Doktrina ug mga Pakigsaad 1:38

Kinahanglan kitang mopatalinghug sa tanang mga pulong sa Ginoo nga gihatag pinaagi sa Iyang mga propeta.

“Unsa nga Ako ang Ginoo namulong, Ako namulong, ug Ako dili mangayo og pasaylo alang sa akong kaugalingon; ug bisan pa ang mga langit ug ang yuta mahanaw, ang akong mga pulong dili mahanaw, apan ang tanan matuman, bisan pinaagi sa akong kaugalingon nga tingog o pinaagi sa tingog sa akong mga sulugoon, kini managsama ra.”

Unsa nga Ako ang Ginoo namulong

Aniay pipila ka butang nga gitudlo sa mga kasulatan mahitungod sa mga pagpadayag gikan sa Dios:

Ang mga tawo mabuhi pinaagi sa matag pulong nga magagula sa ba-ba sa Dios (tan-awa sa Deuteronomio 8:3; Mateo 4:4; D&P 98:11).
“Diin walay panan-awon, ang katawhan nagasalikway sa pagpugong” (Mga Proverbio 29:18).
Ang Ginoo dili magbuhat sa bisan unsa gawas kong ang iyang tinago ipadayag Niya sa Iyang mga alagad, ang mga manalagna (tan-awa sa Amos 3:7).
Ang Dios mohatag ngadto sa mga anak sa tawo og pagtulun-an ngadto sa lain nga pagtulun-an, lagda ngadto sa lain nga lagda (tan-awa sa 2 Nephi 28:30; D&P 98:12).
Ug bisan unsa ang ilang ipamulong kon nadasig diha pinaagi sa Espiritu Santo mahimo nga pulong sa Ginoo (tan-awa sa D&P 68:4).

Ang Akong mga pulong dili mahanaw

Ang mga panagna ug mga panalangin nga gipamulong sa mga propeta sa Dios dili matuman kanunay sa mao nga higayon o sa pamaagi nga gilauman sa mga tawo. Paghunahuna og mga ehemplo mahitungod sa mga panagna ug mga panalangin nga nangatuman sa wala damha nga higayon ug sa wala damha nga paagi, ug isulat sa inyong journal kon sa unsang paagi kini nga baruganan magamit sa inyong kinabuhi.

Pinaagi sa akong kaugalingon nga tingog o pinaagi sa tingog sa akong mga sulugoon

“Dili kini basta-basta lamang nga butang, akong mga kaigsoonan, ang pagkaadunay propeta sa Dios sa atong taliwala. Katalagsaon ug katingalahan sa mga panalangin nga moabut sa atong mga kinabuhi samtang maminaw kita sa mga pulong sa Ginoo nga gihatag ngari kanato pinaagi kaniya. … Kon kita maminaw sa tambag sa Ginoo nga gipahayag pinaagi sa mga pulong sa Presidente sa Simbahan, ang atong pagsanong kinahanglan nga positibo ug dili langayon. Ang kasaysayan nagpakita nga adunay kasiguroan, kalinaw, kauswagan ug kalipay sa pagsanong sa mapanagnaong mga tambag sama sa gibuhat ni Nephi sa karaan: ‘Ako moadto ug mobuhat sa mga butang nga ang Ginoo nagsugo’ (1 Ne. 3:7).”

Elder M. Russell Ballard sa Korum sa Napulog Duha ka mga Apostoles, “His Word Ye Shall Receive,” Liahona, Hulyo 2001, 80.

Dili nako ipakawalay labut ang akong kaugalingon

“Kon ang mga hinawayon mamugal-bugal, kon ang mga kaaway mobiay-biay ang mga matahapon mopakaubos niini nga buhat, miabut sa akong hunahuna kini nga talagsaong pulong sa Labawng Makagagahum. Ang Ginoo dili mopakawalay labut sa Iyang kaugalingon kon unsa ang Iyang gipamulong o gibuhat. Ang matag saad kinahanglang mahuptan, ang matag panagna matuman.”

President Gordon B. Hinckley (1910–2008), “The Order and Will of God,” Tambuli, Ago. 1989, 3.