Pagdawat sa Imbitasyon
Usa sa labing dili makalimtan nga mga kalihokan nga akong naapilan isip usa ka batan-on mao ang dakong festival sa sayaw. Sigurado gayud ako nga ako dili mobulontaryo sa ingon niini nga kalihokan. Apan, uban sa pipila ka mga pag-agni, midawat ako sa imbitasyon sa pag-apil, bisan sa sinugdanan wala ako maghinam-hinam sa ideya.
Nagpraktis kami og kadaghan, ug ang pagkat-on sa mga sayaw usa ka hinay nga proseso. Mapasalamaton ako sa mahalarong mga magtutudlo, sa usa ka mapailubon nga kaparis sa sayaw, ug sa akong inahan, kinsa mitahi sa akong costume ug miawhag kanako sa pagbuhat sa akong labing maayo.
Ang festival himoon sa usa ka stadium sa football. Wala pa ako sukad makaapil og usa ka butang nga hilabihang kadako. Ang kada grupo naglingaw sa mga katawhan samtang kami nagpasundayag sa gi-choreograph nga mga sayaw sa daghang kolor nga mga costume. Dayon ang field sa football klaro nga napuno sa mga mananayaw samtang kaming tanan nagpasundayag sa panapos nga pasundayag. Kini nahimong usa ka makapahimuot nga pasundayag.
Nalingaw ako kaayo niana nga festival sa sayaw kaysa akong gihunahuna. Kini mitugot kanako sa paglantaw sa Simbahan sa lain nga paagi. Nakakita og hilabihan ka daghan nga mga batan-on nga nalingaw pag-ayo. Nakaila ako og bag-ong mga higala, nakapalambo ako og bag-ong kahanas, ug nakatampo ako og gamay nga bahin sa usa ka dako nga produksyon nga nakalingaw sa liboan.
Tungod kay gidawat nako ang imbitasyon sa pagsayaw niana nga festival—ug uban pang mga imbitasyon nga miabut kanako sa Simbahan—ang akong kinabuhi napanalanginan, ug aduna akoy kahigayunan sa pagpanalangin sa uban. Mibati ako nga swerte sa pag-angkon og daghang talagsaon nga mga kasinatian isip usa ka miyembro sa Ang Simbahan ni Jesukristo sa mga Santos sa Ulahing mga Adlaw.