salog mga pula, blue, itom, ug puti. Gani ang mga baso hinimo sa bulawan. Dayon iyang nakita ang hari nga naglingkod sa halangdon niya nga trono.
Si Haring Assuero ang nagmando sa tibuok Persia. Mimando siya nga ang pinakamaanyag nga batan-ong babaye sa gingharian dad-on ngadto sa palasyo aron makapili siya og bag-o nga reyna. Si Ester usa niadtong maanyag nga batan-ong mga babaye.
Si Ester gipadako sa iyang ig-agaw, nga si Mardocheo, human mamatay ang iyang mga ginikanan. Si Mardocheo miingon kang Ester sa dili pagsulti kang bisan kinsa nga siya usa ka Judeo. Ang mga Judeo mituo kang Jehova, apan ang hari wala.
Sa dihang ang Hari nga si Assuero nakakita kang Ester, siya mipili kaniya labaw kay sa ubang batan-ong mga babaye. Siya mihimo kaniya nga bag-ong reyna. Karon si Ester magsul-ob na og mahalon nga saput ug harianon nga korona. Apan dili siya mahimong mopauli sa iyang balay o mosimba sa Dios sa dayag nga paagi.
Matag adlaw si Mardocheo moadto sa ganghaan sa palasyo sa pagsuta kon si Ester maayo ra ba. Usa ka adlaw si Aman, ang dako-dako nga ministro sa hari, nakakita kaniya. Si Aman mimando kang Mardocheo sa pagyukbo kaniya. Apan wala motuman si Mardocheo. Yukboan lamang niya ang Dios.
Si Aman nasuko. Giingnan niya ang Hari nga ang mga Judeo dili motuman sa mga balaod ug kinahanglan nga patyon. Ang hari mipagawas og usa ka balaod nga ang tanang mga Judeo sa gingharian kinahanglan nga pamatyon.
Sa dihang nabatian ni Reyna Ester ang mahitungod sa makalilisang nga balaod, mipadala siya og pulong kang Mardocheo. Unsa man ang ilang buhaton?
Miingon si Mardocheo nga si Ester kinahanglan nga makigsulti sa hari sa pagluwas sa mga katawhang Judeo. Miingon siya nga si Ester adunay espesyal nga misyon nga buhatunon. Tingali siya gipili isip reyna aron iyang maluwas ang mga katawhan nga mituo kang Jehova.
Si Ester nahadlok. Si bisan kinsa nga makigkita sa hari nga wala ingna mahimo nga patyon—bisan gani ang reyna. Gitigum ni Ester ang iyang kaisug ug hugot nga pagtuo. Gisultihan niya si Mardocheo sa paghangyo sa tanang mga Judeo sa pagpuasa uban kaniya sulod sa tulo ka adlaw.
Human sa tulo ka adlaw si Ester nagsul-ob sa iyang harianon nga mga kupo ug miadto sa pultahan sa kwarto diin atua ang trono. Si Haring Assuero nakakita kaniya ug mikamay kaniya sa pagsulod ug pagpakigsulti kaniya. Si Ester midapit sa hari ug sa iyang ministro nga si Aman sa usa ka kumbira.
Didto sa kumbira gisultihan ni Ester ang hari sa plano ni Aman sa pagpatay sa mga Judeo. Miingon si Ester nga siya usa usab ka Judeo. Si Haring Assuero nasuko kaayo. Dili na niya mahimong bakwion ang balaod, apan dali kaayo siyang mipadala sa mga nangabayo og usa ka bag-o nga balaod. Nag-ingon kini nga ang mga Judeo mahimong manalipod sa ilang kaugalingon batok kang bisan kinsa nga mosulay sa pagpatay kanila. Ang kinabuhi sa daghang mga Judeo naluwas.
Sa tibuok kayutaan ang mga Judeo nagsaulog tungod sa kaisug ni Ester og dako nga fiesta nga gitawag og Purim.
Sa wala: detalye gikan sa Si Kristo ug ang Adunahang Batan-ong Tigmando, ni Heinrich Hofmann, sa maayong kabubut-on sa C. Harrison Conroy Co.; Ayaw Atubanga ang Kalibutan nga Mag-inusara, ni Paul Mann; sa tuo: paghulagway pinaagi ni Sam Lawlor