Alang sa Usa ug alang sa Tanan
Ang mga kabatan-onan sa Frankfurt Germany Stake nasayud kon unsaon sa pagbarug nga maghiusa ug, kon gikinahanglan, unsaon sa pagbarug nga mag-inusara.
Sa dihang si Charlotte Baumann mibarug aron sa paghatag sa iyang pagpamatuod sa katapusan sa Frankfurt Germany Stake youth conference, mipaambit siya og kasinatian nga ikasaysay usab sa ubang mga kabatan-onan.
“Ang akong klase sa biology naghisgot mahitungod sa mga epekto sa alkohol diha sa lawas,” siya miingon. “Akong nahibaloan nga ang alkohol usa ka hilo, hilo sa mga ugat, ug ang mga tawo moinom niini tungod lamang kay nagtuo sila nga kini makalingaw. Ang klase dili makasabut niana, ug dayon mihatag ako sa akong opinyon niini, ug kana naggiya sa pangutana nga ngano man. Usa ka batang lalaki nangutana kanako kon ang akong mga ideya susama ba sa mga Mormon’, ug dayon miingon ako nga, ‘Bitaw, usa ako ka Mormon.’ Sa una wala siya motuo kanako, ug naghunahuna ko nga maingon og kataw-anan kadto.”
Ang mga pangutana nagpadayon, bisan gani hangtud sa biranda human sa klase, diin ang mao nga hunahuna miabut kang Charlotte. “Nakahinumdom ako sa kalit nga aduna diay akoy gipamubo nga bersyon sa Alang sa Kalig-on sa Kabatan-onan, ug gipasa nako kini palibut ug gipabasa kini sa mga tawo. Sa akong hunahuna ang pipila kanila nakasabut na kanako, ug tingali kini adunay pipila ka epekto sa usa o sa uban kanila.”
Sama ni Charlotte, ang ubang mga batan-on sa Frankfurt Germany Stake kanunay nga nagpaabut sa youth conference ug sa ubang mga kalihokan nga naghatag kanila og oportunidad nga makapaambit og mga kasinatian sama niini. Dinhi niini sila magkapundok, maglingaw-lingaw, ug maglig-on sa usag-usa sa espirituhanong paagi, tungod kay sa ubang mga higayon ang kasagaran kanila kinahanglan nga mag-inusarang mobarug.
Maghiusa sa Pagbarug
Sa youth conference, nga gihimo didto sa Templo sa Frankfurt Germany, ang tanan miangkon nga ang pinakamaayong pagtulun-an panahon sa komperensya mao ang espirituhanong pagkabayaw nga ilang nadawat pinaagi sa panudlo sa ebanghelyo, pagtambong sa templo, ug pagpaambit sa mga pagpamatuod.
Si Benjamin Uhlig mibati nga ang mga kabatan-onan kinahanglan nga maghiusa sa pagbarug sa ingon niini nga paagi. “Usa kita ka komunidad, ug kita hiniusang nakigbatok sa usa ka hilabihan ka dili maayo nga kapanahunan. Mangadto kita sa eskwelahan, ug daghan kaayong gusto nga mokuha sa atong panahon ug mga direksyon. Ang dautang mga impluwensya anaa bisan asa. Apan ang mga kabatan-onan mao ang atong suporta. Naghiusa kaming nakigbatok isip mga kabatan-onan alang sa buluhaton sa Ginoo, ug alang kanako butang kana nga maanindot.”
Dihang si Ida Uhlig naghunahuna mahitungod sa iyang mga higala sa Simbahan, naghunahuna usab siya sa templo. Ang iyang ward dili layo sa templo, mao nga kanunay silang naghimo og mga pagbunyag alang sa mga patay. “Nagtuo ako nga kon kamo magpili man og mga higala, kinahanglan ninyong pilion ang tinuod nga higala kinsa inyo usab nga mga ehemplo. Ang imong mga higala mouban kanimo ngadto sa templo, ug dungan kamong makadawat og espirituhanong mga kasinatian didto.”
“Kanunay nga maanindot ang paghimo og mga bunyag alang sa patay,” ingon si Michael Fiedler, “tungod kay, sa pagkatinuod, ikaw nagtabang sa tanan niadto nga mga tawo. Ang templo sa kanunay mao ang pinakapunto sa komperensya sa kabatan-onan tungod kay ang tanang butang nagpadulong niini.”
Pagbarug nga Mag-inusara
Ang kalig-on nga madawat sa mga kabatan-onan gikan sa usag-usa nagdugang sa ilang mga pagpamatuod sa ebanghelyo, nga usahay masulayan sa matag adlaw sulod sa eskwelahan ug sa ubang mga panahon. Ilang naandan ang pagbarug alang sa mga sumbanan sa Simbahan.
“Nag-inusara ako nga miyembro sa Simbahan sa akong grado,” miingon si Jonatan Fingerle. “Ug karon bisan asa man ako moadto, ako mao kanunay ‘ang Mormon.’ Kinahanglan nakong hisgutan ang mahitungod niini ug magpamatuod diha sa klase, atubangan sa akong klase sa ethics, diin tataw kaayo nga walay bisan usa nga nagtuo sa ebanghelyo. Ang nakanindot kabahin niini mao nga sa pagkahuman, bisan gani panahon sa break, ang mga tawo miduol ug nangutana kanako og mga pangutana ug sa tinuod makapakita gayud ako sa pagpamatuod nga anaa kanako.”
Usahay ang padayon nga pagtuman sa mga sumbanan sa Simbahan mahimo nga usa ka subo nga kasinatian. Si Vincent Newsome sa kasagaran mag-inusara sa paghupot sa balaod sa kaputli. “Ang akong mga higala sa eskwelahan nagtuo nga katingad-an kaayo nga ako magpabilin nga putli, tungod kay kana dili importante sa ilang kinabuhi, ug sa sayo sa ilang kinabuhi lahi ang gipangtudlo kanila sa ilang mga ginikanan. Ang pipila ka mga inahan modala lang dayon sa ilang mga anak nga babaye ngadto sa doktor kon mag-edad na sila og 14 aron maresitahan nga dili sila momabdos.”
Apan si Vincent nasayud sa gahum nga moabut pinaagi sa pagsunod sa mga kasugoan sa Ginoo. “Ang pagsunod sa balaod sa kaputli naghimo kanako nga mas lig-on. Mahimo nimong supakon kini, apan kini walay ikatabang, kay kon ikaw mosupak niini ug monunot sa mga tawo sa kasagarang linihokan sa kalibutan, niana nagsunod-sunod ka lamang ug wala maghunahuna kon unsa ang imong gipangbuhat. Nasayud ako nga mas maayo ang pagpuyo nga putli, kay kon dili man gani imo lamang nga gipaubos ang imong kaugalingon.”
Sa pagbarug sa imong mga sumbanan sa Simbahan, usahay posible nga mahimo nimong mga suod ang imong mga kaaway. Sa pagsugod niya og eskwela, si Carina Schultes gidaug-daog ug gipakaubos sa uban. “Dili nila madawat nga ako adunay relihiyon, adunay akong mga sumbanan, nga ako dili manigarilyo, dili moinom og alkohol. Sa sinugdanan dili sila makadawat niini, apan maayo na lang kay paglabay sa upat ka tuig gidawat ra nila kini mao nga nagtuo sila nga maayo kini ug gisuportahan nila ako ug mobadlong sa uban sa dili paghilabut kanako.”
Pagpangita og Kalig-on
Ang Kalig-on moabut kanato sa lain-lain nga daghang paagi. Si Benjamin Rumbach nakakaplag og kalig-on pinaagi sa paborito niya nga kasulatan, 1 Nephi 3:7. “Kana nagpakita lamang sa determinasyon ni Nephi ug sa kaisug nga gusto niyang maangkon alang sa ebanghelyo. Nakatabang kini sa dihang gikinahanglan nako ang kalig-on sa pagtuman sa mga kasugoan ug sa mas maayo nga pagharong sa mga tintasyon. Nasayud ako nga mahimo nakong sundon ang matag kasugoan kon gusto gayud nako.”
Alang ni Charlotte Baumann, ang kalig-on miabut sa porma sa usa ka kard nga mahimong isulod sa pitaka nga Alang sa Kalig-on sa Kabatan-onan: “Usahay dili ka kahibalo kon unsaon nimo sa pagpasabut ang pipila ka butang, apan anaa diha gihisgutan ang mga hilisgutan nga haum alang sa mga kabatan-onan. Ug kana usa gayud ka dako nga tabang. Tataw kaayo nakong namatikdan nga importante diay ang kanunay nga pagbarug alang sa akong mga baruganan, bisan og ang mga tawo naghunahuna nga lahi ra kini o dili makasabut, ug kana mas nakapalig-on kanako.”
Ang kalig-on nga gibati ni Ida Uhlig panahon sa youth conference ug sa templo nagbayaw kaayo kaniya. “Kanunay nakong gibati ang Espiritu Santo. Diha gayud niana nga komperensya sa kabatan-onan, ang Espiritu anaa kanimo, ug imo kining mabatyagan sulod sa templo. Mapasalamaton ako kang Jesus, malipay ako nga makig-uban Kaniya pag-usab,” siya miingon.
Ug alang kang Carina Schultes, ang pagkamakanunayon ug ang pag-ampo nakahimo kaniya nga kanunayng lig-on: “Akong nakat-unan nga bisan og ang daghang pagpanintal naglibut kanimo, dili ikaw madali-dali sa paghunong. Kinahanglan ikaw anaa nga makanunayon, sa paggunit og hugot sa pulong sa Dios aron ikaw dili malaglag. Sa Doktrina ug mga Pakigsaad 88:126, nag-ingon kini nga kinahanglang mag-ampo gayud kita. Kon kita adunay mga problema o nanginahanglan og tabang, makadawat kita og tubag.”
Manag-uban man kitang magbarug o mag-inusara, ang kabatan-onan sa Frankfurt Germany Stake nagtigom og kalig-on diha sa ebanghelyo ni Jesukristo. Ug kini nga kalig-on mopabarug kanila sa maayo nga dapit hangtud sa katapusan sa ilang kinabuhi.
Charlotte: “Nakahinumdom ako sa kalit nga aduna diay akoy … Alang sa Kalig-on sa Kabatan-onan, ug gipasa ko kini palibut ug gipabasa kini sa mga tawo.”
Benjamin U.: “Naghiusa kaming nakigbatok isip mga kabatan-onan alang sa buluhaton sa Ginoo, ug alang kanako butang kana nga maanindot.”
Ida: “Nagtuo ako nga kon kamo magpili man og mga higala, kinahanglan ninyong pilion ang tinuod nga higala kinsa inyo usab nga mga ehemplo. Ang mga higala mouban kaninyo ngadto sa templo, ug dungan kamong makadawat og espirituhanong mga kasinatian didto.”
Michael: “Ang templo sa kanunay mao ang pinakapunto sa komperensya sa kabatan-onan tungod kay ang tanang butang nagpadulong niini.”
Jonatan: “Nag-inusara ako nga miyembro sa Simbahan sa akong grado. Ug karon bisan asa man ako moadto, ako mao kanunay ‘ang Mormon.’ Kinahanglan nakong hisgutan ang mahitungod niini ug magpamatuod diha sa klase, atubangan sa akong klase sa ethics, diin tataw kaayo nga walay bisan usa nga nagtuo sa ebanghelyo.”
Vincent: “Ang akong mga higala sa eskwelahan nagtuo nga katingad-an kaayo nga ako magpabilin nga putli, tungod kay kana dili importante sa ilang kinabuhi, ug sa sayo sa ilang kinabuhi lahi ang gipangtudlo kanila sa ilang mga ginikanan.”
Carina: “Akong nakat-unan nga bisan og ang daghang pagpanintal naglibut kanimo, dili ikaw madali-dali sa paghunong.”
Usa ka talan-awon sa Friedrichsdorf, Germany, duol sa Frankfurt.
Pasquele
Benjamin R.
Ang pagbasa kabahin sa Unang Panan-awon diha sa Joseph Smith—Kasaysayan 1:15–24 nakatabang ni Benjamin sa pagpasabut ngadto sa usa ka tawo mahitungod sa Pagpahiuli.
Gilitratohan ni David A. Edwards
Nakakita ako og Kahayag, ni Jon McNaughton