Nodra Gauna na Daukaulotu Qase

Mai vei Elder Russell M. Nelson

Peresitedi ni Kuoramu ni iApositolo Le Tinikarua

E dua na sala vinaka duadua me ra cakava kina na veiwatini qase e dua na balolo ni vakanananu vinaka sai koya me ra laki kaulotu vata.

iVakatakilakila

senior missionary couple

Ni ra guilecava e dua na ka o ira na noda itokani yabaki 60 se 70, eda dau veiwalitaka na guiguileca oya me “isa sa qase.” Ia au vinakata meu tukuna e dua tale na mataqali gauna ni qase—e dua na gauna vakasakiti sara ka na tawamudu tu na kena vakanananu. Sai koya na gauna erau vakila kina e dua na veiwatini daukaulotu qase ni rau sa cakava sara tikoga na ka e vinakata na Turaga me rau cakava. Ena veigauna vakasakiti vakaoqori erau na qai kila kina:

E tu na veika erau sa sotava ena nodrau bula taucoko me rau wasea, na taledi, kila, kei na kilaka vakosipeli e rawa ni rau vakayagataka me rau vakalougatataki ira kina eso tale.
Na nodrau ivakaraitaki sa ka ni veivakalougatataki vei ira na luvedrau kei ira na luvedra na luvedrau.
Ni rau veiqaravi erau sa bukia tiko na veitokani tudei.
Sa na kaukauwa cake e veisiga na nodrau bula vakawati.
E kamica na veiqaravi ena vuku ni Yacana.

Tarai tiko e Dua na Gauna

Kemuni na noqu itokani veiwatini qase, sa dodonu me tarai cake tiko vei kemuni na mataqali gauna vakaoqo. Vakasamataka mada na italanoa nei Elder Jeffrey R. Holland ena Kuoramu ni iApositolo Le Tinikarua baleta na veika a rawa ni rau cakava e dua na daukaulotu veiwatini qase ka veiqaravi tiko mai Chile. A mate e dua na nona itubutubu e dua vei rau na italatala cauravou. E tiko sara toka vakayawa na peresitedi ni daukaulotu ka sega ni rawa ni yaco totolo yani vei rau na daukaulotu.

“Ia erau veiqaravi tiko ena vanua oya e dua na veiwatini daukaulotu [matua] taleitaki,” e kaya o Elder Holland. “Erau lako mai ka mai tiko vata kei na daukaulotu oqo ka qaravi koya ka vakacegui koya tiko me yacova ni rawa ni qai veitaratara mai na peresitedi ni kaulotu. Era tu na noda daukaulotu gone vivinaka ena neitou tabana ni kaulotu, ia e sega ni dua na daukaulotu gone e rawa ni cakava vua na italatala oya na veika e rawa ni rau cakava na veiwatini.”¹

Na nodrau kila ena gauna oya me rau vakaraitaka ga na yalololoma ena gauna e gadrevi kina. Erau sega ni kauwaitaka me rau vosataka tale e dua na vosa ia na vosa ga Vakarisito ni loloma. Erau sega ni leqataka o rau kevaka erau calata na nona siganisucu e dua na makubudrau se ni vakalougatataki e dua na gonelailai, e dina ni ra gauna bibi sara na gauna oqori. Erau kauwaitaka me rau tiko ena dua na vanua e rawa ni vakayagataki rau kina na Turaga me vakalougatataka na nona bula e dua na Luvena. Ia me vaka ni rau sa tuvakarau tu, sa rawa kina Vua me laiva me rau matataki Koya.

E Vakavuqa ni dau Veiganiti Vinaka na Veiqaravi

Na ka dina, ni sega ni dua na daukaulotu qase e vinaka vua me biuta nona itikotiko. E sega vakakina o Josefa Simici, Brigham Young, John Taylor, kei Wilford Woodruff. E tu na luvedratou kei na makubudratou talega, ka ratou lomana na nodratou matavuvale me vakataki keda ga. Ia eratou lomana talega na Turaga ka vinakata me ratou qaravi Koya. Ena dua na siga eda na sotavi iratou kina na tamata yaloqaqa oqo eratou a veivuke ena kena tauyavutaki na itabagauna oqo. Ni yaco vakakina, eda na reki ni da a sega ni vuni ena gauna e dodonu me da veiqaravi kina.

Eso beka era na vinakata me ra veiqaravi ni ra tiko ga mai vale. Ni oti na kena vakadaberi Aase Schumacher Nelson (sega na isema) tu vakadua ena wilijea e dua na paralase, a leqataka de na sega ni yaco na nona gagadre ni bula taucoko me laki kaulotu vata kei Don na watina. Qai tukuna vei rau nodrau itokani e yasanivale na nona kaulotu veiqaravi ena Lotu ena dua na lololo ni bisopi. Ni sa vakayaloqaqataki, eratou laki veivosaki kei koya na supavaisa ni vanua oya, vakalewena nodrau fomu ni veivakaturi, ka rau kacivi me rau veiqaravi ena rua na siga dua na macawa ena dua na lololo ni bisopi voleka i nodratou.

“E rawarawa ni da vakacegu tu ka vakasamataka, ‘Isa, au sa sega tale ni gadrevi,’” e kaya o Aase Nelson. “Ia oqo au vakila niu gadrevi. Sa noqu ivakadinadina tu oqori.”

O Gadrevi Vakaidina

Kevaka o temaki mo nanuma ni o sega ni gadrevi, meu vakadeitaka tale vei iko ni o gadrevi. E sega ni dua na peresitedi ni kaulotu ena Lotu me na sega ni taleitaka eso tale na veiwatini me ra veiqaravi ena nona tabana ni kaulotu. O ira na qase era veivaqaqacotaki vei ira na daukaulotu cauravou kei na goneyalewa. Era vakarautaka na veitokoni ka na vukei ira tale eso me ra veiqaravi vakavinaka cake ena nodra ilesilesi. Ka rawa beka ni o vakasamataka na kena ibalebale vua e dua na iliuliu ka se qai vica ga na yabaki nona lewena na lotu nona rawa ni yacovi ira na lewe ni Lotu matua? E vakavuqa ni dau isau ni nodra masu na bisopi kei na peresitedi ni tabana na veiwatini qase.

Eda vakayaloqaqataki ira na peresitedi ni kaulotu me ra raici ira na veiwatini me sotavi kina na gagadre ena nodra tabana ni kaulotu. Me ra vaqarai na veiwatini e rawa ni ra veiqaravi mai vei Bisopi. E tu ena LDS.org e vicasagavulu na draunipepa ni madigi eso vei ira na veiwatini qase. Ia e bibi duadua, me ra tekiduru na veiwatini ka taroga na Tamada Vakalomalagi ke sa kena gauna me ra lako vata yani ki kaulotu. Ena veika kece sara me da vakadonui kina, na gagadre sai koya e bibi duadua (raica na V&V 4:3).

Niu vakacaucautaka tiko na nodra cakacaka na daukaulotu qase, au qai kila ni vuqa sara era vinakata me ra veiqaravi mani sega ni rawa ni vakakina. E dodonu me dau dikevi vinaka na leqa e kauta mai na yabaki ni bula se na tauvimate, ka vakakina na nodra gagadre bibi na lewe ni matavuvale. Ni sa tu na gagadre e loma ia sa tiko na leqa eso vakaoqo, e rawa ni ra yaco me ra yavamu ka ligamu eso tale, ka rawa ni o vakarautaka na ilavo e gadrevi.

Kemuni na veiwatini qase, se evei ga na vanua o drau tu kina, yalovinaka ka masulaka me baleta na madigi oqo mo ni tara cake vata na veigauna cecere vakadaukaulotu qase. Ena vukei iko na Tamada Vakalomalagi mo kila na ka e rawa ni o cakava.