Mga Ideyasa Family Home Evening

Kini nga isyu naglangkob og mga artikulo ug mga kalihokan nga mahimong magamit alang sa family home evening. Ang mosunod mao ang pipila ka mga ehemplo.

“Pagpakatakus sa Pagsulod sa Templo,” pahina 12: Isip kabahin sa leksyon, mahimo nimong hisgutan ang mga rekomend sa templo nga mga hilisgutan nga gilista diha sa artikulo. Dapita ang mga sakop sa pamilya sa pagpamalandong niadto nga mga hilisgutan samtang magbasa ka niini. Awhaga ang matag usa nga magmahimong takus sa pagsimba didto sa sulod sa templo.

“Pagkakaplag sa Atong Kaugalingon diha sa Damgo ni Lehi,” pahina 26: Ribyuha ang artikulo uban sa imong pamilya. Sa panapos, si Presidente Boyd K. Packer, Presidente sa Korum sa Napulog Duha ka mga Apostoles, naghangyo kanato sa pagbasa og usab sa 1 Nephi 8 ug sa uban nga mga bersikulo diha sa Basahon ni Mormon nga nagtudlo sa plano sa kaluwasan. Ikonsiderar ang pagbasa niini nga mga kasulatan ug ang pagpamalandong sa saad nga gihatag ni Presidente Packer.

“Ang Ginoo Mibutang Kaniya sa Among Agianan,” pahina 48: Samtang ikaw magbasa niini nga istorya, dapita ang imong pamilya sa pagpaminaw ug dayon hisguti ang rason nga ang tawo diha sa sakyanan mihukom sa pagpaminaw sa mga leksyon sa mga misyonaryo. Ikonsiderar ang pag-role-play o paghisgut sa mga paagi sa pagbuhat ingon nga ang Manluluwas mobuhat diha sa nagkalain-laing mga sitwasyon.

“Ang 10-Anyos nga Magtutudlo,” pahina 58: Human sa pagpakigbahin sa istorya, ikonsiderar ang pagdapit sa mga sakop sa pamilya sa paghunahuna og mga oportunidad diin mahimo sila nga usa ka magtutudlo ug unsay mga hilisgutan sa ebanghelyo nga gusto nilang itudlo. Sa paghatag kanila og usa ka oportunidad sa pagpraktis og tudlo, mahimo ka nga maghimo og usa ka eskedyul nga magtugot sa mga sakop sa pamilya sa pagtudlo diha sa family home evening o uban nga mga kalihokan.

Nagtubo nga mga Pagpamatuod—ug mga Pundo sa Misyon

Human madungog ang mga lider sa Simbahan nga nag-awhag sa mga kabatan-onan nga magtigum og kwarta alang sa full-time nga misyon, nagpahigayon kami og usa ka espesyal nga family home evening uban sa among duha ka anak, 10 anyos nga si Allana ug 7 anyos nga si Ulric. Among gihisgutan ang kaimportante sa pagtigum alang sa full-time nga misyon, dayon mipakita kanila og mga alkansiya aron tabangan sila sa pagsugod og tigum.

Human nianang gabhiona dili katuohan kon sa unsang paagi nga ang kwarta natigum. Si Ulric nagkolekta ug nagtigum sa matag sensilyo nga iyang makit-an; ang duha ka mga bata nagtigum sa kwarta nga ilang madawat gikan sa mga paryente. Sulod sa tulo ka bulan si Ulric nakatigum og igong ibayad alang sa iyang unang bulan sa iyang misyon, ug si Allana hapit makaabut. Ang mga bata usab mosiguro nga mobayad og ikapulo sa kwarta nga ilang madawat, ug nakita sa among pamilya ang dakong mga panalangin samtang ang ilang mga pagpamatuod sa pagserbisyo ug pagsakripisyo nakagamot ug nagtubo.

Luiz ug Andreia Pereira, São Paulo, Brazil

Ang Inyong Paborito nga Home Evening

Pagpadala og usa ka deskripsyon sa inyong paborito nga family home evening ngadto sa [e-mail].