CAKACAKATAKA NOQU Vakacegui
Na dauvolaivola e vakaitikotiko e New York, Amerika.
A sega ni lako vinaka voli na noqu mataitaka na taba piano, dina ga ni oti e vica vata na yabaki ni vakatovotovo. Rau a tukuna na noqu itubutubu ni na dua ga na vuna au na rawa ni vakacegu kina. Sa dodonu meu na vulica e 50 na sere ni lotu.
Au a curubotolaki ki na noqu vale, ni turuyauyau voli na wai ni mata ni baci oti tale e dua na vuli piano veilecayaki. E sa ikava ni yabaki ni noqu tauri piano voli, kau se sega ni vakavinakataka rawa na “Twinkle, Twinkle, Little Star.” A tovolea o noqu qasenivuli me raica e dua na ka yaga me kaya me baleta na noqu vakatagi vereverea, ia au a torosobu ga. Rau a saumi lavo voli na noqu itubutubu me baleta na vuli piano e so au a sega ni vinakata ka sega ni vakanuinui kina.
Au a vinakata me rau vakacegui au na noqu itubutubu. “Yalovinaka,” au a vakamamasu. “Au na cakava e dua ga na ka. Na cava ena vuna?”
Ni oti na nodrau veivosakitaka vata, rau a kaya, “Kevaka o vulica e 50 na sere ni lotu, keirau na vakacegui iko.”
Au a tekivu vakatovotovo sara. Sa kalevu saraga na noqu via vakacegu sa lomaqu voli meu vakayagataka e so tale na gauna ena piano. Na matai ni sere ni lotu, “Turaga Keitou Vuabale” (Sere ni Lotu, na. 10), a taura voleka ni dua na vula na kena kilai vinaka. E a lomaqu voli ga meu cegu, kau sa tomana tikoga na vakatovotovo.
Dua na ka vakamareqeti a yaco: e sa rawarawa tikoga ni kilai vinaka na sere ni lotu e so. Au a mamarau saraga ena macawa taucoko. Au sa rawa ni gugutaka voli na sere ni lotu ena siga ka lagata vakalevu cake ena soqoni ni sakaramede.
Kena itinitini, au a sega ni wilika rawa na levu ni sere ni lotu au sa kila tu. Ena noqu sa tekivu kila vakamatai mai na piano, au vakila niu sa rawa ni vulica vinaka sara vakavoleka e dua na sere ni lotu ena loma ni 30 na miniti.
Niu sa qai mai soqoni ira kece vakatautauvata, au sa vulica rawa ni sivia na 50 na sere ni lotu. Ka sa sega ni rawa vei au meu na vakaceguya na vakatagitaki ni piano. Sa yaco tu meu mai yalodei vakalevu cake ena kila e so ni noqu vakatagitaka kau sa vakila na kaukauwa ni sere ni lotu ena noqu bula.
Era sa vaka na ivolanikalou na sere ni lotu; era vosataka na ka dina. Niu vakatagitaka na sere ni lotu, au vakila ni vaka meu dromuci au tiko ena ivolanikalou. Na vulici ni kena vakatagitaki na sere ni lotu e sa mai ivakatekivu ni kena taraicake na noqu ivakadinadina kei na vulici ni ka dina. Au sa mai lako curuma voli na veivosa ni sere ni lotu duidui e so me vukei au ena qaravitavi ena veisiga. Na vakatagitaki ni piano e sa vaqaqacotaka na noqu ivakadinadina ka sa tadolava vei au na katuba ena vanua cavaga au lako kina.