Biyai ang Party!
Sonrisa Oles Hasselbach, California, USA
Daghang katuigan ang milabay aduna akoy kahigayunan nga magrepresentar sa estado sa Utah sa usa ka tibuok nasud nga konbensyon sa Ohio nga gitambungan sa mga swimmer sa high school.
Ang among pagpuyo didto naglakip og mga party alang sa mga atleta. Sa akong pag-adto sa party sa unang gabii, akong gituohan nga susama ra kini sa makalingaw nga mga party nga gihimo sa panimalay—mag-inom og root beer ug magdula. Apan sa akong pagsulod sa kwarto, akong nakita kon unsa nga matang kini nga party.
Diha-diha dayon, nasabtan nako ang gipasabut sa mga artikulo sa mga magasin sa Simbahan nga nag-ingon, “Ikaw kinahanglan nga magpaila kon ikaw lamang ang anaa diha nga miyembro sa Simbahan.” Sa laing paagi ang kaubanan nakong mga atleta nakamatikod na nga ako usa ka Santos sa Ulahing mga Adlaw. Nag-anam og kahilum ang kwarto, ug ang tanan ingon og mitutok kanako samtang mitakus ako sa panaksan.
“Hoy,” adunay miingon, “Mormon ka, dili ba?”
Mapasigarbuhon akong mipahiyom ug miingon, “Tinuod kana, ug malipayon nga usa ako niini.”
Nagpadayon ang party, apan gibati nakong daghan ang nagtan-aw kanako, nagbantay sa tanan nakong lihok. Wala madugay, ang party nagsugod sa pagkasamok kaayo. Dili ako sigurado kon unsa pa kasamok ang mahitabo, apan dili ko gusto nga mahimong kabahin niini. Kon magpabilin ako, nahadlok ako nga tingali og makahatag ko sa mga two og sayop nga impresyon sa akong mga sumbanan. Gawas pa, ang Espiritu miaghat kanako sa pagbiya. Dihang akong gikuha ang akong swim bag ug mipadulong sa pultahan, usa sa mga lalaki misinggit, “Hoy, ikaw ba nahadlok kanamo?”
Mipahiyom lamang ako ug miingon, “Magkita lang ta ugma mga higala.” Migawas dayon ako, maayo ang gibati sa ilang pagkaila kanako sa akong pagtambong samtang nanalipod sa mga sumbanan sa Ginoo.
Pagkasunod adlaw panahon sa miting sa mga delegado, usa sa mga delegado mibarug ug isug kaayong miingon, “May butang nga nahitabo kagabii nga dili nako gustong mahitabo pag-usab. Ania kamo dinhi sa pagrepresentar sa inyong estado, mao nga ayoha ninyo kini sa paghimo ug lihok sa tukma nga paagi!”
Dayon midugang siya, “Ang pipila kaninyo mibiya ug wala moapil sa nahitabo. Salamat.”
Sa nahibilin nga mga semana, nakadawat ako og mas dugang nga respeto ug mahigalaong mga ekspresyon nga wala pa gayud nako madawat kaniadto. Daghang mga coach libut sa Estados Unidos miaghat kanako sa pagdagan alang sa usa posisyon sa pagka athlete-representative alang sa western states tungod kay akong narepresentahan ang Utah sa maayo nga paagi.
Wala gayud ako masayud kon unsa ang nahitabo didto sa party, apan mapasalamaton ako nga ang Espiritu miaghat kanako sa pagbiya.