Mga Panalangin Mosunod Human sa Pagkamasulundon

Te Kuang Ko, Taiwan

Human ako miimbestigar sa Simbahan sulod sa duha ka bulan, ang mga misyonaryo mitudlo kanako kabahin sa balaod sa ikapulo ug midapit kanako sa pagbayad inigka miyembro nako sa Simbahan. Ingon og kini imposible uban sa akong gamay nga kinitaan, apan sa wala pa nako masultihi sila unsa ang akong gibati, among nahuman ang panaghisgutan.

Nianang Dominggo didto sa simbahan, ang presidente sa branch miabi-abi kanako. Nangutana ako kaniya kabahin sa ikapulo, ug siya misaad kanako nga makigkita uban kanako nga kami lang duha human sa mga miting.

Sa dihang kami nagkita, ako mipasabut, “Ang mga misyonaryo nag-ingon kanako nga ako kinahanglan nga mobayad og ikanapulo sa akong kinitaan ngadto sa Simbahan kon ako mamiyembro. Wala ko masayud kon mahimo ba kana nako.”

Human maminaw sa akong problema, ang presidente miabli sa Basahon ni Mormon, mipakli ngadto sa 3 Nephi 24:10, ug mibasa, “Dad-a ninyo ang tanan nga mga ikapulo ngadto sa balay nga tipiganan … ug sulayi Ako karon, miingon ang Ginoo sa mga Panon, kon Ako dili ba moabli kaninyo sa mga bintana sa langit, ug mobu-bu kaninyo og usa ka panalangin nga walay lawak nga igo sa pagdawat niini.” Dayon siya miingon, “Brother Ko, tan-awa pag-ayo diin ang Ginoo miingon, ‘Sulayi Ako karon.’ Kana mao ang Iyang pagdapit kanimo. Nganong dili nimo Siya sulayan pinaagi sa pagbayad og una sa ikapulo sunod bulan ug tan-awa kon Siya dili ba mopanalangin kanimo.”

Sa wala madugay paghuman niadto nagsugod ako sa akong eksperimento uban sa ikapulo ug nagpamiyembro sa Simbahan. Sukad niadtong higayuna nakapalambo ako og bag-ong konsepto sa pagdumala sa kwarta. Labaw sa tanan, nakakat-on ako sa akong kaugalingon nga ang Dios nagbu-bu og usa ka panalangin , ug sukad-sukad walay lawak nga igo sa pagdawat niini. Nakakat-on ako nga kita kinahanglan nga mosunod sa mga sugo sa Dios sa dili pa kita maglaum sa Iyang mga panalangin.