Pagtudlo sa Atong mga Anak gikan sa mga Kasulatan

Ni Cheryl C. LantMiserbisyo sugod Abril 2005 hangtud 2010 isip kinatibuk-ang presidente sa Primary

Ang mga bata adunay talagsaon nga kapasidad sa pagsabut sa mga baruganan sa ebanghelyo.

Bag-ohay pa lang nakighimamat ako sa usa ka grupo sa mga tawo gikan sa laing tinuohan kinsa nakadayeg kaayo sa kaandam sa mga miyembro sa Simbahan sa pagpakigbahin sa atong panahon ug mga talento sa pagtabang sa uban. Sila gustong masayud kon giunsa nato pagtudlo ang mga anak nga mahimong sama niini.

Gipasabut nako nga ang pamilya mahinungdanon ngadto sa plano sa atong Langitnong Amahan ug ang mga ginakanan adunay dakong responsibilidad sa pagtudlo ug pagbansay sa ilang mga anak. Ang mga lider ug mga magtutudlo yanong mosuporta sa mga paningkamot sa mga ginikanan.

Ang tumong sa tanan namong pagtudlo, miingon ako kanila, mao ang pagbuhat unsa ang giingon ni Propeta Joseph Smith sa dihang siya gipangutana giunsa niya pagdumala ang Simbahan: “Ako mitudlo kanila sa husto nga mga baruganan, ug gidumala nila ang ilang mga kaugalingon.”¹

“Ug unsa kadtong mga baruganan?” nangutana ang grupo. “Asa nimo kini makita?”

“Diha sa mga pulong ni Kristo,” mitubag ko.

Magbusog sa mga Pulong ni Kristo

Si Nephi nag-awhag kanato sa “pagbusog sa mga pulong ni Kristo; kay tan-awa, ang mga pulong ni Kristo magtug-an kaninyo sa tanan nga mga butang nga inyong buhaton” (2 Nephi 32:3).

Ang pulong sa Dios makita diha sa mga kasulatan. Kon atong tugutan ang atong mga anak sa espritwal nga paagi, kita motudlo kanila gikan sa mga kasulatan ug motabang kanila sa pagkat-on sa pagbusog gikan niadtong sagradong mga pahina sa ilang kaugalingon.

Ang mga bata adunay talagsaon nga kapasidad sa pagsabut sa mga baruganan sa ebanghelyo. Kinsa kadtong mobasa sa mga kasulatan sa ilang sayo nga katuigan sa kasagaran mohimo og pasalig sa ilang kaugalingon sa pagsunod sa mga baruganan nga gitudlo ngadto kanila. Mao kana ngano nga ang mga anak kinahanglan adunay ilang kaugalingon nga mga kasulatan. Sila kinahanglan nga makat-on gikan sa mga kasulatan unsa ang gusto sa ilang Langitnong Amahan nga ilang mahibaloan ug buhaton.

Pagtudlo sa mga Anak gikan sa mga Kasulatan

Adunay daghang maayong mga pamaagi sa pagtudlo sa mga anak gikan sa mga kasulatan. Nakita nako nga kining sumbahan piho nga epektibo human og basa sa usa ka kasulatan:

Klaro nga ilhon ang doktrina.
Tabangi ang mga anak nga makasabut sa doktrina.
Tabangi sila nga magamit ang doktrina sa ilang kinabuhi.
Awhaga sila sa pag-ampo alang sa usa ka saksi sa Espiritu nga ang ilang nakat-unan tinuod.

Gamiton nato ang Moroni 10:4 isip usa ka panig-ingnan. Pananglit usa ka inahan ang naghatag og leksyon sa family home evening. Siya magsugod pinaagi sa paghangyo sa miyembro sa pamilya sa pag-abli sa ilang mga kopya sa Basahon ni Mormon ug magbasa sa bersikulo: “Ug kon kamo makadawat niini nga mga butang, ako moawhag kaninyo nga kamo mangutana sa Dios, ang Amahan sa Kahangturan, sa ngalan ni Kristo, kon kini nga mga butang dili ba tinuod; ug kon kamo mangutana sa kinasingkasing, uban sa tinuod nga katuyoan, nga may hugot nga pagtuo kang Kristo, siya mopakita sa kamatuoran niini nganha kaninyo, pinaagi sa gahum sa Espiritu Santo.”

Dayon siya modala sa pamilya sa upat ka mga lakang nga gilatid sa ibabaw.

Ilha ang Doktrina. Siya mangutana: “Unsa ang gustong ipabuhat kanato sa Langitnong Amahan niini nga bersikulo? Ug unsa ang panalangin nga Iyang gisaad kanato kon kita mobuhat unsa ang Iyang gisugo?” Ang pamilya mohisgut sa mga pangutana ug moila nga ang Langitnong Amahan gusto nga kita mobasa sa kasulatan ug dayon mag-ampo nga may hugot nga pagtuo, uban sa kinasingkasing nga tinguha nga masayud sa kamatuoran unsa ang atong nabasa. Ang Langitnong Amahan nagsaad sa pagtubag sa atong pag-ampo pinaagi sa paghatag kanato og usa ka saksi sa kamatuoran pinaagi sa Espiritu Santo.

Sabta ang Doktrina. Sunod ang inahan mopakigbahin sa istorya ni Joseph Smith, kinsa sa dihang nagbasa sa Biblia nga siya mahimong “mangayo sa Dios” (Santiago 1:5), nag-ampo asa nga simbahan moapil. Siya adunay hugot nga pagtuo nga ang iyang pag-ampo pagatubagon. Samtang siya nag-ampo, ang Amahan ug ang Anak nagpakita ngadto kaniya. Siya nagpahinumdom sa pamilya nga, siyempre, ang Langitnong Amahan ug si Jesukristo dili magpakita sa tanan kinsa nag-ampo, apan ang Langitnong Amahan motubag sa kinasingkasing nga mga pag-ampo sa paagi nga Iyang gihunahuna nga labing maayo.

Gamita ang Doktrina. Usa ka anak nangutana, “Kini ba nagpasabut nga ang Langitnong Amaha motubag sa akong mga pag-ampo?” Ang inahan mitubag, “Oo. Sa Moroni 10:4 nagpasabut nga pinaagi sa pagtuon ug pag-ampo kita mahimo nga masayud sa kamatuoran sa tanan nga mga butang.” Ang pamilya dayon mihukom unsaon sa pagsulay ang saad ni Moroni.

Pangayo og Saksi. Ang inahan mipamatuod ug mipakigbaghin kon giunsa niya pagkasayud nga kining kasulatan tinuod. Siya nagtapos sa leksyon pinaagi sa pagsiguro sa pamilya nga samtang sila mobuhat unsa ang gisulti ni Moroni—magtuon og usa ka baruganan sa ebanghelyo uban sa usa ka tinguha nga masayud kon kini tinuod—sila makaangkon og kasigurohan sa kamatuoran pinaagi sa saksi sa Espiritu.

Ang mga Anak Gitudloan mahitungod sa Ginoo

Samtang atong tudloan ang atong mga anak sa paghigugma sa mga kasulatan ug pagkat-on gikan niini, kita nagbutang sa ilang mga kasingkasing ug mga kamot og usa ka talagsaon nga tinubdan sa kalig-on ug giya hangtud sa ilang tibuok kinabuhi. Atong makita nga natuman ang saad nga mabasa sa 3 Nephi 22:13: “Ang tanan ninyo nga mga anak pagatudloan mahitungod sa Ginoo; ug hilabihan ang kalinaw sa inyong mga anak.”

Bong-bong sa Kasulatan

Ang mga ABC ug mga 1-2-3. Ang akong mga anak gusto kaayo nga makat-on sukad sa gagmay pa sila. Tungod niini, kanunay ako nga maningkamot sa pagtabang sa ilang edukasyon sa panimalay. Nagsab-it ako og mga poster ug mga pulong nga malantaw, nagbasa og daghang mga libro, ug nangita sa matag oportunidad sa pagtudlo. Dayon usa ka adlaw nakaamgo ko nga wala ako makahatag og sama nga atensyon sa ilang pagtuon sa ebanghelyo.

Tungod kay ang bong-bong sa akong balay andam na nga maayong gamiton alang sa edukasyon, yano akong mihukom nga mas mogamit niini. Usa ka bong-bong diha sa dapit sa duwaanan sa mga bata ingon og nindot kaayo nga lugar nga butangan sa art sa ebanghelyo—sa ilang kaugalingong mga drawing o mga biswal nga giaprubahan sa Simbahan. Akong gipapilit ang mga litrato sa kinoloran nga construction paper sa dili pa kini ibutang diha sa bong-bong. Ubos sa kada usa, naglakip ako og yano, angay sa edad nga mga sinopsis sa istorya. Ang among “bong-bong sa kasulatan,” nga maoy tawag niini sa akong mga anak, dali nga nahimong paborito nga dapit sa balay. Mipili ko og 14 ka importante nga mga istorya sa Basahon ni Mormon ug mipakita niini nga sunod-sunod. Kini nakapadali nga masabtan sa akong mga anak ang importanting mga panghitabo ug mga konsepto samtang sila nangutana, ug among hisgutan unsa ang nahitabo diha sa mga kasulatan. Nasayud ako nga ang among bong-bong sa kasulatan nakahimo og epekto sa dihang akong nadunggan ang akong anak nga lalaki tukma gayud nga nagpasabut sa usa sa mga litrato ngadto sa usa ka kadula.

Isip mga ginikanan, naggahin kita og daghang panahon sa pagtabang sa atong mga anak nga makat-on unsa ang ilang kinahanglan nga mahibaloan aron magmalampuson sa eskwelahan. Mas importante, atong kinahanglan nga hinumduman ang pagtabang sa atong mga anak nga makat-on ug motubo sa ebanghelyo.

Kathleen Parrish Smith, Utah, USA

Matag Adlaw nga Panultihon gikan sa Kasulatan uban sa mga Preschooler

Isip usa ka inahan sa gagmay nga mga bata, ako nagsugod sa pag-ampo aron makahibalo unsa ang kinahanglan nga makat-unan sa akong mga anak. Ang tubag sa kanunay mao nga ang labing importante nga butang mao ang pagtudlo sa sukaranang mga kamatuoran sa ebanghelyo ug ang abilidad sa pagtrabaho. Kada buntag ang akong bana ug ako mopakigbahin og espiritwal nga panultihon ug sa among mga pagpamatuod ngadto sa among gagmay nga mga anak. Mokabat lamang og 30 minutos sa pagpangandam matag Dominggo, kami makatapok og igo sa usa ka semana nga mga materyal. Mga litrato sa art sa ebanghelyo, mga awit sa Primary, Mga Istorya sa Daang Tugon, ug mga ideya gikan sa mga magasin sa Simbahan makatabang gayud.

Art sa Ebanghelyo. Tungod kay ang pagtudlo uban sa mga litrato epektibo kaayo, nakita nako nga kini makatabang sa pag-imprinta og mga kopya niini gikan sa gospelart.lds.org. Sa niana nga paagi kita makahatag og imahen ngadto sa atong mga bata, ug ila kining mabasa ug mahikap samtang kita maghisgut kabahin sa unsa ang atong nakita.
Mga Awit sa Primary. Usahay kita maningkamot sa pagkat-on og dungan og bag-ong kanta sa Primary, ilabi na ang aksyon ug ikid-ikid nga mga awit.
Mga Istorya sa Daang Tugon. Kita mobasa lamang og usa ka pahina kada adlaw. Sa dili pa mobasa, kita sa kasagaran adunay biswal nga tabang o paggamit og butang sa leksyon [object lesson] sa paghatag og gibug-aton sa mga istorya nga atong nahisgutan na. Pananglitan, usa ka adlaw ako mibutang og pula nga pangkolor sa pagkaon ngadto sa tubig ug nangutana kanila kon sila nakahinumdom ba og panahon sa mga kasulatan sa dihang ang Ginoo mipapula sa kolor sa tubig.
Mga Magasin sa Simbahan. Usahay kita mopakigbahin og mensahe pinaagi sa kalihokan nga may kalabutan sa ebanghelyo. Sama pananglit, kami sa makausa miimprinta og daghang mga kopya sa litrato nga nagpakita sa mga bata nga nanghatag og mga pagkaon sa mga tigulang. Kaming tanan, naghisgut kabahin sa kaimportante sa paghigugma ug pagserbisyo sa “mga lola ug mga lolo.” Dayon ang among nag-edad og usa ka tuig nagkuris-kuris sa mga litrato samtang ang among preschooler nangita sa mga gitago nga mga butang nga anaa niini.

Ang pagpakigbahin og espiritwal nga panultihon molungtad lamang og mubong panahon, apan ang epekto molungtad og dugay. Ang among preschooler usahay mokuha og magasin ug mosurprisa kanako sa pagribyu sa pipila ka mga istorya ug mga baruganan sa ebanghelyo nga among nakat-unan. Samtang ang among mga anak nagtubo, kami nagpadayon sa among mga debosyonal kada buntag inigpamahaw—bisan sa busy nga mga buntag, kami kanunay mopakigbahin og mubo nga mensahe samtang sila mamahaw.

Mapasalamaton ako sa daghang taas og kalidad nga mga materyal nga gisangkap sa Simbahan sa pagtabang kanato nga magpabilin ang atong mga anak nga maduol sa Espiritu. Samtang kami nangandam matag semana, kami mohangup sa personal nga pagpadayag nga nadawat sa pagtudlo sa among mga anak. Ug kami mas naduol sa Langitnong Amahan samtang kami nangita sa labing maayo nga paagi sa pagpaduol sa among mga anak ngadto Kaniya.

Alejandra Adams, Virginia, USA

Litrato ni Sister Lant © Busath.com; paghulagway sa litrato pinaagi ni John Luke; gikan sa wala: Si Lehi ug ang Iyang Katawhan Miabut sa Yuta nga Saad, ni Arnold Friberg, © 1951 IRI; Si Noe ug ang Arka uban sa mga Hayop, ni Clark Kelley Price, sa maayong kabubut-on sa Church History Museum; Si Joseph Smith Nangita og Kaalam gikan sa Biblia, ni Dale Kilbourn, © 1975 IRI; Ang Maayong Samarianhon, ni Walter Rane, sa maayong kabubut-on sa Church History Museum; Ug ang Akong Kalag Gigutom—Enos, ni Al R. Young; Si Elijah Nagpakita sa Templo sa Kirtland, ni Daniel Lewis

Gikan sa ibabaw padulong sa wala: Si Nephi Nagbadlong sa Iyang Masinupakon nga Igsoon nga mga Lalaki, ni Arnold Friberg, © 1951 IRI; Si Alma Nagbunyag sa Katubigan sa Mormon, ni Arnold Friberg, © 1951 IRI; Ang Pagkakabig ni Alma, ni Gary Kapp, © 1996 IRI; Duha ka Libo nga Batan-ong mga Mangugubat, ni Arnold Friberg, © 1951 IRI; Si Moroni Naglubong sa mga Palid, ni Tom Lovell, © IRI; Si Rebekah sa Atabay, ni Michael Deas, © 1995 IRI; paghulagaway sa litrato pinaagi ni Phyllis Luch, © 1987 IRI