Makabenepisyo sa Usag Usa

Samtang ang mga lider ug mga batan-on mo-plano ug mohimo sa mga kalihokan, sila makatabang sa pagmugna og mga panumduman—ug mga pagpamatuod—nga madala hangtud sa kahangturan.

“Unsa ang atong buhaton karong semana?” siguro usa ka pangutana nga madunggan kanunay sa mga lider —ug tingali bisan makahadlok—samtang kita naningkamot sa pagtabang sa mga batan-on sa pagplano ug paghimo og epektibong mga kalihokan sa Mutual. Ug samtang nasayud kita kanunay nga sa tubag niana nga pangutana, usa ka mas lisud nga pangutana “Unsa man ang atong makab-ut pinaagi sa pagbuhat sa atong buhaton karong semanaha?”

Bag-ohay lang, samtang namulong ngadto sa mga lider sa kabatan-onan, si Presidente Thomas S. Monson mitambag nga “ang sukaranan nga responsibilidad sa pagtabang sa kabatan-onan sa pagpili sa husto kon ang kapilian anaa sa ilang atubangan usa ka kinahanglanon nga balaod karon sama kaniadto pa.”

“Hatagi sila og mga panumduman nga ilang madala hangtud sa kahangturan,” siya miingon, “ug ang inyong pangalan pagatawagon og bulahan sa Ginoo.” Siya nagbalik-balik sa pagsulti, kutob sa iyang mahimo, nga ang Ginoo modasig niadtong kinsa Iyang gitawag.¹

Ang Liahona midapit sa daghang mga lider sa Simbahan sa paghinumdom og usa ka mahinungdanon nga Mutual o uban pang mga kalihokan sa mga batan-on ug ipakigbahin unsa ang nahimo niini alang kanila. Siguro ang mga lider karon mobati og kahupayan niini nga mga kasinatian, nakaamgo nga ang ilang mapahinunguron nga mga paningkamot nakatabang sa pagmugna og importanting mga panumduman—ug mahangturong mga pagpamatuod.

Unsa ang Mutual?

Ang batan-ong mga lalaki ug batan-ong mga babaye kinahanglan adunay regular nga nakaiskedyul nga mga kalihokan nga gitawag og Mutual. Ang pulong nga Mutual nagsugyot og nagpakigbahin nga mga kasinatian diin adunay pagtahud ug suporta alang sa usag-usa. Ang mga kalihokan sa mutual kinahanglan maghatag sa mga batan-on og nagkalain-laing mga oportunidad sa pagserbisyo sa uban ug sa paglambo sa espiritwal, sosyal, pisikal, ug intelektwal nga mga paagi.

Ang mutual himoon sa usa ka adlaw o gabii gawas sa Dominggo o Lunes. Sa kasagaran kini pagahimoon kausa matag semana apan mahimong himoon ubos pa niana kon ang mga lider sa priesthood modeterminar nga ang pagbiyahe, mga kapanguhaan, o uban pang mga kahimtang makapugong og senemana nga miting.

Ang kapangulohan sa Young Men ug Young Women sa ward o branch, ubos sa direksyon sa bishopric o sa kapangulohan sa branch, modumala sa Mutual.

Ang sa dugang nga impormasyon, adto sa LDS.org ug i-klik ang “Serving in the Church.”

Mga paghulagway sa litrato pinaagi ni Christina Smith ug Craig Dimond