Mga Pangutana ug mga Tubag
“Unsaon nako sa pagtubag kon ako bugal-bugalan isip usa ka miyembro sa Simbahan ug naningkamot sa paghupot sa akong mga sumbanan?”
Tungod sa Kahayag ni Kristo, ang mga anak sa Dios nasayud kon unsa ang husto o sayop, apan subo hunahunaon nga ang uban magpili sa pagbaliwala niana nga kahibalo ug magbiay-biay niadtong mga naningkamot sa pagpili sa matarung. Bisan kanus-a kutob sa imong mahimo, paningkamuti ang pagpaambit sa imong pagpamatuod sa tawo nga sama niana ug ipasabut ang mga panalangin nga imong nadawat pinaagi sa pagsunod sa mga sumbanan.
Kon giunsa nimo sa pagtubag ang mga pamugal-bugal makaapekto kon unsay pagtan-aw sa uban diha kanimo ug sa Simbahan. Ayaw gayud pagpakiglantugi o pagtubag dala ang kasuko o kawalay pagbati. Usahay gikinahanglan nimo ang pagbaliwala kon unsay gipangsulti sa uban ug pagsunod sa tambag sa Manluluwas sa paghigugma ug sa pag-ampo alang kanila (tan-awa sa 3 Nephi 12:44). Hinumdumi nga ikaw kinahanglan nga mamahimong “usa ka panig-ingnan sa mga tumutuo, sa sinultihan o sa paggawi, sa gugma, sa pagtuo, kaputli” (1 Timoteo 4:12).
Sa katapusan, ayaw kaulaw, ayaw ikaulaw ang imong pagpamatuod sa ebanghelyo (tan-awa sa Mga Taga-Roma 1:16). Ang imong makanunayon nga ehemplo mahimong usa ka gamhanan nga saksi sa mga nanaglibut kanimo mahitungod sa kamatuoran sa ebanghelyo. Ang pagbarug alang sa imong mga gituohan sa usa ka puno sa gugma ug sa masaligon nga paagi makalig-on usab sa mga kulang og kaisug sa pagbuhat unsa ang matarung.
Ipasabut ang Imong mga Gituohan
Kaniadto miapil ako og usa ka team sa basketball nga sa kasagaran magdula matag Sabado. Kon magdula kami inig ka Dominggo, hinoon, dili ako motambong, ug ang akong mga kaubanan sa team mobugal-bugal niini. Sa dihang nangutana sila og nganong dili ako modula og ma-Dominggo, mitubag ako nga, “miyembro ako sa Simbahan ni Jesukristo sa mga Santos sa Ulahing mga Adlaw, ug gitudloan ako sa paghimong sagrado sa Igpapahulay ug dili magdula og sports. Akong gisunod ang mga baruganan sa ebanghelyo tungod kay nasayud ako nga ang Dios nagtinguha sa pinakamaayo alang kanato.” Human niana, ang akong mga kaubanan sa team mirespeto sa akong mga gituohan ug mihunong sa pagbugal-bugal kanako.
Nicolás B., age 19, Córdoba, Argentina
Pag-ampo alang Kanila.
Makawala sa kadasig kon ang uban mobugal-bugal sa imong mga gituohan. Hinoon, gisulayan nako sa paghinumdom nga kadtong namugal-bugal wala makadawat sa mga panalangin sa ebanghelyo. Mao nga nag-ampo ako nga ang Langitnong Amaham mousab sa ilang mga kasingkasing ug motabang kanilang makasabut sa importansya sa ebanghelyo. Nasayud ako nga kon ako magpuyo og usa ka maayo, kinabuhi nga angay sundon, ang akong ehemplo makatabang kanila nga mag-usab.
Itaobong O., edad 20, Rivers, Nigeria
Ayaw og Kaulaw
Kon adunay mobiay-biay kanimo tungod kay ikaw miyembro sa Simbahan, sultihi lamang sila nga ikaw adunay pagpamatuod sa Simbahan ug ikaw ganahan nga mosimba. Sultihi sila nga gibati nimo nga ang imong Langitnong Amahan anaa ra sa duol. Ayaw kaulaw o kahadlok sa pagsulti sa husto nga butang!
Laura A., edad 12, Hesse, Germany
Sulti sa Mapinanggaon nga paagi
Gibasa nako ang artikulo ni Elder Robert D. Hales mahitungod sa Kristohanon nga kaisug ug sa unsang paagi nga kita dili motubag nga masuk-anon apan sa kamapinanggaon ngadto sa mga nagbatok sa Simbahan.1 Kon atong ipakita nga naghunahuna kita kanila, dayon ang kadaghanan sa mga tawo mohunong sa paglihok og sobra ka dautan ngari kanato. Kinahanglan nga tagdon nimo ang mga tawo uban sa pagtahud ug paghigugma tungod kay sa pagkatinuod mosumbalik ra kini kanimo. Kon ang mga tawo mosulti kanimo sa pagbuhat og mga butang nga supak sa imong mga sumbanan, kalma lang sa pagbalibad ug ingna, “miyembro ako sa LDS nga Simbahan ug dili motuo nga OK ra ang paghimo niana.” Mahimo gani nga mosugyot ka og usa ka kalihokan nga dili supak sa imong mga sumbanan.
Lucas H., edad 15, Arizona, USA
Pagmahimo nga usa ka Buotan nga Higala
Una sa tanan, hunahunaon nako ang ehemplo sa Ginoo. Sa dihang gihatag Niya ang Iyang kinabuhi alang kanako, Siya walay nahimong sayop o sa bisan unsa nga katarungan nga Siya angayan sa Iyang giantus. Ikaduha, hunahunaon nako ang ehemplo ni Joseph Smith, kinsa nasayud kon unsaon sa pagkahimong lig-on ug maisugon mao nga karon mapasigarbuhon ako nga nasakop sa Simbahan ni Jesukristo sa mga Santos sa Ulahing mga Adlaw. Ikatulo, ipadayon nako ang paghupot sa akong mga baruganan pinaagi sa pagkamabination ug pinaagi sa pag-alagad. Akong ipakita ang akong gugma alang kanila pinaagi sa pagkahimong pinakamaayo nga higala ug ehemplo nga ilang makita. Akong ipakita kanila ang mga panalangin nga ikahatag kanila pinaagi sa pagkamasulundon sa mga baruganan. Total, kitang tanan mga anak sa usa ka mahigugmaon ug maloloy-on nga Amahan.
Auguste R., edad 15, Tahiti, French Polynesia
Ipadan-ag ang Imong Kahayag
Kinahanglan natong hinumduman ngano ug alang kang kinsa ang atong pagsunod sa atong mga sumbanan. Kon kanunay natong ibutang sa atong hunahuna ang ehemplo sa atong Manluluwas, mahimo kitang andam sa paglahutay sa ingon nga mga sitwasyon uban ang kalumo, nga walay espiritu sa pagkabungkag, ug kawalay pagbati nga kaulaw alang sa mga sumbanan nga atong gipili nga sundon. Kon molihok kita og sama niini, atong gipasiga ang atong kahayag sa atubangan sa mga tawo, ug makita nila ang inyong mga maayong buhat ug dayegon nila ang inyong Amahan nga anaa sa langit (tan-awa sa Mateo 5:16).
Lara M., edad 21, Paraíba, Brazil
Ihatag ang Imong Pagpamatuod
Sa unibersidad diin ako nag-eskwela, adunay usa ka batan-ong lalaki kinsa milutos kanako tungod sa akong pagkamiyembro sa Simbahan. Kanunay siyang gusto nga makiglalis, mao nga gipaningkamutan na lang nako ang paglikay kaniya. Dayon usa ka adlaw gihatag nako ang akong pagpamatuod kaniya, ug mihunong siya sa paglutos kanako. Kinahanglan nga kanunay kitang lig-on ug mahinumdom kon sa unsang paagi nato naangkon ang atong pagpamatuod. Kinahanglan kitang molihok uban ang pagpugong sa kaugalingon aron ang Balaang Espiritu kanunay nga magauban kanato ug maglig-on kanato, bisan unsa pa man ang isulti o hunahunaon sa uban. Kinahanglan kitang mag-ampo alang niadtong mga tawhana aron sa umaabut nga adlaw ilang dawaton si Jesukristo.
Brezka E., edad 21, Valparaíso, Chile
Makigsulti sa mga Higala sa Simbahan
Akong nahibaloan nga ang pagbasa sa akong patriyarkal nga panalangin makatabang gayud. Naghatag kini kanako og mas maayo nga panabut kon si kinsa ako, sa akong mga kahuyang, ug sa akong mga kalig-on aron mas maatubang nako ang mga pagsulay nga sama niini. Duha lamang ka buok ang akong suod nga mga higalang LDS, apan kanunay akong makigsulti kanila sa mga paagi kon unsaon sa pag-atubang ang mga pagsulay. Nagtuo ko nga kana makatabang gayud kanimo. Usa ka paagi kon unsaon sa pag-atubang og ingon niini nga problema mao lamang ang pagpakita sa pagkamabination ug sa pagkahimong ehemplo sa tanan nimong gibuhat. Dayag lang nga dili nimo mapugos ang mga tawo sa pag-usab sa ilang mga hunahuna, apan ang pagkamabination ug ang pagkadili dayon masuko tingali usa sa maayo kaayo nga paagi sa pagpakita kanila kon unsa kaimportante ang Simbahan alang kanimo.
William L., edad 17, Nevada, USA