ការអភិវឌ្ឍន៍ខ្លួនជាមួយ កម្មវិធីមែកធាងគ្រួសាររបស់ខ្ញុំ

ដោយ រៀសា ម៉ាខុនដេស

អ្នកនិពន្ធរស់នៅម៉ាណាអុស ប្រទេសប្រេស៊ីល ។

បងប្រុសខ្ញុំ និង ខ្ញុំគឺជាសមាជិកសាសនាចក្រតែពីរនាក់ក្នុងគ្រួសាររបស់ខ្ញុំ — យ៉ាងហោចណាស់ នោះគឺជាអ្វីដែលខ្ញុំបានគិតពីមុនការចាប់ផ្តើមកិច្ចការពង្សប្រវត្តិរបស់ខ្ញុំ ។

Illustration of a girl reaching out to ancestors on her family tree

ខ្ញុំបានពន្យាពេលធ្វើពង្សាវតារបស់ខ្ញុំជានិច្ច ។ ប៉ុន្តែបំណងប្រាថ្នារបស់ខ្ញុំដើម្បីបម្រើបេសកកម្មបាននាំខ្ញុំឲ្យដាក់គោលដៅជួយរៀបចំខ្លួនខ្ញុំឲ្យធ្វើជាអ្នកផ្សព្វផ្សាយសាសនាដ៏ល្អ ។ ដោយមានជំនួយពីប៊ីស្សពដ៏បំផុសគំនិត ខ្ញុំបានសម្រេចចិត្តបំពេញសៀវភៅ ការអភិវឌ្ឍន៍ខ្លួន ។ ដើម្បីសម្រេចបាននូវគោលដៅជាក់លាក់ ព្រមទាំងគម្រោងកិច្ចការល្អ នោះខ្ញុំត្រូវតែធ្វើកិច្ចការពង្សាវតា ។ ដូច្នេះខ្ញុំបានទៅធ្វើកិច្ចការនោះ ។

ខ្ញុំដឹងថាព្រះវិញ្ញាណបានដឹកនាំខ្ញុំ ដោយសារនៅយប់ថ្ងៃអាទិត្យមួយនោះ បន្ទាប់ពីធ្វើកិច្ចការនោះអស់បីម៉ោងមក មានហេតុដ៏អស្ចារ្យមួយបានកើតឡើង ។

នៅពេលខ្ញុំបានចាប់ផ្តើម ខ្ញុំបានចាំថាជីតាលួតរបស់ខ្ញុំគឺជាអភិបាលរដ្ឋ អាម៉ាហ្សូនណាស់ ប្រទេសប្រេស៊ីល ។ ដូច្នេះខ្ញុំបានវាយឈ្មោះរបស់គាត់លើអ៊ិនធើរណែតស្រាវជ្រាវរកគាត់ ហើយខ្ញុំមានការភ្ញាក់ផ្អើល ខ្ញុំបានឃើញគេហទំព័រ Wikipedia ទាំងអំពីជីតាលួត និងជីដូនលួតខ្ញុំផងដែរ ! ភ្លាមនោះខ្ញុំបានដឹងពីទេពកោសល្យ និង អំណោយទានដែលខ្ញុំមានពីពួកលោក ហើយខ្ញុំមានអារម្មណ៍ក្តុកក្តួលក្នុងចិត្តឡើង ។ ប៉ុន្តែ មានអ្វីជាច្រើនទៀតដែលខ្ញុំបានរកឃើញ ។

ដោយការមើលតាមតំណភ្ជាប់នៃគេហទំព័រនោះ ខ្ញុំបានឃើញថាមានតំណភ្ជាប់មួយដាក់ថា « មែកធាងគ្រួសារ » ។ ខ្ញុំបានចុចលើវា ហើយខ្ញុំបានឃើញមែកធាងនៃគ្រួសាររបស់ខ្ញុំដែលខ្ញុំមិនធ្លាប់ដឹងថាមានសោះ ។ ប៉ុន្តែអ្វីដែលធ្វើឲ្យខ្ញុំចាប់អារម្មណ៍បំផុតនោះគឺឈ្មោះរបស់យាយខ្ញុំគឺ រ៉ូសាលីណា មើរេលេស បានបង្ហាញថាបានរស់នៅរដ្ឋ យូថាហ៍ ។

ខ្ញុំមានការភ្ញាក់ផ្អើលណាស់ ។ ខ្ញុំបានគិតថាមានតែបងប្រុសខ្ញុំ និង ខ្ញុំប៉ុណ្ណោះ ដែលជាសមាជិកសាសនាចក្រ ។ តើអាចមានសមាជិកផ្សេងទៀតក្នុងគ្រួសាររបស់ខ្ញុំជាសមាជិកសាសនាចក្រដែរឬអត់ ? នៅពេលខ្ញុំបានចុចលើឈ្មោះរបស់គាត់ ខ្ញុំបានឃើញតំណភ្ជាប់មួយទៅគេហទំព័រ Facebook ដូច្នេះខ្ញុំបានទាក់ទងគាត់ ។ ក្នុងពេលតែពីរថ្ងៃប៉ុណ្ណោះ ខ្ញុំបានទទួលសារមួយពីគាត់ ដោយបញ្ជាក់ថាយើងគឺជាសាច់ញាតិនឹងគ្នា ហើយថាគាត់ក៏ជាសមាជិកសាសនាចក្រផងដែរ ។

ខ្ញុំមានអំណរគុណយ៉ាងខ្លាំងចំពោះព្រះវរបិតាសួគ៌ដែលបានធ្វើឲ្យខ្ញុំមាននូវសេចក្តីអំណរដ៏ធំបែបនេះនៅក្នុងពេលនោះ ។

ខ្ញុំបានចាប់ផ្តើមស្វែងរកជីដូនជីតារបស់ខ្ញុំដែលបានស្លាប់ទៅ ហើយព្រះវរបិតាសួគ៌បានប្រទានពរខ្ញុំដោយបានឃើញឈ្មោះគ្រួសារជាច្រើនទៀតដែលខ្ញុំអាចយកទៅព្រះវិហារបរិសុទ្ធ ។ ប៉ុន្តែទ្រង់ក៏បានជួយខ្ញុំឲ្យរកឃើញសមាជិកគ្រួសារដែលកំពុងរស់នៅផងដែរដែលស្មោះត្រង់នៅក្នុងដំណឹងល្អនៃព្រះយេស៊ូវគ្រីស្ទដែលត្រូវបានស្តារឡើងវិញ ។ ហើយខ្ញុំជំពាក់គុណទាំងនេះចំពោះសៀវភៅការអភិវឌ្ឍន៍ខ្លួន កិច្ចការពង្សប្រវត្តិ និង បំណងប្រាថ្នារបស់ខ្ញុំដើម្បីបម្រើបេសកកម្ម ។