Vakacegu ni Lomaqu

Mai vei Carol F. McConkie

Matai ni Daunivakasala ena Mataveiliutaki Raraba ni Goneyalewa

Niu se yabaki walu, au a raica na parofita, o Peresitedi David O. McKay (1873–1970). A lako mai o koya me vakatabuya e dua na vale ni Lotu vou e Palmyra, New York, Amerika. A gole na noqu matavuvale ki na veivakatabui. E levu tale na tamata era a gole mai. Keimami a marau taucoko ni raica na parofita!

Au a ka lailai sara, ka sa dredre vei au meu rai wavolita na tamata taucoko. Ia au a rawa ni vakila ga na loloma nei Peresitedi McKay. Ena dua ga na gauna lekaleka, au a raica na uluna vulavula kei na matana lomani. Au a vakasamataka, “Oqo sa irairai saraga ni dua na parofita ni Kalou.” Au a sa wilika me baleti ira na parofita ena ivolanikalou, ia oqo sa imatai ni gauna meu raica kina vaka-tamata e dua na parofita se dua tale na Vakaitutu Raraba. Au a vakila ni ra sa tamata dina na parofita. Ka ra lomani keda!. Au na dau nanuma tu ga na loloma kei na vakacegu au a vakila ena siga koya.

Niu se yabaki 11, au a sotava tale e dua na ka ka a vukei au meu yalo vakacegu e lomaqu. E sa basika tiko mai na koniferedi ni iteki, ka meu na lagasere ena matasere ni iteki. Sa dua na ka noqu marau! Au a daramaka e dua na sote vulavula totoka, kau vakila niu duatani saraga. Na sere keimami lagata e koto kina na veivosa mai na Joni 14:27, “Au sa laiva vei kemudou na vakacegu, au sa solia vei kemudou na noqu vakacegu: au sa sega ni solia vei kemudou, me vaka sa solia ko vuravura. Me kakua ni rarawa na yalomudou, se rere.”

E a tara vakaidina na yaloqu na veivosa oya, kau sa nanumi ira tu mai na gauna oya. Niu lagata na veivosa oya, au kila ni ra sa dina. Au vakila ni tukuna vei au na Yalo Tabu na muri voli i Jisu Karisito ena vukea meda yalo vakacegu. Mai na gauna oya, niu sotavi bolebole tu vakacava, ena votu mai vei au na ivolanikalou oqo ka vakacegui au. Na dina au a vulica niu se gone e sa vakalougatataka taucoko na noqu bula.