Kaming Tanan mga Sapatos
“Kay ang Ginoong Dios naghatag og kahayag ngadto sa salabutan; kay siya namulong ngadto sa mga tawo sumala sa ilang pinulongan, ngadto sa ilang pagsabut.” (2 Nephi 31:3).
Ang mga bata nga bag-ong mga silingan ni Ryan naggikan sa tanang dapit sa kalibutan: sa Australia, Canada, Egypt, England, India, Kuwait, Mexico, Saudi Arabia, Scotland, United States, ug Vietnam.
Natingala si Ryan sa pagkahimamat og mga tawo nga naggikan sa daghan kaayong mga dapit, apan iyang namatikdan nga usahay ang mga bata makigdula lamang kauban sa mga bata nga pareho nila og pinulongan. Si Ryan wala makasabut nganong dili sila gustong magkadula tanan, dili igsapayan kon diin man sila gikan o unsa ang ilang pinulongan. Usahay ang mga bata nga gikan sa usa ka nasud dili maayong motagad sa mga bata nga gikan sa laing nasud. Kana nakapasubo ni Ryan.
Naghunahuna si Ryan kon unsa ang iyang mahimo, apan malisud ang paghunahuna og mga butang. Dili siya mahimong moingon lamang ngadto sa tanan nga maghigalaay kita—tungod kay lain-lain man sila og pinulongan, dili sila makasabut.
Usa ka adlaw niana ang pamilya ni Ryan naglakaw-lakaw ngadto sa karsada. Pipila sa mga batang lalaki nga mga isugon ang didto sa gawas. Usa kanila naggunit og bola sa football. Si Ryan ganahan usab nga modula og football. Nakabaton og kaisug, Si Ryan miduol sa mga batang lalaki. Kahibalo siya og gamay sa ilang pinulongan, ug sila kahibalo usab og gamay sa iyaha. Si Ryan ug ang ubang mga batang lalaki misugod sa pagpahiyum ug sa pagpangatawa samtang naningkamot sila sa lain-laing mga pinulongan. Dayon gitudlo ni Ryan ang bola sa football. “Gusto ba kamong magdula og football uban kanako?” gihinay niya sa pagpangutana, nanghinaut nga sila makasabut. Mipahiyum siya og dako kaayo.
Ang mga batang lalaki mitan-aw kaniya, dayon sa usag-usa. Nag-istoryahay sila sa makadiyot, apan si Ryan dili makasabut sa mga pulong. Dayon mitan-aw sila og balik kang Ryan ug miyango. Mingisi si Ryan, ug nanagan sila sa duol nga park. Si Ryan miwara-wara sa iyang mga higala nga Iningles ang pinulongan, ug nangaulaw og gamay nanuol sila. Usa sa mga batang lalaki mipahimutang sa bola, ug gisugdan ang dula.
Wala madugay si Ryan mipahulay og kadiyot midagan pauli sa balay aron moinom og tubig.
“Kumusta man ka didto?” Si Mama nangutana.
“Maayo kaayo!” si Ryan miingon. “Ma, ingon niini. Kaming tanan mga sapatos!”
“Sapatos?” Si Mama nangutana.
“Oo!” Managlahi kaming tanan, apan tanan kami nagsul-ob og duha ka sapatos—ug kanang tanan mao ang imong gikinahanglan alang sa football.”
“Nindot kanang imong nadiskubrihan,” miingon si Mama. “Kamong tanan mga anak sa Langitnong Amahan, ug mas pareho pa gayud kamo kay sa imong nahunahuna.”
Si Ryan miwara-wara sa iyang kamot sa dihang midagan siya og balik pagawas sa pultahan sa pagpakigdula og balik sa bag-o niyang mga higala.
Pagkahuman nianang adlawa ang mga bata sa kasilinganan mangadto na sa park matag Huwebes aron magkadula og football. Dili igsapayan kon unsa ang ilang mga pinulongan og diin man sila gikan—silang tanan mga sapatos, ug igo na gayud kadto.
Paghulagway pinaagi ni John Zamudio