Managlahi apan Nagkahiusa
Ang pagkauban hangtud sa kahangturan magsugod sa pagkahiusa karon.
Si Diana Vasquez wala mahatagi og kahigayunan sa pagpanamilit sa iyang amahan. Wala siya masayud nga kinahanglan niya kining buhaton. Sa dihang siya ug ang iyang duha ka igsoon nga mga lalaki mieskwela niadtong Hunyo 9, 2007, ingon og siya maayo ra. Apan sa wala pa siya moabut sa balay, siya naghigda ug wala na momata.
“Wala gayud kadto damha,” miingon si Diana, kinsa 16 niadtong higayona. “Sa sinugdanan wala ako makadawat niini.”
Bisan kadtong nasayud nga ang mga pamilya molungtad hangtud sa kahangturan usahay mobaliwala sa ilang pamilya. Sigurado, ang mga igsoon makasamok, mga ginikanan ug mga anak dili kanunay magkasinabut, ug ang paggahin og panahon uban sa mga higala ingon og makalingaw kanunay.
Apan kon ang trahedya moabut nga walay pasidaan, sama sa nahitabo sa pamilya ni Diana, sa kalit lang ang mga butang nga tinuoray nga importante—sama sa pamilya—nahimong mas importante.
Maayo na lamang sa pamilya ni Diana, ang panaghiusa dinhi ug sa sunod nga kinabuhi usa ka butang nga ila nang gitrabaho. Ang pagtinabangay kon ang panahon sa kalisud makapatibulaag kanila makahatag og kalinaw ug kalipay niining kinabuhi ug paglaum nga sila magkauban sa sunod nga kinabuhi.
Unsa ang Panaghiusa?
Si Diana ug ang iyang pamilya nagpuyo sa Cusco, usa ka siyudad sa taas nga dapit sa Peruvian Andes, sa tunga-tunga sa karaang gingharian sa Inca.
Sa mga tuig nga buhi pa ang iyang papa, ang pamilya ni Diana nakakita og paboritong dapit alang sa mga piknik diha sa Sacsayhuamán, ang mga linumpag sa usa ka kota sa Incan nga dili layo sa ilang balay. Ang mga pader nga gitukod sa Inca lig-on kaayo nga kini anaa pa labaw na sa 500 ka tuig ug sa dili maihap nga mga linog.
Alang kang Diana, ang iyang pamilya sama sa usa niadtong mga pader. Ang mga hagit miuyog kanila, apan sila wala matumpag.
Ang mga bato nga anaa sa mga pader sa Sacsayhuamán dili parehas ang gidak-on ug porma; ang pipila tag-as, ang pipila mugbo, ang pipila kwadrado, ug ang pipila yano nga dagko. Apan ang matag bato nga nagkalahi wala makapahuyang sa pader. Kon sakto ang pagkabutang, ang lain-laing mga gidak-on makatabang nga magkausa ang esktraktura. Ang panaglahi sa mga bato sa tinuoray nakatabang sa pagtuman sa ilang komon nga katuyoan.
Sama usab ang atong masulti alang sa atong mga panaglahi.
“Kitang tanan adunay nagkalain-alin nga mga gasa ug mga talento,” miingon si Diana. “Kinahanglan nga ato kining gamiton sa pagtabang sa uban” (tan-awa sa 1 Mga Taga-Corinto 12).
Human sa kamatayon sa amahan ni Diana, siya ug ang iyang inahan ug duha ka igsoong mga lalaki mikuha og lain-laing mga bahin nga nahiuyon sa ilang mga talento ug mga abilidad, apan ang matag usa nagtrabaho uban sa usa ka komon nga katuyoan: sa pag-atiman sa usag usa. Sa pagbuhat nila niini, ilang gihimo nga ang “ilang kasingkasing nabugkos diha sa pagkahiusa ug diha sa gugma sa usag usa” (Mosiah 18:21).
Si Presidente Henry B. Eyring, Unang Magtatambag sa Unang Kapangulohan, mipasabut: “Ang atong Langitnong Amahan gusto nga ang atong mga kasingkasing mabugkos. Kana nga panaghiusa diha sa gugma dili lamang usa ka mithi. Gikinahanglan kini.”1
Sa Unsa nga Paagi Kita Magkahiusa?
Sa ilang labing maayo nga pagkabuhat sa bato, ang mga Inca wala mogamit og lusong Ilang gipahaum ang tanang mga bato sa pag-ayo nga walay igong distansya sa pagpasulod og usa ka piraso sa papel sa tunga niini. Kining talagsaon nga pagkahaum kaayo nahimong posible tungod kay kining batid nga mga tigtukod nakakita og luna alang sa kada bato ug sa unsang paagi nga kini pormahon sa paghaum sa kinatibuk-ang plano.
Samtang atong tugutan ang Batid nga Tigtukod nga moporma kanato, kita mahimong maghiusa sa usag usa ug ngadto Kaniya.2 Si Presidente Eyring miingon nga kining panaghiusa mahitabo kon kita masulundon sa mga ordinansa ug mga pakigsaad sa ebanghelyo.3
Ang pagdawat sa mga ordinansa sa ebanghelyo ug pagsunod sa mga pakigsaad adunay talagsaon nga impluwensya ngadto sa pamilya ni Diana. Si Diana ug ang iyang manghud nga lalaki, si Emmanuel, mao ang unang nagpamiyembro sa Simbahan. Sa wala pa nianang panahona, si Diana nag-ingon, ang iyang pamilya magsige og away. Siya nasayud nga ang iyang mga ginikanan gusto og labing maayo alang kaniya ug sa iyang igsoong mga lalaki, apan sila estrikto.
“Kami mibati nga mas nahadlok kay sa mahigugma sa akong papa,” siya miingon.
Pipila ka mga bulan human nga siya nabunyagan, ang iyang papa ug iyang magulang nga lalaki, si Richard, nagpamiyembro sa Simbahan, labaw sa usa ka tuig ang milabay misunod ang iyang inahan.
“Ang akong papa nausab,” miingon si Diana kabahin sa pagkakabig sa iyang amahan. “Kon kami makahimo og sayop, siya makig-istorya kanamo kabahin niini. Kami adunay diyutay nga mga argumento. Dihay mas daghang panag-uyon sa among panimalay.”
Ang pagpakigsaad sa pagsunod ni Jesukristo nakapaduol kanila ngadto Kaniya ug sa usag usa. Sila adunay komon nga katuyoan: mahimong usa ka mahangturon nga pamilya. Usa ka tuig human mabunyagi ang mama ni Diana, ang pamilya na-sealed sa templo.
“Usa kadto ka nindot nga kasinatian,” miingon si Diana. “Dili nako mapasabut unsa ang akong gibati sa dihang kami naglakaw paingon sa sealing room ug nakita ang akong mga ginikanan didto. Dili ko gusto nga mobiya.
Pagkahuman, ang pamilya gani mibati og mas dakong tinguha sa pagsunod sa mga sugo aron sila mahimong mahangturon nga pamilya. Wala pay usa ka semana samtang buhi pa ang papa ni Diana, siya nagtudlo og leksyon sa family home evening kabahin sa pagkahiusa sa pagsunod sa ilang mga pakigsaad aron sila mag-uban hangtud sa kahangturan. “Walay makasigurado nga buhi pa kita inigka-ugma,” siya miingon. “Kita kinahanglan nga mangandam aron kon adunay bisan usa kanato mamatay, kita magkauban gihapon.”
Ang Pagsunod sa mga Pakigsaad Makapausab sa mga Kasingkasing
Si Diana nakakat-on sa unsa nga paagi nga ang pagtambayayong sa paghupot sa mga pakigsaad sa ebanghelyo makapahiusa sa pamilya, ug siya mapasalamaton nga siya nakat-on nga wala pa maulahi ang tanan.
Ang katapusang gisulti sa iyang papa ngadto kaniya sa iyang pagpadulong sa eskwelahan sa adlaw nga siya namatay mao, “Te quiero mucho, Dianita.” (Gihigugma ko ikaw pag-ayo, gamay nga Diana.)
Si Diana adunay pagsalig sa saad sa Ginoo nga ang iyang pamilya magkauban pag-usab hangtud sa kahangturan kon sila magpadayon sa paghupot sa ilang mga pakigsaad.
“Nakakita ako giunsa sa Langitnong Amahan nga kami mas nagkahiusa tungod sa pagsunod sa Manluluwas,” siya miingon. “Kinahanglan ako nga motuo nga Siya usab motuman sa Iyang saad nga kami magkauban hangtud sa kahangturan kon kami mosunod sa mga sugo.”
“Nasayud ako nga ang among pamilya sa tinuoray mapasalamaton sa kahangturan sa balaan nga plano.
“Nasayud ko nga maangkon namo ang mahangturong himaya nga gisaad sa Langitnong Amahan. Pinaagi lamang sa paglahutay hangtud sa kahangturan, pagbutang sa among mga kasingkasing ngadto sa mga butang sa Dios, ug sa pagtinabangay sa usag usa among makab-ot ang among tumong nga mahimong mahangturon nga pamilya.”
Human sa kamatayon sa iyang papa, si Diana Vasquez nakat-on og usa ka butang nga importante kabahin sa panaghiusa gikan sa mga bato sa pader sa Sacsayhuamán, 500 ka tuig nga kota sa Incan sa Peru.
Sa tuo: Si Diana, ang iyang mama, si Duvalie, ug ang iyang duha ka igsoon nga mga lalaki, sila si Richard ug Emmanuel (sa ibabaw), nagkasuod samtang sila nagsuporta sa usag-usa sa pagsunod sa mga sugo.
Mga litrato pinaagi ni Adam C. Olson, gawas kon gipahibalo
Litrato ni Presidente Eyring pinaagi ni Craig Dimond