Pagpuli sa Akong Kahadlok alang sa Gugma

Ashley Johnson Evanson, Utah, USA

Nakita nako siya nga sakay sa bus kada adlaw sa akong pagpauli gikan sa unibersidad. Kanunay siyang nagsul-ob sa mao gihapon nga luag nga T-shirt, guba na nga sapatos nga pang tennis, ug dako nga pahiyom. Kanunay siyang mag-inusara sa paglingkod. Usa siya ka espesyal nga pasahero, bisan pa niana, tungod kay aduna siyay problema sa pangisip.

Matag adlaw ang Espiritu moaghat kanako sa pag-ingon og kumusta kaniya. Sa matag adlaw, bisan pa niana, ang akong garbo mopugong kanako. Nahadlok ako nga basin og adunay tawo nga makakita kanako nga nakigsuod og usa ka tawo nga lahi sa uban. Bisan pa, aduna akoy reputasyon nga angay huptan.

Usa ka hapon panahon sa tingtugnaw, sa dihang kusog kaayo ang Espiritu ug mas maisugon og gamay, misakay ako sa bus, nakita siya sa naandan niyang dapit, ug mitapad kaniya—dili kaayo duol basin og dili pa ako molampus. Sa hapit na ko manaog, mipiyong ako, nag-ampo sa hilum, ug milingi kaniya.

“Hi,” miingon ako nga dili kaayo siguro apan sa mahigalaon nga tingog, “ako si Ashley.”

Sa dihang mipahiyom siya kanako, ang akong kahadlok ug garbo diha-diha nahanaw.

“Ako si Lenny,” mitubag siya nga maulawon.

Tungod niadtong pipila ka mga pulong, nagsugod ang among panaghigalaay.

Sa pagkasunod nga adlaw mitapad na usab ako ni Lenny, apan mas sayon na kini—kami managhigala na. Sa akong paglingkod, mikuot siya sa iyang backpack ug mipagawas og usa ka hinimo sa kamot nga Valentine’s day kard. Kini gipahinungod ngadto “Sa maanyag nga babaye nga akong makita sa bus kada adlaw.”

Ang Valentine’s Day dugay nang milabay, apan si Lenny mihimo niining espesyal nga kard alang kanako ug mapailubong naghulat og higayon sa paghatag niini kanako. Wala nako mapugngi ang mga luha nga midagayday sa akong mga aping. Mapasalamaton kaayo ako nga ang Espiritu wala mobiya kanako ug sa katapusan akong gipadaplin ang akong garbo ug gibuntog ang akong kahadlok sa pagpakig-istorya kang Lenny.

Karon sa matag semana inig ka Dominggo manihapon siya uban kanamo sama nga siya usa ka sakop sa akong pamilya. Sa matag adlaw si Lenny nagtabang kanako nga mahinumdom sa mga panalangin nga miabut pinaagi sa pagkalimot sa garbo ug sa pag-angkon og kaisug sa pagbuhat sa matarung. Ang pagkakita kaniya sa matag adlaw nagpahinumdom kanako sa 1 Juan 4:18: “Ang kahadlok wala diha sa gugma; hinonoa ang hingpit nga gugma nagahingilin sa kahadlok.”

“Hi,” miingon ako sa dili kaayo siguro apan sa mahigalaon nga tingog, “ako si Ashley.”