អំណោយដែលផ្លាស់ប្តូរជីវិត នៅឯហាងលក់របស់របរជជុះ
អ្នកនិពន្ធរស់នៅក្នុងរដ្ឋ អារីស្សូណា ស.រ.អា. ។
ខ្ញុំគ្មានប្រាក់ច្រើនទិញអំណោយមួយសម្រាប់ឪពុកចុងរបស់ខ្ញុំឡើយ ដូច្នេះមុនពេលយើងបានទៅទិញទំនិញ ខ្ញុំបានអធិស្ឋាន ។
រូបគំនូរដោយ ប៊េធ ជេពសុន
មានឆ្នាំណាមួយនោះ យើងគ្មានប្រាក់ច្រើនសម្រាប់បុណ្យគ្រីស្ទម៉ាស់ឡើយ ដូច្នេះខ្ញុំបានអធិស្ឋានសុំជំនួយដើម្បី អាចទិញអំណោយមួយសម្រាប់ឪពុកចុងរបស់ខ្ញុំ គឺអេឌ្រាន ( ដែលបងស្រីខ្ញុំ និង ខ្ញុំហៅគាត់ថា វីហ្គី ) ។ បងស្រីខ្ញុំ និង ខ្ញុំមានប្រាក់តែពីរដុល្លារប៉ុណ្ណោះដើម្បីទិញអំណោយ ។
ពេលម្តាយរបស់ខ្ញុំបាននិយាយថាយើងនឹងទៅហាងជជុះនៅក្បែរនោះដើម្បីទិញអំណោយ នោះខ្ញុំបានរត់ទៅក្នុងបន្ទប់ខ្ញុំ ហើយអធិស្ឋានសុំជំនួយ ៖ « សូមជួយពួកយើងទិញអំណោយមួយដែលមានតម្លៃពីរដុល្លារបានផង » ។
នៅហាងនោះ អ៊ីឡេនណា និង ខ្ញុំបានរកមើលនៅកន្លែងសៀវភៅ ហើយបានរកឃើញបណ្ដុំព្រះគម្ពីរដែលទើបចេញថ្មី ។ ពួកយើងរីករាយណាស់ដែលបានឃើញវា ។ ខ្ញុំបានកាន់វាយ៉ាងណែន នៅពេលពេលយើងបានរត់តាមច្រកផ្លូវទៅរកម្តាយរបស់ខ្ញុំ ។ ដោយលោតចុះលោតឡើង យើងបាននិយាយព្រមគ្នាថា « ពួកខ្ញុំរកឃើញអំណោយមួយសម្រាប់វីហ្គីហើយ ! » នៅកន្លែងគិតលុយម្តាយរបស់ខ្ញុំបានសួរថា « តើវាថ្លៃប៉ុន្មាន ? » អ្នកគិតលុយឆ្លើយថា « ពីរដុល្លារ » ។ ខ្ញុំបានទទួលចម្លើយចំពោះការអធិស្ឋានខ្ញុំហើយ ។
កាលនោះឪពុកចុងរបស់យើងពុំមែនជាសមាជិកឡើយ ។ គាត់ពុំចូលចិត្តពួកមរមនឡើយ គាត់ពុំជឿលើ « ព្រះគម្ពីរមរមន » ឡើយ ហើយគាត់ពុំចូលចិត្តឃើញសមាជិកមកយកពួកខ្ញុំទៅសកម្មភាពយុវជន និង យុវនារីឡើយ ។ គាត់ថែមទាំងបានដេញអែលឌើរចេញទៀតផង ។ ប៉ុន្តែសមាជិកវួដ និង អ្នកផ្សព្វផ្សាយសាសនាពុំបោះបង់គាត់ចោលឡើយ ។
នៅថ្ងៃបុណ្យគ្រីស្ទម៉ាស់ យើងបានទុកអំណោយនោះឲ្យគាត់ចុងក្រោយគេ ។ អ៊ីឡេនណា និង ខ្ញុំបាននិយាយថា « នេះគឺជាអំណោយដ៏ល្អបំផុតដែលគ្មាននរណាម្នាក់ធ្លាប់ឲ្យប៉ាឡើយ ! វានឹងធ្វើឲ្យលោកប៉ាសប្បាយចិត្ត » ។ វីហ្គីបានទាយពីរបីដង ហើយយើងបានសើចពេលគាត់ឆ្លើយ ។ យើងបានប្រាប់គាត់ថា « វាគឺជាអំណោយដ៏អស្ចារ្យបំផុត » ។ វានឹងផ្លាស់ប្តូរជីវិតរបស់លោកប៉ា ។ វាបានផ្លាស់ប្តូរជីវិតរបស់ពួកខ្ញុំ » ។
ម្តាយរបស់យើងបានបារម្ភថា គាត់នឹងខឹងពេលគាត់ដឹងថាអំណោយដែលជូនគាត់ជាអ្វី ប៉ុន្តែអ៊ីឡេនណា និង ខ្ញុំដឹងថាវាជារឿងត្រឹមត្រូវមួយដើម្បីធ្វើដូច្នេះ ។
នៅពេលគាត់បានបើកអំណោយនោះមើល គាត់បានអរគុណពួកយើងចំពោះអំណោយនោះ ហើយបាននិយាយថាគាត់នឹងអានវា ។
ដោយសារយើងស្រឡាញ់វីហ្គី នោះយើងចង់ឲ្យគាត់រៀនពីព្រះយេស៊ូវគ្រីស្ទ និង អំណោយនៃដង្វាយធួនរបស់ទ្រង់ ។ យើងចង់ឲ្យគាត់ជឿលើអ្វីដែលយើងធ្វើ អធិស្ឋាន និង ប្រែចិត្ត ហើយមានដំណឹងល្អនៅក្នុងជីវិតរបស់គាត់ ។
គាត់បានអាន ហើយអធិស្ឋានអំពីព្រះគម្ពីរមរមន ហើយដោយមានជំនួយពីអែលឌើរ និង សមាជិកវួដ នោះគាត់បានជ្រមុជទឹក ហើយឥឡូវក្លាយជាសមាជិកសាសនាចក្រ ។ យើងមានសេចក្តីរីករាយដើម្បីផ្សារភ្ជាប់នៅក្នុងព្រះវិហារបរិសុទ្ធ ហើយយើងដឹងថាយើងនឹងរស់នៅជាមួយគ្នាជារៀងរហូតជាក្រុមគ្រួសារ ។