Walay Paglubad nga mga Istorya sa Ebanghelyo
Panaghiusa
Usa sa labing mahinungdanon nga mga tema sa ebanghelyo ni Jesukristo mao ang panaghiusa. Ang mga kasulatan nagtudlo nga ang pagkapareha ug panag-uyon kinahanglang mopatigbabaw diha sa mga miyembro sa Simbahan.
Kamo makahinumdom nga sa gabii sa Katapusang Panihapon, ang Manluluwas nakigkita uban sa Iyang mga Apostoles, Siya nag-ampo nga unta sila makig-uyon uban Kaniya, sama nga Siya nakig-uyon uban sa Amahan. Siya wala lamang mag-ampo alang lamang kanila, “kondili alang usab sa mga mosalig [gayud] ngadto [Kaniya] pinaagi sa ilang pulong;
“Aron silang tanan mausa; maingon nga ikaw, Amahan, ania kanako, ug ako anaa kanimo, aron sila usab maania kanato: aron ang kalibutan motuo nga ikaw mao ang nagpadala kanako” (Juan 17:20–21).
Kanunay ang tumong mao ang panaghiusa, panag-uyon, ug pagkapareha diha sa mga miyembro sa Simbahan ni Kristo. Isip usa ka ehemplo, dad-on nako ang inyong atensyon sa rekord ni Enoch, giunsa niya ug sa iyang katawhan pag-abut sa usa ka kahimtang sa panaghiusa sa dihang ang ubang bahin sa kalibutan anaa sa gubat.
“Ug dihay miabut nga usa ka tunglo diha sa tanan nga mga katawhan nga nakig-away batok sa Dios;
“Ug gikan niana nga panahon dihay mga gubat ug pagbanaw sa dugo taliwala kanila; apan ang Ginoo miabut ug mipuyo uban sa iyang mga katawhan, ug sila mipuyo diha sa pagkamatarung.
“Ang kahadlok sa Ginoo diha sa tanan nga mga nasud, dako kaayo ang himaya sa Ginoo, nga diha sa iyang mga katawhan. Ug ang Ginoo mipanalangin sa yuta. …
“Ug ang Ginoo mitawag sa iyang mga katawhan og Zion.” Ngano? “Tungod kay sila usa sa kasingkasing ug usa sa hunahuna, ug nagpuyo diha sa pagkamatarung; ug walay kabus taliwala kanila” (Moises 7:15–18; mga italic gidugang).
Panahon sa Iyang mortal nga pangalagad si Jesus mitudlo sa iyang mga disipulo sa sama nga doktrina. Human sa Iyang Pagkayab, “silang tanan napuno sa Espiritu Santo, ug nanagsulti sa pulong sa Dios sa walay kahadlok.
“Ug sa katilingban sa mga nanagpanoo usa ra ang kasingkasing ug usa ra ang balatian: ug wala kanilay nag-ingon nga iya rang kaugalingon ang mga butang nga iyang gihuptan; hinonoa ilang gipanag-usahan sa pag-ambit ang tanang butang ingon nga katigayonan sa tanan” (Mga Buhat 4:31–32).
Human ang nabanhaw nga Manluluwas nangalagad sa mga Nephite, silang “tanan nga mga katawhan nakabig ngadto sa Ginoo, diha sa ibabaw sa tibuok yuta, mga Nephite ug mga Lamanite, ug walay mga panagbingkil ug mga panaglalis diha kanila, ug matag tawo mitagad nga makiangayon sa usag usa.
“Ug sila aduna sa tanan nga mga butang nga alang kanilang tanan; busa walay adunahan ug kabus, ulipon ug gawasnon, apan silang tanan gihimo nga mga gawasnon, ug nag-ambit sa langitnon nga gasa” (4 Nephi 1:2–3; mga italic gidugang).
Karon kita mao ang Simbahan ni Kristo, ug ang Ginoo naglaum kanato sa pagbuhat niining sama nga panaghiusa. Siya miingon na kanato: “Paghiusa; ug kon kamo dili magkahiusa kamo dili ako” (D&P 38:27).
Daghan sa mga miyembro naghunahuna nga ang usa ka tawo hingpit nga magkauyon sa diwa sa ebanghelyo, makatagamtam og hingpit nga pagkigdait sa Simbahan, ug sa samang higayon dili uyon sa mga lider sa Simbahan ug sa tambag ug sa direksyon nga ilang gihatag. Ang mao nga posisyon hingpit gayud nga wala mahiuyon, tungod kay ang giya niini nga Simbahan wala lamang magagikan sa nahisulat nga pulong apan usab sa nagpadayon nga pagpadayag, ug ang Ginoo naghatag niana nga pagpadayag ngadto sa Simbahan pinaagi sa Iyang pinili nga propeta. Busa, mahitabo, nga kadtong kinsa nagpaila nga nagdawat sa ebanghelyo ug kinsa sa samang higayon nagsaway ug nagbalibad sa pagsunod sa tambag sa propeta anaa sa mahuyang nga kahimtang. Ang ingon nga diwa modala ngadto sa apostasiya. Dili kini bag-o. Kini klaro sa panahon ni Jesus ug sa panahon ni Propeta Joseph Smith.
Nindot nga hinumduman ang talagsaong leksyon nga gitudlo sa Manluluwas ngadto sa mga Nephite kabahin niini nga hilisgutan samtang Siya nagsugod sa Iyang pagpangalagad diha kanila. Miingon Siya:
“Ug kinahanglan nga walay panaglalis taliwala kaninyo, ingon nga aduna karon, ni wala usab ang panaglalis taliwala kaninyo mahitungod sa mga punto sa akong doktrina, ingon nga aduna karon.
“Kay sa pagkatinuod, sa pagkatinuod Ako moingon nganha kaninyo, siya nga may espiritu sa panagbingkil dili gikan kanako apan gikan sa yawa, kinsa mao ang amahan sa panagbingkil, ug siya nagkutaw sa mga kasingkasing sa mga tawo sa panagbangi uban ang kasuko sa usag usa.” (3 Nephi 11:28–29).
Adunay usa lamang ka paagi nga kita magkahiusa, ug kana nga paagi mao ang pagpangita sa Ginoo ug sa Iyang pagkamatarung (tan-awa sa 3 Nephi 13:33). Ang panaghiusa moabut pinaagi sa pagsunod sa kahayag gikan sa itaas. Kini dili magagikan sa mga kalibog sa ubos. Samtang ang mga tawo magsalig sa ilang kaugalingon nga kaalam ug maglakaw sa ilang kaugalingon nga dalan, nga walay giya sa Ginoo sila dili makapuyo nga nagkahiusa. Ni sila mahimong magkahiusa pinaagi sa pagsunod sa dili dinasig nga mga tawo.
Ang dalan sa panaghiusa mao nga kita makakat-on sa kabubut-on sa Ginoo ug dayon mobuhat niini. Hangtud nga kining sukaranang baruganan masabtan ug matuman, walay mahitabong panaghiusa ug kalinaw dinhi sa yuta. Ang gahum sa Simbahan alang sa kaayohan sa kalibutan mag-agad kon asa kita, nga mga miyembro kutob, mosunod niini nga baruganan.
Ang dakong rason sa kagubot sa kalibutan karon mao nga ang mga tawo wala mangita nga makahibalo sa kabubut-on sa Ginoo ug dayon mobuhat niini. Hinoon sila nangita og sulbad sa ilang mga problema pinaagi sa ilang kaugalingong kaalam ug sa ilang kaugalingong paagi. Ang Ginoo, sa unang seksyon sa Doktrina ug mga Pakigsaad, diin Iyang gipadayag isip pasiuna ngadto sa basahon sa Iyang mga sugo, mihatag og gibug-aton ug mitimaan niini isip usa sa mga rason sa mga kalamidad nga Iyang nakita sa umaabot nga mga lumulupyo sa yuta. Paminaw niining naglanog nga deklarasyon:
“Kay sila nahisalaag gikan sa akong mga ordinansa, ug gilapas ang akong walay katapusan nga pakigsaad;
“Sila wala mangita sa Ginoo sa pagpahimutang sa iyang pagkamatarung, apan ang matag tawo naglakaw diha sa iyang kaugalingon nga paagi” (D&P 1:15–16).
Mga kaigsoonan, ayaw pagsalig sa tambag sa mga tawo ni mosalig sa gahum sa tawo (tan-awa sa D&P 1:19), apan pangitaa ang Ginoo sa pagpahimutang sa Iyang pagkamatarung (tan-awa sa D&P 1:16).
Kita niini nga Simbahan moabut sa panaghiusa ug pagnag-uyon nga mohatag kanato og kalig-on nga labaw pa sa bisan unsa nga butang nga ato unyang matagamtam kon kita moangkon og mas maayong panabut niini nga mga baruganan sa ebanghelyo ug magkahiusa sa atong pagsabut sa mga kondisyon sa kalibutan ug dagan sa panahon sa karon. Ato kining mabuhat pinaagi sa mainampuong pagtuon sa mga pulong sa Ginoo, lakip niadtong gihatag kanato pinaagi sa buhi nga propeta.
Kini mao ang paagi aron magkahiusa. Kon kita magtuon sa pulong sa Ginoo nga atong nadawat pinaagi sa mga sumbanan nga mga kasulatan ug pinaagi sa mga panudlo sa buhi nga propeta ug dili magpatig-a sa atong kasingkasing, apan magpainubsanon sa atong kaugalingon ug magpalambo og tinuod nga tinguha sa pagsabut sa paggamit niini ngadto sa atong nagkalain-laing mga kahimtang, ug dayon mangayo sa Ginoo uban sa hugot nga pagtuo, nagtuo nga kita makadawat (tan-awa sa D&P 18:18), samtang kanunay nga nagkugi sa pagsunod sa mga sugo sa Ginoo, sigurado nga ang agianan nga kinahanglan natong sundon ipakita ngari kanato, ug kita makaatubang sa kalibutan isip usa ka lig-on nga pundok.
Sigurado nga kita nagkinahanglan niining panaghiusa ug kalig-on niining panahon diin kita nagpuyo. Kita adunay talagsaon nga oportunidad, ang oportunidad sa pagsaka paingon sa langit, sa pag-angkon sa diwa sa ebanghelyo nga wala pa gayud nato matagamtami sukad sa una. Ato kining mahimo pinaagi sa pagpalambo diha kanato nianang panaghiusa nga gikinahanglan sa mga balaod sa celestial nga gingharian. …
Kini ang akong konbiksyon nga, sukad kita naapil sa buluhaton sa Ginoo, kita makatuman sa tanang butang nga Iyang gikinahanglan nga atong buhaton kon kita lamang magkahiusa.
Paghulagway sa litrato pinaagi ni Matthew Reier
Sa wala: paghulagway sa litrato pinaagi ni Welden C. Andersen