2010
Pagkakaplag sa Atong Kaugalingon diha sa Damgo ni Lehi
Agosto 2010

Pagkakaplag sa Atong Kaugalingon diha sa Damgo ni Lehi

Ni Presidente Boyd K. Packer

Presidente sa Korum sa Napulog Duha ka mga Apostoles

Gikan sa usa ka debosyonal nga pakigpulong niadtong Enero 16, 2007, sa Unibersidad sa Brigham Young. Alang sa kompleto nga teksto sa Iningles, bisitaha ang http://speeches.byu.edu.

Anaa sa damgo ni Lehi ang tanang butang nga gikinahanglan sa usa ka Santos sa Ulahing mga Adlaw aron makasabut sa pagsulay sa kinabuhi.

President Boyd K. Packer

Nangutana ako sa departamento sa mga rekord sa Simbahan sa pagsulti kanako pila ka mga batan-on ang nag-edad para sa kolehiyo dinhi sa Simbahan. Sila mitubag, “1,974,001.”

“Maayo,” mihunahuna ko. “Ako mamulong ngadto sa usa.”

Ang akong kinabuhi sa kolehiyo nagsugod lamang pagkatapos sa Ikaduhang Gubat sa Kalibutan. Kadaghanan sa mga lalaki sa akong klase mga bag-ohay lamang miuli gikan sa serbisyo sa militar. Kami, sa kasagaran, mas hamtong kaysa mga estudyantye sa kolehiyo karon. Kami nakalahutay sa gubat ug nakadala kami og daghang mga panumduman. Ang pipila niini dili gayud namo makalimtan; gikalipay namo nga ang uban nakalimtan. Kami mas seryuso ug dili moapil sa mga kalingawan ug mga dula kaysa kadaghanan sa mga estudyante karon. Gusto namong molambo sa among kinabuhi ug masayud nga ang edukasyon mao ang yawe.

Ang tibuok pokus sa among mga kinabuhi sa militar kanunay kabahin sa paggun-ob. Kana mao ang gubat. Kami gidasig pinaagi sa halandong hiyas sa pagkanasudnon. Ang pagkamahalaron sa paggun-ob nga dili magun-ob ang imong kaugalingon sa espiritwal ug moral nga paagi usa ka hagit sa kinabuhi.

Kamo usab nagpuyo sa usa ka panahon sa gubat, ang espiritwal nga gubat nga dili gayud matapos. Ang gubat mismo karon nagpasulabi sa mga kalihokan sa katawhan. Ang sige og gubat sa kalibutan nakapawala sa kaputli niini. Ang tanang butang, bisan pa bastos o malaw-ay, madawat alang sa mga salida sa sine o mga drama o musika o pag-istoryahanay. Ang kalibutan ingon og nabaliktad na gayud. (Tan-awa sa 2 Pedro 2.)

Ang pagkapormal, dignidad, halangdon, ug pagtahud sa may awtoridad gibiay-biay. Ang tarung nga pagsinina ug pagkalimpyo gipildi sa kagidlay nga sininaan ug pamustura. Ang mga lagda sa pagkamatinuoron ug integridad ug sukaranang moralidad gibaliwala na karon. Ang pag-istoryahanay napuno sa pamalikas. Inyo kanang makita sa art ug literatura, sa drama ug kalingawan. Imbis nga malunsay, kini nahimong bastos. (Tan-awa sa 1 Timoteo 4:1–3; 2 Timoteo 3:1–9.)

Kamo mohimo og mga desisyon hapit kada adlaw kon kamo mosunod ba niadtong mga nauso. Kamo adunay daghang mga pagsulay sa unahan.

Gunit sa Gunitanan

Sa 1 Nephi 8, pagbasa kabahin sa damgo ni Lehi. Siya miingon sa iyang pamilya, “Tan-awa, ako nagdamgo og usa ka damgo; o, sa lain nga pagkasulti, ako nakakita og usa ka panan-awon” (1 Nephi 8:2).

Kamo mahimong magtuo nga ang damgo o panan-awon walay talagsaon nga kahulugan alang kaninyo, apan kini aduna. Kamo ania dinhi, kitang tanan ania dinhi.

Si Nephi miingon, “[Ang tanang kasulatan gipahisama] ngari kanato, nga kini unta mahimo alang sa atong kaayohan ug sa atong pagkat-on” (1 Nephi 19:23).

Anaa sa damgo o panan-awon ni Lehi sa puthaw nga gunitanan ang tanang butang nga gikinahanglan sa usa ka Santos sa Ulahing mga Adlaw aron makasabut sa pagsulay sa kinabuhi.

Si Lehi nakakita og:

Basaha ang damgo o ang panan-awon sa mabinantayon nga paagi; dayon basaha kini pag-usab.

Kon kamo mogunit sa gunitanan, kamo mobati sa inyong agianan sa unahan uban sa gasa sa Espiritu Santo, gihatag kaninyo sa panahon nga kamo gikumpirmahan isip usa ka miyembro sa Simbahan. Ang Espiritu Santo mohupay kaninyo. Kamo mobati sa impluwensya sa mga anghel, sama sa nahitabo ni Nephi, ug mobati sa inyong agianan sa tibuok kinabuhi.

Ang Basahon ni Mormon mao ang akong gunitanan nga puthaw.

Si Lehi nakakita og dili maihap nga mga pundok sa katawhan “mipadayon paingon ngadto sa unahan” paingon sa kahoy (1 Nephi 8:21).

Ang dako ug lapad nga gambalay “napuno sa mga katawhan, mga tigulang ug mga batan-on, mga lalaki ug mga babaye; ug ang matang sa ilang panaput hilabihan kaanindot; ug ang ilang mga kinaiya ingon og nagbiay-biay ug nagtulisok sa ilang mga tudlo paingon ngadto kanila kinsa miabut ug mikaon sa bunga” (1 Nephi 8:27).

Usa ka pulong sa iyang damgo o panan-awon nga kinahanglang adunay talagsaon nga kahulugan alang sa batan-ong mga Santos sa Ulahing mga Adlaw. Ang pulong mao ang human. Pagka human niadto nga ang katawhan nakakita sa kahoy nga sila nangaulaw, ug tungod sa pagbiay-biay sa kalibutan nga sila nangahulog.

“Ug human sila makatilaw sa bunga sila nangaulaw, tungod niadto nga nagbugal-bugal kanila; ug sila nangahulog ngadto sa gidili nga mga dalan ug nangawala. …

“Ug hilabihan ka daghan sa pundok sa mga katawhan nga misulod ngadto sa katingalahan nga gambalay. Ug human sila makasulod ngadto niana nga gambalay sila mitulisok sa ilang tudlo nga mabiay-biayon ngari kanako ug ingon usab niadto nga mikaon sa bunga.” Kana mao ang pagsulay; dayon si Lehi miingon, “Apan kami wala maminaw kanila” (1 Nephi 8:28, 33; emphasis gidugang). Ug kana mao ang tubag.

Ang anak nga lalaki ni Lehi nga si Nephi misulat:

“Ako, si Nephi, matinguhaon usab nga unta ako makakita, ug makadungog, ug masayud niini nga mga butang, pinaagi sa gahum sa Espiritu Santo, diin mao ang gasa sa Dios ngadto sa tanan niadto kinsa sa makugihon nga paagi mangita kaniya. …

“Kay siya nga sa makugihon nga paagi mangita makakaplag; ug ang mga misteryo sa Dios ipadayag ngadto kanila, pinaagi sa gahum sa Espiritu Santo, ingon niini nga mga panahon ingon man usab sa karaan nga mga panahon, ug ingon man sa karaan nga mga panahon ug sa panahon nga moabut; busa, ang palakaw sa Ginoo usa ka walay katapusan nga nagsunod-sunod nga buhat.” (1 Nephi 10:17, 19).

Ang tanang mga simbolo sa damgo ni Lehi gipasabut ngadto sa iyang anak nga lalaki nga si Nephi, ug si Nephi misulat kabahin niini.

Sa inyong bunyag ug kumpirma, kamo migunit sa puthaw nga gunitanan. Apan kamo dili gayud luwas. Inigka human ninyo og kaon niana nga bunga ang inyong pagsulay moabut.

Naghunahuna ako matag karon ug unya sa usa sa among mga kauban sa klase—intelihenti, gwapo, matinud-anon sa Simbahan, ug puno sa talento ug abilidad. Maayo ang iyang pagkaminyo ug daling misaka ngadto sa pagkabantugan. Siya misugod sa pagkompromiso sa pagpahimuot sa kalibutan ug niadtong nag-alirong kaniya. Sila midani kaniya sa pagsunod sa ilang mga pamaagi, diin mga pamaagi sa kalibutan.

Usahay kini yano kaayo nga butang sama kon giunsa ninyo sa pagpahapsay ang inyong kaugalingon o unsa ang inyong sul-ubon, sama sa usa ka batan-ong babaye nga gipakalkag gayud ang iyang buhok aron sa paghatag og impresyon nga kini wala gayud masudlay o usa ka batan-on nga lalaki nga nagsul-ob og naghuyhuy nga mga sinina, gusto nga mouban sa uso.

Diha sa gagmay nga mga butang, ang paggunit sa gunitanan nga puthaw sa akong kauban sa klase naluag og gamay. Ang iyang asawa migunit sa puthaw nga gunitanan sa usa ka kamot ug ang usa ngadto kaniya. Sa katapusan, siya nakabuhi gikan kaniya ug gibuhian ang puthaw nga gunitanan. Sama nga gipanagna diha sa damgo o panan-awon ni Lehi, siya nahulog ngadto sa gidili nga mga dalan ug nawala.

Tungod gayud kini sa telebisyon, imbis nga nagtan-aw ngadto sa lapad nga gambalay, kita, sa pagkatinuod, nagpuyo sulod niini. Kana mao ang inyong kapaingnan niini nga henerasyon. Kamo nagpuyo nianang dako ug lapad nga gambalay.

Si kinsa ang misulat niining talagsaon nga panan-awon? Walay kapareha niini sa Biblia. Si Joseph Smith ba ang nagsulat niini? Siya ba ang nagsulat sa Basahon ni Mormon? Kana mas lisud tuohan kaysa sa kasaysayan sa mga anghel ug sa mga palid nga bulawan. Si Joseph Smith 24 anyos lamang sa dihang giimprinta ang Basahon ni Mormon.

Kamo mahimong luwas kon kamo tan-awon ug maghapsay sa kaugalingon ug molihok sama sa usa ka ordinaryo nga Santos sa Ulahing mga Adlaw: pagsinina og tarung, tambong sa inyong mga miting, bayad sa ikapulo, ambit sa sakrament, tahud sa priesthood, tahud sa mga ginikanan, sunod sa inyong mga lider, basa sa mga kasulatan, tuon sa Basahan ni Mormon, ug mag-ampo—mag-ampo kanunay. Usa ka dili makita nga gahum ang mogunit sa inyong kamot samtang kamo mogunit sa puthaw nga gunitanan.

Makasulbad ba kini sa tanan ninyong mga problema? Siyempre dili! Kana mahimong supak sa katuyoan sa inyong pag-anhi dinhi sa pagka-mortal. Kini, bisan pa niana, makahatag og lig-on nga pundasyon diin ninyo itukod ang inyong kinabuhi (tan-awa sa Helaman 5:12).

Ang gabon sa kangitngit usahay motabon pag-ayo nga kamo dili na makakita sa inyong agianan bisan gani mubo nga distansya sa unahan. Kamo dili makakita og klaro. Apan uban sa gasa sa Espiritu Santo, kamo mobati sa inyong agianan nga nag-una diha sa inyong kinabuhi. Gunit pag-ayo sa puthaw nga gunitanan, ug ayaw gayud pagbuhi. (Tan-awa sa 3 Nephi 18:25; D&P 9:8.)

Usa ka Panahon sa Espiritwal nga Gubat

Kita nagpuyo sa usa ka panahon sa gubat, kanang espritwal nga gubat nga dili gayud matapos. Si Moroni mipasidaan kanato nga ang tinago nga mga kalihokan nga gisugdan ni Gadianton “anaa diha sa tanan nga mga katawhan. …

“Busa, O kamo nga mga Hentil [ug ang pulong nga Hentil niana nga dapit sa Basahon ni Mormon nagpasabut kanato sa atong henerasyon], kini kaalam diha sa Dios nga kini nga mga butang kinahanglan mapakita nganha kaninyo, nga pinaagi niini kamo unta mohinulsol sa inyong mga sala, ug dili motugot nga kini nga mabunuon nga mga kalihokan molupig kaninyo. …

“Busa, ang Ginoo misugo kaninyo, sa panahon nga kamo makakita niini nga mga butang nga moabut taliwala kaninyo nga kamo mahigmata ngadto sa pagkaamgo sa inyong makalilisang nga kahimtang tungod, tungod niining tinago nga kalihokan nga anaa sa taliwala kaninyo” (Ether 8:20, 23–24).

Ang mga ateista ug mga wala motuo sa Dios [agnostics] naghimo sa dili motuo nga ilang relihiyon ug karon nag-organisar og wala sukad mahibaloi nga mga pamaagi sa pag-atake sa pagtuo. Sila karon naorganisar, ug sila nagtinguha og gahum sa politika. Kamo makadungog og daghan kabahin nila ug gikan kanila. Daghan sa ilang pag-atake dili direkta sa pagbiay-biay sa mga matinud-anon, sa pagbiay-biay sa relihiyon.

Ang mga matang nga sila si Sherem, Nehor, ug Korihor nagpuyo sa taliwala nato karon (tan-awa sa Jacob 7:1–21; Alma 1:1–15; 30:6–60). Ang ilang mga argumento dili kaayo lahi gikan niadtong anaa sa Basahon ni Mormon.

Kamo kinsa mga batan-on makakita og daghang mga butang nga mohagit sa inyong kaisug ug mosulay sa inyong hugot nga pagtuo. Ang tanang mga pagbiay-biay wala maikan sa gawas sa Simbahan. Tuguti ako sa pagsulti niini pag-usab: ang tanang mga pagbiay-biay wala maikan sa gawas sa Simbahan. Pagmabinantayon nga kamo nga dili maapil niining kategorya nga nagbiay-biay.

Ang Ginoo misaad, “Kon kamo andam kamo dili mahadlok” (D&P 38:30).

Bisan si Moroni miatubang sa sama nga hagit. Siya miingon, tungod sa iyang kahuyang sa pagsulat:

“Ako nahadlok … ang mga Hentil mobiay-biay sa among mga pulong.

“[Ug ang Ginoo misulti ngadto kaniya:] Ang mga buang mobiay-biay apan sila gayud magbangutan; ug ang akong grasya igo alang sa maaghup, nga sila dili magpahimulos sa inyong kahuyang;

“Ug kon ang tawo moduol ngari kanako Ako mopakita ngadto kanila sa iyang kahuyang. Ako mohatag ngadto sa mga tawo og kahuyang nga sila mahimo nga magpaubos; ug ang akong grasya igo alang sa tanan nga mga tawo nga magpaubos sa ilang mga kaugalingon sa akong atubangan, kay kon sila magpaubos sa ilang mga kaugalingon sa akong atubangan, ug magbaton og hugot nga pagtuo ngari kanako, niana Ako mohimo sa mahuyang nga mga butang nga mahimo nga malig-on ngadto kanila.” (Ether 12:25–27).

Kami Nalipay diha kang Kristo

Lakip diha sa damgo o panan-awon mao ang “mutya nga bililhon kaayo” (Mateo 13:46).

Si Lehi ug Nephi nakakita:

Kining tanan ilang nakita sa damgo o panan-awon. Ug kana mao ang atong giatubang karon,

Karon nganha kanimo, ang usa sa duha ka milyon, ako mosulti sa tinagsa-tagsa. Sama sa gibuhat sa mga propeta ug mga apostoles kaniadto ,“kami naghisgot kang Kristo, kami nalipay diha kang Kristo, kami nagsangyaw kang Kristo, kami nanagna kang Kristo, … nga ang among mga anak mahimo nga masayud sa unsa nga tinubdan sila mahimo nga mangita alang sa kapasayloan sa ilang mga sala” (2 Nephi 25:26).

“Ang mga anghel mamulong, pinaagi sa gahum sa Espiritu Santo; busa, sila namulong sa mga pulong ni Kristo. Busa, ako moingon nganha kaninyo, pagbusog sa mga pulong ni Kristo, kay tan-awa ang mga pulong ni Kristo magtug-an kaninyo sa tanan nga mga butang nga inyong buhaton” (2 Nephi 32:3).

Ug dayon si Nephi midugang:

“Busa, karon nga human ako makapamulong niini nga mga pulong, kon kamo dili makasabut kanila kini nahimo tungod kay kamo wala mangutana, ni kamo motuktok; busa, kamo wala madala ngadto sa kahayag, apan malaglag diha sa kangitngit.

“Kay tan-awa, pag-usab ako moingon nganha kaninyo nga kon kamo mosulod pinaagi sa agianan, ug modawat sa Espiritu Santo, kini mopakita nganha kaninyo sa tanan nga mga butang nga kinahanglan inyong buhaton” (2 Nephi 32:4–5).

Ang mga Pag-aghat sa Espiritu Santo

Kamo nagpuyo sa usa ka talagsaon nga henerasyon, sa dihang ang mga pagsulay mahimong kanunay sa inyong kinabuhi. Pagkat-on sa pagsunod sa mga pag-aghat sa Espiritu Santo. Kini mahimong usa ka panagang ug proteksyon ug magtutudlo alang kaninyo. Ayaw gayud kaulaw o ikaulaw ang mga doktrina sa ebanghelyo o kabahin sa mga baruganan nga atong gitudlo sa Simbahan. Kamo kanunay, kon kamo matinud-anon sa Simbahan, malahi gayud sa kadaghanan sa tawo sa kalibutan.

Kamo nakabintaha sa pagkasigurado nga kamo madasig sa tanan ninyong mga desisyon. Kamo adunay daghang mga desisyon sa umaabut—mga desisyon nga may kalabutan unsaon sa pagpasar sa eskwela, pagpangita og kapikas sa kinabuhi, pangita og trabaho, kapuy-an, pagpadako sa mga bata sa kalibutan nga nabali. Ang inyong mga anak mahimutang sa daghan kaayo labaw pa kaysa atong henerasyon.

Kami nakabantay, samtang kami nagbiyahe alang sa Simbahan, nga ang atong mga batan-on mas lig-on kaysa kanhi. Sa dihang makadungog ako kanila nga mamulong sa mga komperensya ug sa miting sa sakrament, makadungog ako kanila nga mokutlo sa mga kasulatan, ug makadungog ako kanila nga nanalipod sa mga sumbanan. Wala ako makadungog sa matahapon nga mabiay-biayon nga kinaiya niadtong kinsa dili matinud-anon ug dili tinud-anay nga nakabig.

Kami nagdumala og usa ka simbahan nga adunay labaw sa 13 ka milyon nga mga miyembro ug nagtubo. Ang Simbahan anaa na sa tibuok kalibutan. Kadaghan niini internasyonal na karon. Daghang mga miyembro sa Simbahan walay oportunidad sa pag-eskwela og kolehiyo, apan sila nagsunod sa ebanghelyo. Ug kini usa ka talagsaon, makapatandog kaayo nga makita sila ug makauban sila.

Samtang kami naghunahuna kaninyo batan-on nga mga Santos sa Ulahing mga Adlaw ug naghunahuna sa Basahon ni Mormon ug naghunahuna sa damgo o panan-awon nga nasinati ni Lehi, atong makita nga adunay mga panagna nga anaa didto nga magamit gayud sa inyong kinabuhi. Basaha kini pag-usab, sugod sa 1 Nephi 8, ug basaha ang tambag nga gihatag niini. Ang Basahon ni Mormon naghisgut kabahin sa kinabuhi human sa kamatayon: unsa ang mahitabo sa espiritu (tan-awa sa Alma 40:11–12) ug unsa ang mahitabo sa kalibutan sa espiritu (tan-awa sa 2 Nephi 2:29; 9:10–13). Ang tanang mga butang nga inyong kinahanglan nga mahibaloan anaa didto. Basaha kini, ug himoa kining kabahin sa inyong kinabuhi. Dayon ang pagpanaway o pagbiay-biay sa kalibutan, nagbiay-biay niadtong anaa sa Simbahan, nga mahimong dili na inyong problema sama nga kini dili na namo problema (tan-awa sa 1 Nephi 8:33). Kita magpadayon lamang sa pagbuhat sa mga butang nga gipabuhat nato ug hibaloi nga ang Ginoo naggiya kanato.

Mag-ampo ako sa mga panalangin sa Ginoo diha kaninyo sa inyong buluhaton. Mag-ampo ako sa mga panalangin sa Ginoo diha kaninyo sa inyong kinabuhi samtang kamo mopadayon gikan sa kabuntagon sa inyong sa kinabuhi, asa kamo karon, ngadto sa ulahing kagabhion sa inyong kinabuhi, kon asa anaa ako karon, nga kamo masayud nga ang ebanghelyo ni Jesukristo tinuod. Kamo mosagubang og daghang dagko ug masamok ug lisud nga mga butang sa inyong kinabuhi, ug kamo makatagamtam og hilabihan nga pagdasig ug hingpit nga kalipay sa inyong kinabuhi.

Kamo mas maayo kay kanamo kaniadto. Aduna akoy konbiksyon batok sa unsa ang sigurado nga moabut ug ang mga panagna nga nahatag, ang Ginoo nagreserba og espesyal nga mga espiritu sa pagpadala niining panahona sa pagsiguro nga ang Iyang Simbahan ug gingharian mapanalipdan ug magpadayon sa kalibutan. Isip usa ka sulugoon sa Ginoo, mangamuyo ako sa Iyang panalangin diha kaninyo ug mopamatuod kaninyo nga ang ebanghelyo tinuod.

Paghulagway pinaagi ni Robin Luch

Ang Damgo ni Lehi, pinaagi ni Greg Olsen, dili mahimong pakopyahan; paghulagway sa litrato pinaagi ni John Luke

Paghulaway pinaagi ni Daniel Lewis