សំណួរ និង ចម្លើយ
« ខ្ញុំមានអារម្មណ៍ថាអសមត្ថភាពធ្វើជាប្រធានថ្នាក់យុវនារី ។ តើខ្ញុំអាចក្លាយជាអ្នកដឹកនាំល្អប្រសើរម្នាក់ដោយរបៀបណា ? »
បើសិនអ្នកមានអារម្មណ៍ថាអ្នកអសមត្ថភាព នៅពេលអ្នកទទួលការហៅបម្រើអ្វីមួយ នោះវាជារឿងសាមញ្ញទៅហើយ ។ យេរេមា អេណុក និង យ៉ូសែប ស៊្មីធ សុទ្ធតែនៅក្មេង ហើយទាំងអស់គ្នាមានអារម្មណ៍ថាអសមត្ថភាពនៅពេលពួកលោកបានទទួលការហៅមប្រើធ្វើជាព្យាការី ប៉ុន្តែព្រះអម្ចាស់នៅតែប្រើពួកលោកដើម្បីពង្រីកនគររបស់ទ្រង់ ។ គឺដូចជាអ្វីដែលព្រះអម្ចាស់បានប្រើពួកព្យាការីពីបុរាណដើម្បីសម្រេចបាននូវរឿងអស្ចារ្យនានា នៅពេលអ្នកអធិស្ឋាន ហើយពឹងផ្អែកលើទ្រង់ នោះទ្រង់អាចប្រើអ្នក ។
ប្រហែលជាអ្វីមួយដ៏ល្អបំផុតដែលអ្នកអាចធ្វើបានសម្រាប់សមាជិកក្នុងថ្នាក់របស់អ្នកនោះគឺជាធ្វើជាមិត្តភក្តិរបស់ពួកគេ ។ សូមរៀនស្គាល់ឈ្មោះរបស់ពួកគេ ។ អ្នកអាចអធិស្ឋានសម្រាប់ពួកគេរាល់ថ្ងៃ ហើយប្រហែលជាតមអាហារសម្រាប់ពួកគេ បើសិនពួកគេមានការលំបាក ។ សូមគិតពី ការសួរសំណួរអំពីជីវិតរបស់ពួកគេក្រៅពីជីវិតនៅក្នុងព្រះវិហារ ញញឹម ហើយស្វាមគមន៍ពួកគេ នៅទីណាដែលអ្នកជួបពួកគេ ហើយអង្គុយជាមួយពួកគេនៅព្រះវិហារ ឬ នៅសាលារៀន ។ សូមព្យាយាមរកមើលឲ្យឃើញនូវអស់អ្នកដែលត្រូវការសេចក្តីស្រឡាញ់ និង ការគាំទ្របន្ថែម ។
ហើយសូមកុំខ្លាចដើម្បីសុំជំនួយឡើយ ។ ព្រះវរបិតាសួគ៌នឹងមិនទុកឲ្យអ្នកនៅតែឯងឡើយ — ទ្រង់បានប្រទានទីប្រឹក្សា និង អ្នកប្រឹក្សាពួកយុវមជ្ឈិមវ័យដល់អ្នក ។ ពួកគេនឹងជួយអ្នក ហើយទ្រង់ក៏នឹងជួយអ្នកដែរ ។
ដូចប្រធាន ហ្គរដុន ប៊ី ហ៊ិងគ្លី ( ១៩១០–២០០៨ ) បានមានប្រសាសន៍ ៖ « សូមលុតជង្គង់ចុះ ហើយសុំពរជ័យពីព្រះអម្ចាស់ បន្ទាប់មកឈរយ៉ាងរឹងប៉ឹង ហើយធ្វើនូវអ្វីដែលអ្នកត្រូវបានស្នើឲ្យធ្វើ ។ បន្ទាប់មកសូមទុកបញ្ហានោះនៅក្នុងព្រះហស្តរបស់ព្រះអម្ចាស់ចុះ ។ អ្នកនឹងឃើញថាអ្នកបានសម្រេចនូវអ្វីៗជាច្រើនដែលលើសពីតម្លៃ » ( « To the Women of the Church » Liahona, ខែ វិច្ឆិកា ឆ្នាំ ២០០៣ ទំព័រ ១១៤ ) ។
ធ្វើជាមិត្តភក្ដិនឹងគ្នា
ក្នុងនាមជាប្រធានថ្នាក់ ខ្ញុំក៏មានអារម្មណ៍អសមត្ថភាពផងដែរ។ ប៉ុន្តែវាសំខាន់ដើម្បី ព្យាយាមធ្វើឲ្យយុវនារីមានអារម្មណ៍នៃសេចក្តីស្រឡាញ់ និង រួមចំណែក ។ សូមធ្វើជាមិត្តភក្តិដែលគាំទ្រ ហើយស្តាប់ទីប្រឹក្សារបស់អ្នកនៅពេលធ្វើការសម្រេចចិត្តនានា ។ សូមធ្វើជាគំរូសុចរិត ហើយព្យាយាមរស់នៅតាមគុណសម្បត្តិនៃក្រុមយុវនារី ប៉ុន្តែកុំរំពឹងថាខ្លួនឯងក្លាយជាល្អឥតខ្ចោះឡើយ ។ អ្វីៗទាំងអស់ដែលព្រះវរបិតាសួគ៌រំពឹងចង់បានពីអ្នកនោះ គឺព្យាយាម ។ បើសិនអ្នកអំពាវនាវដល់ទ្រង់ នោះទ្រង់នឹងផ្តល់កម្លាំងដល់អ្នក និង ការណែនាំដែលអ្នកត្រូវការ ។
រ៉េបេកា អែន អាយុ ១៦ ឆ្នាំ រដ្ឋ នូវ ហាំស្វែរ ស.រ.អា.
បម្រើដោយមានឆន្ទៈ
ខ្ញុំមានអារម្មណ៍ដូចគ្នាផងដែរ ចាប់តាំងពីខ្ញុំបានក្លាយជាប្រធានថ្នាក់ ម៉ៃម៉េត ។ ខ្ញុំនៅតែចាំពីអារម្មណ៍ដែលខ្ញុំបានមាន នៅពេលខ្ញុំចូលទៅការិយាល័យរបស់ប៊ីស្សពសម្រាប់ការសម្ភាសន៍ ។ ខ្ញុំអាចបដិសេធបាន ប៉ុន្តែខ្ញុំបានដឹងថាវាមិនមែនជាការចាត់តាំងមកពីប៊ីស្សពរបស់ខ្ញុំឡើយ — វាគឺជាការហៅបម្រើមកពីព្រះ ។ ព្រះវរបិតាសួគ៌នឹងជួយយើងបំពេញការហៅបម្រើរបស់យើង បើសិនយើងមានឆន្ទៈចុះចូលខ្លួនយើងចំពោះទ្រង់ ហើយបន្ទាបខ្លួន ។
នីខូល ភី អាយុ ១៦ ឆ្នាំ ប្រទេស ហ្វីលីពីន
ស្រឡាញ់អ្នកទាំងឡាយដែលអ្នកបម្រើ
ដើម្បីក្លាយជាអ្នកដឹកនាំកាន់តែប្រសើរ នោះអ្នកត្រូវតែស្រឡាញ់មនុស្សដែលអ្នកបម្រើ ។ សូមបោះបង់ចោលនូវការច្រណែនឈ្នានីស ហើយមានការអភ័យទោសគឺជារឿងចំបាច់ណាស់ ។ អ្នកអាចអធិស្ឋានដើម្បីឃើញពីភាពសក្តិសមរបស់ពួកគេដូចដែលព្រះទតឃើញ ។ សូមអធិស្ឋានសុំសេចក្តីស្រឡាញ់ដែលទ្រង់មានចំពោះអ្នក ព្រមទាំងចំពោះសមាជិកក្នុងថ្នាក់របស់អ្នកផងដែរ ។ ខ្ញុំដឹងពីបទពិសោធន៍នេះថា ការអភិវឌ្ឍន៍ខ្លួនអាចជួយអ្នកបង្កើនគុណសម្បត្តិ និង គុណតម្លៃដ៏ចាំបាច់ដើម្បីបំពេញការហៅរបស់អ្នក ។ ព្រះនឹងប្រទានអំណាចដល់អ្នក បើសិនអ្នកនឹងសុំជំនួយនោះ ។
ម៉ារី ប៊ី អាយុ ១៦ ឆ្នាំ រដ្ឋ វ៉ាស៊ីនតោន ស.រ.អា.
សូមចាប់ផ្តើមពីខ្លួនអ្នក
អ្នកអាចក្លាយជាអ្នកដឹកនាំកាន់តែប្រសើរ ដោយអនុវត្តគុណសម្បត្តិនានាដែលអ្នកចង់មាន ។ សូមអធិស្ឋានសុំព្រះវិញ្ញាណឲ្យគង់នៅជាមួយនឹងអ្នកនៅពេលអ្នកធ្វើការសម្រេចចិត្ត ។ សូមអធិស្ឋានដើម្បីផ្តល់ការយកចិត្តទុកដាក់លើតម្រូវការរបស់ពួកយុវនារី ។ មានអ្វីជាច្រើនដែលអ្នកអាចធ្វើដើម្បីក្លាយជាអ្នកដឹកនាំកាន់តែប្រសើរ ប៉ុន្តែខ្ញុំយល់ថាជំហានដំបូងនោះគឺការជឿថាអ្នកអាចធ្វើបានជានិច្ច ។
សាវ៉ាន់ណា ភី អាយុ ១៥ ឆ្នាំ នៅ រដ្ឋ តិចសាស ស.រ.អា.
ចូលរួមព្រះវិហារបរិសុទ្ធ
កាលខ្ញុំទើបតែបានហៅជាប្រធានកូរ៉ុមឌីកុន នោះខ្ញុំពុំប្រាកដឡើយពីរបៀបដើម្បីបង្កើនសមត្ថភាពខាងវិញ្ញាណរបស់ខ្ញុំ ។ ខ្ញុំបានចាប់ផ្តើមធ្វើកិច្ចការពង្សប្រវត្តិ ជាធម្មតានៅរាល់ថ្ងៃអាទិត្យ ។ ខ្ញុំបានទៅព្រះវិហារបរិសុទ្ធរាល់ពេលព្រឹកថ្ងៃសៅរ៍ ។ គោលដៅរបស់ខ្ញុំគឺយកឈ្មោះបុរសៗ ធ្វើបុណ្យជ្រមុជទឹក និង ទទួលពិធីបញ្ជាក់ឲ្យកាន់តែញឹកញាប់តាមដែលខ្ញុំអាចធ្វើបាន ។ ក្រោយពីខ្ញុំបានទៅព្រះវិហារបរិសុទ្ធរាល់សប្តាហ៍មក ខ្ញុំមានអារម្មណ៍ខាងវិញ្ញាណកាន់តែច្រើនជាងមុន ហើយថាតាមការធ្វើរបៀបនោះខ្ញុំអាចជួយកូរ៉ុមរបស់ខ្ញុំបានកាន់តែល្អ ។
ចូស ប៊ី អាយុ ១៣ ឆ្នាំ រដ្ឋ យូថាហ៍ ស.រ.អា.
សូមធ្វើតាមការបំផុសគំនិត
បើសិនព្រះអម្ចាស់បានផ្តល់ការហៅបម្រើមួយដល់អ្នក វាគឺដោយសារមានកិច្ចការមួយដែលអ្នកអាចធ្វើបាន ។ យើងត្រូវតែទូលសុំដល់ព្រះ ដូច យ៉ាកុប ១:៥ បាននិយាយ ។ តាមរយៈព្រះចេស្តានៃព្រះវិញ្ញាណបរិសុទ្ធ នោះវានឹងត្រូវបានបើកបង្ហាញដល់ពួកយើងនូវអ្វីដែលពួកយើងគួរតែធ្វើ ( សូមមើល នីហ្វៃទី ២ ៣២:៥ ) ។ ដោយមានជំនួយពីទ្រង់ នោះយើងអាច « នឹងដឹងនូវសេចក្តីពិតនៃគ្រប់ការណ៍ទាំងអស់ » ( មរ៉ូណៃ ១០:៥ ) ។ បន្ទាប់មកយើងត្រូវតែធ្វើតាមការបំផុសគំនិតដែលយើងទទួលបាននោះ ។ ខ្ញុំមានការជឿជាក់យ៉ាងជ្រាលជ្រៅថា ដោយសារព្រះអម្ចាស់ជាអង្គដែលដឹកនាំពួកយើង នោះយើងអាចតម្កើងការហៅរបស់យើងទាំងអស់បាន ។
លូស៊ី ឌី អាយុ ១៧ នៅប្រទេស បារាំង
ដាក់ផែនការធ្វើសកម្មភាពដែលស្អាងគ្នា
សូមធ្វើការប្រជុំជាទៀងទាត់ជាមួយគណៈប្រធានរបស់អ្នក ហើយដាក់ផែនការធ្វើសកម្មភាពដែលស្អាងគ្នា ដែលបំពេញសេចក្តីត្រូវការ និង ចំណាប់អារម្មណ៍របស់យុវនារី ។ នៅពេលយុវនារីម្នាក់នៅក្នុងថ្នាក់របស់អ្នកពុំបានចូលរួមថ្នាក់ សូមឲ្យនាងដឹងថាអ្នកនឹកនាង ។ ខគម្ពីរមួយដែលបានជួយខ្ញុំនោះគឺ ម៉ូសាយ ១៨:៩ ។
ការ៉ែន ភី អាយុ ១៦ ឆ្នាំ ប្រទេស ម៉ិកស៊ីកូ