ចម្លើយមកពីថ្នាក់ដឹកនាំសាសនាចក្រ
របៀប យល់ពីអត្ថន័យពិតនៃបុណ្យគ្រីស្ទម៉ាស់
ដោយប្រធាន ឌៀថើរ អេហ្វ អុជដូហ្វ
ទីប្រឹក្សាទីពីរក្នុងគណៈប្រធានទីមួយ
ដកស្រង់ចេញពីការប្រជុំធម្មនិដ្ឋានបុណ្យគ្រីស្ទម៉ាស់របស់គណៈប្រធានទីមួយ ខែធ្នូ ឆ្នាំ ២០១០
នៅពេលយើងរៀបចំសម្រាប់បុណ្យគ្រីស្ទម៉ាស់ដោយការពិចារណាពីអត្ថន័យដ៏ពិតរបស់វា នោះយើងរៀបចំទទួលបទពិសោធន៍អំពីព្រះគ្រីស្ទ និង សារលិខិតរបស់ទ្រង់ ។ សូមឲ្យខ្ញុំផ្តល់យោបល់បីដែលអ្នកចង់សិក្សា ពិចារណា ហើយអនុវត្តការរៀបចំនេះនៅក្នុងរដូវកាលនេះ ។
ទីមួយ សូមរីករាយជាមួយនឹងការប្រសូតរបស់ព្រះអង្គសង្គ្រោះរបស់យើង ។ យើងប្រារព្ធខួបកំណើតរបស់ព្រះរាជបុត្រានៃព្រះ ព្រះដ៏បង្កបង្កើត ឬ ព្រះមែស៊ី ។ យើងរីករាយថាស្តេចនៃអស់ទាំងស្តេចបានយាងមកផែនដី ប្រសូតនៅក្នុងស្នូក ហើយបានរស់នៅក្នុងជីវិតដ៏ល្អឥតខ្ចោះ ។ នៅពេលព្រះយេស៊ូវប្រសូត នោះមានសេចក្តីអំណរយ៉ាងខ្លាំងនៅលើឋានសួគ៌ដែលពុំអាចកំណត់បាន ( សូមមើល លូកា ២:៨–១៤ ) ។
ទីពីរ សូមពិចារណាពីព្រះចេស្តារបស់ទ្រង់នៅក្នុងជីវិតរបស់យើងសព្វថ្ងៃនេះ ។ បុណ្យគ្រីស្ទម៉ាស់គឺជាពេលមួយដើម្បីចងចាំដល់ព្រះរាជាបុត្រានៃព្រះ ហើយរំឭកការប្តេជ្ញាចិត្តរបស់យើងដើម្បី លើកដាក់មកលើខ្លួនយើងនូវព្រះនាមរបស់ទ្រង់ ។ វាជាពេលដែលគិតពីជីវិតរបស់យើងឡើងវិញ ហើយពិនិត្យមើលពីគំនិត អារម្មណ៍ និង សកម្មភាពរបស់យើង ។ ចូរឲ្យឱកាសនេះជាពេលមួយនៃការចងចាំ អំណរគុណ និងជាពេលនៃការអភ័យទោស ។ ចូរឲ្យវាក្លាយជាឱកាសមួយដើម្បីពិចារណាពីដង្វាយធួនរបស់ព្រះយេស៊ូវគ្រីស្ទ និង អត្ថន័យរបស់វាសម្រាប់យើងផ្ទាល់ខ្លួនម្នាក់ៗ ។ ជាពិសេសចូរឲ្យវាក្លាយជាពេលមួយនៃការរំឭកជាថ្មី និង តាំងចិត្តជាថ្មី ដើម្បីរស់នៅតាមព្រះបន្ទូលព្រះ ហើយគោរពតាមព្រះបញ្ញត្តិរបស់ទ្រង់ ។ ធ្វើបែបនេះ យើងនឹងគោរពទ្រង់ខ្លាំងជាង ការដែលយើងធ្លាប់មានជាមួយនឹងពន្លឺ អំណោយ ឬ ពិធីជប់លៀងនានា ។
ទីបី សូមរកមើលយ៉ាងខ្ជាប់ខ្ជួនពីការយាងមកជាលើកទីពីររបស់ទ្រង់ ។ អំឡុងពេលនៃរដូវបុណ្យគ្រីស្ទម៉ាស់នេះគឺជាពេលសាមញ្ញមួយដើម្បីត្រឡប់មើលក្រោយ ហើយប្រារព្ធការប្រសូតរបស់ព្រះអម្ចាស់របស់យើង សម្រាប់ខ្ញុំវាហាក់បីដូចជាពេលមួយនៃការប្រមើលមើលពីអនាគតកាល ។ ចូរឲ្យយើងសម្លឹងឆ្ពោះទៅមុខ ។ ចូរយើងរៀបចំខ្លួនសម្រាប់ថ្ងៃដ៏មានពរនោះ នៅពេលទ្រង់នឹងយាងមកម្តងទៀត ។ ចូរយើងមានភាពឆ្លាតវៃដូចមនុស្សជំនាន់ដើមដែលចាំមើលការយាងមករបស់ទ្រង់ ។
ខ្ញុំសូមអធិស្ឋានថា អំឡុងពេលនៃរដូវកាលនេះ ហើយបន្តទៅមុខទៀត នោះយើងនឹងឃើញពីភាពច្បាស់លាស់នៃដំណើររឿងនៃការប្រសូតរបស់ព្រះអង្គសង្គ្រោះ ហើយមានអារម្មណ៍នៃអំណរគុណយ៉ាងស្មោះសរសម្រាប់ព្រះជន្មទ្រង់ ការបង្រៀន និង ការបូជានៃសេចក្តីសង្គ្រោះរបស់ទ្រង់សម្រាប់ពួកយើង ។ សូមឲ្យអំណរគុណនេះ បណ្តាលឲ្យយើងរំឭកពីការប្តេជ្ញាចិត្តរបស់យើងដើម្បីធ្វើតាមទ្រង់ជាថ្មី ។ សូមឲ្យឱកាសនេះនាំយើងខិតកាន់តែជិតទៅគ្រួសាររបស់យើង សាសនាចក្ររបស់យើង និង មនុស្សដែលនៅជុំវិញយើង ។ ហើយសូមឲ្យយើងសម្លឹងយ៉ាងខ្ជាប់ខ្ជួននូវថ្ងៃនៃពរជ័យនោះ នៅពេលដែលព្រះគ្រីស្ទដែលមានព្រះជន្មរស់ឡើងវិញ នឹងយាងមកលើផែនដីម្តងទៀតក្នុងនាមជាព្រះអម្ចាស់របស់យើង ស្តេចរបស់យើង និង ព្រះអង្គសង្គ្រោះដែលប្រទានពរដល់យើង ។