Mapasigarbuhon Ako Kanimo

Richard Domeng Asante, Ghana

Isip misyonaryo sa Ghana, kinamuton namo sa paglaba ang among mga sinina inig ka preparation day. Si Elder Moss, akong kompanyon nga bag-ohay lang nga miabut gikan sa Estados Unidos, wala makasulay og ingon niini nga pagpanglaba. Apan isip usa ka lumad nga taga Ghana, ako anad na niini.

Kada Lunes si Elder Moss monus-nos sa iyang mga sinina, apan dapit sa tunga-tunga sa iyang paglaba, ang iyang mga kamot ug mga lutahan sa tudlo magsugod na sa pagdugo. Gikinahanglan dayon nakong mopuli sa iyang gibuhat, agig dugang sa paghuman sa kaugalingon nakong gibuhat.

Usa ka Lunes nga panahon na sa pagpanglaba, si Elder Moss ingon og nagmagul-anon. Nasamad ang akong kamot sa miaging adlaw, ug nahibalo siya nga dili ako makatabang kaniya sa iyang labhanan. Ako sab dili makalaba sa akong mga labhunon. Gisugdan niya ang iyang pagpanglaba, apan sama sa gihapon, gikinahanglan niya ang tabang pag-abut sa tunga-tunga sa trabaho.

Tungod kay dili man ako makatabang sa akong kompanyon sa aktwal nga paglaba, gidasig nako siya sa paglahutay—nga papahulayon ang iyang mga kamot ug dayon padayong maningkamot. Mihunong siya og makadiyot ug dayon mipadayon. Giingnan nako siya nga makakita ra siya og paagi nga makahuman. Nagngul-ngol gihapon ang iyang mga lutahan sa tudlo, apan mipadayon siya. Sa dihang natapos na ang pagpanglaba, siya miingon, “Mapasigarbuhon ako sa akong kaugalingon. Elder Asante, mapasigarbuhon ka ba kanako?”

“Oo, siyempre mapasigarbuhon ako kanimo,” mitubag ako.

Sa akong paghunahuna niini nga hitabo, akong naamguhan nga ang Langitnong Amahan nasayud sa atong potensyal, apan siya nagsulay kanato aron atong mapalambo ang atong kakugi, pailub, ug kamatinud-anon. Mahimuot siya kanato kon magbuhat kita og matarung nga mga pagpili ug mapamatud-an nga maantus ra diay nato ang atong mga kasakit.

Kon maningkamot kita sa pagtrabaho ug paglahutay sa mga pagsulay nga gihatag kanato, makaingon kita nga, “Amahan sa Langit, Ikaw ba mapasigarbuhon kanako?” Nasayud ako nga ang Langitnong Amahan ug si Jesukristo mahimuot kon kita molahutay ug Sila mosulti kanato niini sa adlaw sa Ilang pag-abi-abi sa atong pagpauli.