Ang French Horn sa Akong Igsoong Lalaki
Sandy Lauderdale Cane, Missouri, USA
Nagtubo ako nga nakadungog sa tukar sa akong igsoong lalaki nga nagpraktis sa iyang French Horn. Sa matag adlaw, tuig human sa usa ka tuig, ang tingog sa iyang trumpeta molanog gikan sa among balay. Madungog na gani nako kini bisan layo pa ako gikan sa akong eskwelahan sa elementarya.
Kon hagiton man, makiglantugi gayud ako nga ang akong igsoon ang pinakamaayong motukar og Trumpeta masukad. Bisan pa niana, ang padayon niyang pagtukar nakahasol usahay kanako, ug kausa akong gihangyo si mama sa pagpahunong kaniya. Gani dalhon pa niya ang iyang Trumpeta [French horn] sa pagbakasyon!
Paglabay sa mga tuig ako ug ang akong igsoon didto sa usa ka kompetisyon sa musika sa northern California sa campus sa dako nga unibersidad nga wala pa nako maadtoi sukad. Samtang didto kami, ang akong kagrupo sa high school sa pagpanganta maoy nanghawud, nagpasabut nga kami nagkinahanglan nga mopasundayag og usab sa dili madugay nianang adlawa. Gihatagan kami og direksyon kon asa ug kanus-a mag-abut, ug kaming tanan tagsa-tagsa nga nanglakaw. Wala madugay, akong namatngunan nga nag-inusara na diay ako, nagbarug sa tunga sa campus nga nagtan-aw sa tag-as nga mga building. Wala akoy makit-an bisan usa nga akong nailhan, apan nahinumdom ako sa gisulti sa akong mama kon unsay buhaton kon ugaling ako mawala: “Pabilin diha kon asa ka man.”
Nagpabilin ako apan maulaw kaayo sa pagpangutana alang sa direksyon; usa pa, wala ako mahibalo kon asa ako paingon. Wala akoy mahinumduman bisan gamay kon asa kami o kanus-a kami mag-abut. Apan sa kalit ang panghunahuna sa pagpangayo og tabang sa Langitnong Amahan miabut kanako. Dili pa ako miyembro sa Simbahan ninanang higayuna, apan misimba ako kanunay kauban sa akong mga higala nga miyembro sa Simbahan ug natudloan nga ang Langitnong Amahan motubag sa mga pag-ampo.
Didto nagbarug ako ug hilum nga nag-ampo sulod sa akong kasingkasing. Sa wala pa gani ako makalitok og amen, natingkag ang akong mga dalunggan. Didto sa layo, gani sa hilabihan kahinay, akong nadungog ang pamilyar nga tunog—usa ka tunog nga nadungog na nako hapit sa tibuok nakong kinabuhi. Samtang gisugdan nako ang paglakaw padulong sa gigikanan sa musika, nag-anam kini og kalanog. Ang Trumpeta kaha kini sa akong igsoon? Nakasiguro ako nga mao gayud kini.
Apan dayon lahi na usab nga mga Trumpeta ang misugod sa pagtukar. Nagpanuko ako. Ako ba gayud nagtuo nga makaila ako kon asa niadto nga mga tunog sa trumpeta ang sa akong igsoon? Sa matag higayon nga ako magduha-duha, bisan pa, madungog nako ang iyang trumpeta, sama nga nagpangamay kini kanako. Sa akong pagsulod sa building, misaka sa hagdanan, ug nagkaduol sa musika, nag-anam ako og kahadlok. Ang paghunahuna nga basin maablihan unya nako ang dili mao nga pultahan nga makakita og usa ka tawo nga dili nako kaila makapaulaw kanako. Sa akong pag-abut sa ikatulo nga andana, gipaminaw pa nako og kausa, mihimo sa akong desisyon, miginhawa og lawom, ug miabli sa pultahan. Siya gayud!
Gihatagan kita sa Langitnong Amahan sa Iyang Espiritu sa pagtudlo kanato, sa pagpamatuod kanato, sa pagpanalipod kanato, ug paggiya kanato nga luwas kon mobati kita nga nag-inusara ug biniyaan. Makaila kita sa iyang tingog pinaagi sa kanunay nga pagpaminaw niini ug sa pagsinati niini nga atong mailhan kini bisan taliwala sa daghang nagkalain-laing mga tingog nga mopasalaag kanato.
Kinahanglan nga dili nato ikahasol ang Iyang tingog o magpanuko sa pagsunod niini. Kon mangayo kita sa Langitnong Amahan alang sa Iyang tabang ug dayon maminaw, andam sa pagtuman, nasayud ako nga kita makadungog Kaniya.