Mensahe sa Unang Kapangulohan
Mga Panalangin sa Templo
Nakahinumdom gihapon ako sa dihang ang akong mga ginikanan midala sa among pamilya ngadto sa bag-ong gitukod nga Swiss Temple, ang una sa Europe, aron mahimong usa ka mahangturong pamilya. Ako 16 pa ug kinamanghuran sa upat ka managsoon. Kaming tanan miluhod sa altar aron ma-sealed dinhi sa yuta pinaagi sa gahum sa priesthood, uban sa usa ka talagsaon nga saad nga kami ma-sealed sa kahangturan. Dili gayud ako makalimot niining hilabihang kanindot nga tipik sa panahon.
Isip usa ka batang lalaki nahimuot ako nga kami mitabok sa mga utlanan sa nasud aron ma-sealed isip usa ka pamilya. Alang kanako kini nagsimbolo sa paagi nga ang buluhaton sa templo nagtabok sa mga utlanan sa kalibutan aron sa pagdala og mahangturong mga panalangin ngadto sa tanang mga lumulupyo sa yuta. Ang mga templo sa Ang Simbahan ni Jesukristo sa mga Santos sa Ulahing mga Adlaw tinud-anay nga gitukod alang sa kaayohan sa tibuok kalibutan, dili igsapayan ang nasyonaliad, kultura, o pamaagi sa politika.
Ang mga templo mao ang dili matarug nga saksi nga ang pagkamaayo mopatigbabaw. Si Presidente George Q. Cannon (1827–1901), Unang Magtatambag sa Unang Kapangulohan, kausa miingon, “Ang kada pundasyong bato nga gipahimutang alang sa Templo, ug kada Templo nga nahuman … mopakunhod sa gahum ni Satanas sa yuta, ug modugang sa gahum sa Dios ug Pagkadiosnon.”1
Samtang ang matag templo mopasaka sa impluwensya sa pagkamatarung dinhi sa yuta, ang labing dako nga mga panalangin, siyempre, moabut niadtong kinsa mitambong gayud sa templo. Didto atong madawat ang dugang kahayag ug kahibalo ug maghimo og balaang mga pakigsaad nga, kon sundon, makatabang kanato sa paglakaw sa dalan sa pagkadisipulo. Sa laktud, ang templo nakatudlo kanato kabahin sa sagradong katuyoan sa kinabuhi ug nakatabang kanato nga makakaplag sa atong tinuod nga pisikal ug espiritwal nga mga direksyon.
Kita wala lamang motambong sa templo alang lamang sa atong kaugalingon, hinoon. Matag higayon nga kita mosulod niining sagrado nga mga edipisyo, kita adunay bahin [role] sa gibalaan, matubsanong buluhaton sa kaluwasan nga maanaa sa tanang mga anak sa Dios isip resulta sa Pag-ula sa Bugtong Anak sa Amahan. Kini mao ang walay paghunahuna sa kaugalingon ug balaan nga serbisyo ug kini nagtugot kanato isip mga mortal sa pag-apil sa mahimayaong buluhaton nga mahimong manluluwas sa Bukid sa Zion.
Alang niadtong kinsa dili makatambong sa templo sa karon sa bisan unsa nga rason, moawhag ako kaninyo sa pagbuhat sa tanan sa inyong gahum sa pagkupot og magamit nga rekomend sa templo. Ang rekomend sa templo usa ka simbolo sa atong pagkamatinud-anon ug determinasyon sa pagserbisyo sa Ginoo. Kini mao ang simbolo sa atong gugma alang sa Ginoo, tungod kay gitudlo ni Jesus, “Ang nagabaton sa akong mga sugo ug nagatuman niini, kini siya mao ang nahigugma kanako: ug ang nahigugma kanako pagahigugmaon sa akong Amahan, ug ako mahigugma kaniya, ug magapadayag sa akong kaugalingon ngadto kaniya” (Juan 14:21).
Samtang ang kalibutan nagpadayon nga gipanindot niining sagrado nga mga building nga gipahinungod ngadto sa Ginoo, kini mao ang akong pag-ampo nga atong buhaton ang atong bahin sa pagdala sa langit nga mas maduol sa yuta pinaagi sa pagkahimong takus sa pagkupot og rekomend sa templo ug sa paggamit niini. Samtang ato kining buhaton, ang pagkamatarung siguradong mosaka dili lamang sa atong mga kinabuhi ug mga panimalay apan sa atong mga komunidad ug sa tibuok kalibutan.
Sa wala: MGA LITRATO SA BERN SWITZERLAND TEMPLE PINAAGI NI CHRIS MILLS, Templo sa Hong Kong China pinaagi ni Craig Dimond, Templo sa Copenhagen Denmark pinaagi ni Craig Dimond, ug Templo sa Accra Ghana pinaagi ni Matthew Reier; sa tuo: paghulagway sa litrato pinaagi ni J. Scott Knudsen, usa ka gihiusa nga mga litrato pinaagi ni Craig Dimond ug Charles W. Carter