Ang Plano sa Kaluwasan
Sa istorya nga “Ang 10-anyos nga Magtutudlo,” si Chance mitudlo kabahin sa plano sa kaluwasan. Tan-awa ang mga litrato niini nga pahina, ug dayon pag-drawing ug imong kaugalingon diha sa laing piraso nga papel. Guntinga ang imong mga gi-drawing, tan-awa ang mga kasulatan, ug dayon hisguti ang mahitungod sa plano sa kaluwasan uban sa sakop sa pamilya o higala. O hangyoa ang imong mga ginikanan kon mahimo bang hisgutan nimo kini panahon sa family home evening.
Unsa ang plano sa kaluwasan?
Sa wala pa kita matawo, nagpuyo kita kauban sa atong Langitnong Amahan isip Iyang mga anak nga espiritu. Gidawat nato ang Iyang plano aron kita matawo sa yuta, makabaton og lawas, ug masulayan. Ang Langitnong Amahan mopadala sa Iyang Anak, nga atong Manluluwas, si Jesukristo, sa pagbuntog sa kamatayon ug sa pag-ula sa atong mga sala. Pinaagi sa matinud-anong pagsunod sa plano sa Langitnong Amahan, makabalik kita ngadto Kaniya. (Tan-awa sa Abraham 3:23–28.)
Diin man ako gikan?
Kita nagpuyo kauban sa atong langitnong mga ginikanan sa atong kinabuhi sa wala pa dinhi sa yuta. Subo lang, ang ikatulo nga bahin sa espiritung mga anak sa Langitnong Amahan wala modawat sa Iyang plano. Gipili nila ang pagsunod kang Satanas, nga sa wala madugay nailhan nga si Lucifer. Si Lucifer dili gusto nga kita makahimo og kaugalingon natong mga pagpili. Usa ka gubat sa mga ideya ang giawayan didto sa langit, ug si Lucifer ug ang iyang mga sumusunod gipapahawa. Ikaw ania sa yuta tungod kay imong gipili ang plano sa Langitnong Amahan. (Tan-awa sa Pinadayag 12:7–9.)
Nganong ania man ako dinhi?
Sa atong pag-anhi dinhi sa yuta, nagbaton kita og mga lawas, nagpuyo nga kauban sa pamilya, ug nagsinati og kalipay kon kita mosunod sa plano sa Langitnong Amahan alang kanato. Samtang kita ania dinhi, kinahanglan nga kita makadawat sa mga ordinansa nga makatabang kanatong makabalik sa Langitnong Amahan: sa bunyag, kumpirmasyon, mga ordinasyon sa priesthood alang sa batan-ong mga lalaki, ug sa mga ordinansa sa templo, lakip na ang celestial nga kaminyoon. Ang Espiritu Santo nagtabang kanato nga magiyahan sa pagbuhat unsa ang matarung samtang layo kita sa atong langitnong panimalay. (Tan-awa sa 2 Nephi 32:5.)
Asa ako padulong kon ako mamatay?
Kon ang inyong lawas mamatay, ang inyong espiritu padayon nga buhi, ug moadto kini sa kalibutan sa espiritu. Ang kalibutan sa espiritu usa ka maanindot nga dapit diin kamo mahiusa kauban sa mga sakop sa inyong pamilya nga nangamatay na. Si propeta Alma mihulagway sa kalibutan sa espiritu isip usa ka “kahimtang sa kapahulayan, usa ka kahimtang sa kalinaw” alang sa mga matarung (Alma 40:12).
Pinaagi sa Pag-ula ni Jesukristo, ang tanang mga tawo mabanhaw. Ang pagkabanhaw mao ang paghiusa og balik sa inyong lawas ug sa espiritu. Human sa usa ka panahon sa kalinaw nga gitawag og Milenyum, ang Ginoo mohukom sa tanang katawhan, ug kadaghanan sa mga tawo mosulod ngadto sa usa sa mga gingharian sa himaya: sa telestial, terrestrial, o sa celestial nga gingharian. Ang dautang mga tawo nga nakigbatok kang Jesukristo ug milimod sa Espiritu Santo ipadala ngadto sa usa ka dapit nga gitawag og kawanangan sa kangitngit. (Tan-awa sa 2 Nephi 9:15; Alma 40:11–12.) ◼
Mga paghulagway pinaagi ni Steve Kropp
Kinabuhi sa Wala pa dinhi sa Yuta
Kinabuhi dinhi sa Yuta
Kalibutan sa Espiritu
Pagkabanhaw
Katapusang Paghukom
Telestial nga Gingharian
Terrestrial nga Gingharian
Celestial nga Gingharian