Kabatan-onan
Usa ka Talan-awon gikan sa Mas Taas nga Nataran
Isip usa ka batan-on daghan ako og mga oportunidad sa paghimo og mga bunyag alang sa patay sa Templo sa San Diego California. Bisan tuod kanunay akong adunay maayo nga kasinatian, usa ka pagbiyahe ang kanunay gayud nakong mahinumduman.
Ako 16 pa, ug ang akong gamay nga manghud nga babaye bag-ohay lamang nga nag-12 ug naghimo sa iyang unang pagbiyahe sa paghimo og mga bunyag alang sa patay. Tungod kay kini mao ang iyang unang higayon, kami mihukom sa paglakaw-lakaw sa gawas sa templo pagkahuman.
Ang mga nataran sa templo adunay pipila ka mga dapit nga tan-awanan sa usa ka kilid, busa kami milakaw padulong didto. Tungod kay ang Templo sa San Diego nahimutang sunod sa usa ka busy nga highway, kon kamo mobarug sa dapit tan-awanan, kamo sa tinuoray nagdungaw sa freeway.
Nagbarug sa mas taas nga nataran sa templo nianang adlawa nakahatag kanako og usa ka bag-ong panglantaw sa kinabuhi. Nagtan-aw ako sa kalibutan nga may naghadyong nga mga sakyanan, puno sa tawo nga mga shopping center, ug mga timailhan sa dalan nga puno sa graffiti.
Mao kadto ang higayon nga ako nakahunahuna: “Dili ka gusto nga mahimong kabahin niana; dili kini mao ang kinabuhi.” Kanunay akong gitudloan nga ang katuyoan sa kinabuhi mao ang pagbalik sa pagpuyo uban sa atong Langitnong Amahan ug mahimong sama Kaniya. Nasayud ako nga wala ako magkinahanglan sa mga butang sa kalibutan sa pagtuman niana nga tumong.
Mitalikod ako ug mitan-aw sa nindot nga templo, ug mapasalamaton ako alang sa kahibalo sa ebanghelyo ug sa panglantaw nga gihatag niini ngari kanako. Nasayud ako nga taliwala sa gubot ug malinglahon nga kalibutan, nakakaplag ako og mas taas nga nataran nga kabarugan.
Niadtong adlawa didto sa templo misaad ako sa akong Langitnong Amahan nga ako kanunay mobarug sa Iyang kiliran ug dili sa kalibutan. Bisan unsa pa ang itanyag sa kalibutan ngari kanato, ato kining mabuntog pinaagi sa pagsunod sa mga pakigsaad nga atong gihimo ug pinaagi sa pagbarug sa balaan nga mga dapit (tan-awa sa D&P 87:8).