Daukaulotu Qase Gadrevi, Vakalougatataki, ka Lomani
Na veiqaravi ni kaulotu vakaveiwatini ena rawa ni vakarawarawataki, sau lailai, ka na taleitaki sara vakalevu mai na ka o nanuma.
“Rawa beka ni ko lako mai mo mai veivuke?”
O ya e dua na taro erau sa sauma oti o Gerald kei Lorna Malmrose mai Washington, Amerika. Erau a kaya na io ena nona tarogi rau na nodrau bisopi vakacegu ka sa qai peresitedi ni kaulotu se rawa ni rau laki veiqaravi vata kei koya kina West Indies. Erau kaya tale na io ni tarogi rau o nodrau peresitedi ni iteki kevaka e rawa ni rau laki veiqaravi vakadaukaulotu vagauna ena itikotiko liu ni Lotu mai Salt Lake, Utah, e Amerika me rau laki cakacaka ena komupiuta kei na veiqaravi vei ira na tamata cakacaka.
Na gauna e se baci qiri tale mai kina o Reid Robinson na nodrau bisopi ka peresitedi ni kaulotu vakacegu ni sa laki peresitedi tu ni koronivuli ni kaulotu mai Accra, Ghana se rawa ni rau laki veivuke tale kina.
“Keirau kila tu ni rawa ni keirau vakararavi vua na Turaga,” e kaya mai o Elder Malmrose. “Keirau sa qai vakadeitaka me keirau sa vakararavi tale mada Vua.” Rau vakacavara nodrau fomu ni laki veiqaravi, ciqoma nodrau veikacivi, ka rau sa tiko sara oqo mai Ghana.
Veiqaravi vaka-Veiwatini
Na veika erau sa sotava oti na Malmroses e vakaraitaka e so na ivakavuvuli baleti ira na veiwatini qase ka veiqaravi vakadaukaulotu ka sega soti tu beka ni kilai vakalevu:
-
E rua tiko na mataqali kaulotu. (1) Na Peresitedi ni Lotu ena kacivi ira na veiwatini qase mera veiqaravi tikoga mai nodra vale se mera tiko tani mai kina (2) Na peresitedi ni iteki ena kacivi ira na daukaulotu vagauna mera laki veiqaravi vakaveiwatini ena iwasewase se e nodra vanua ga me rauta ni 8 kina 32 na auwa dua na macawa. Era na dau veiqaravi ka vakaitikotiko ga e nodra itikotiko ia ena so na gauna era na tokitaki laivi mai nodra vale.
-
Era sa vakauqeti na peresitedi ni kaulotu mera vakasaqarai ira na veiwatini ka rawa ni ra vukea na gagadre e tiko ena iwase ni vanua ni nodra veiqaravi ka ra qai digitaka na veiwatini na nodra digidigi. “Keitou sega ni tukuna tiko ni sa rawa vei ira na veiwatini mera digitaka na vanua mera veiqaravi kina” e kaya o Elder Jeffrey R. Holland ena Kuoramu ni iApositolo Le Tinikarua. E dua na veikacivi sa ikoya na veikacivi. Ia, keitou dau qai veitalanoa kei ira na veiwatini qase baleta na nodra gagadre ena veiqaravi ka sa dau vakasamataki sara vakavinaka ka vakadonuya na vanua era gadreva mera na veiqaravi kina.”1
-
O ira na peresitedi ni kaulotu mera veidusimaki vei ira na veiwatini ena icakacaka ni kena vakayagataki na nodra kila kei na ka era na rawata. Mera na sotava na veika vakaibalebale ena nodra kaulotu vakaveiwatini, e kaya kina vakaoqo o Peresitedi Robson, “E dodonu me nomuni na madigi ni laki veiqarvi ena vanua o ni taletaka ka kila me rawa ni ko ni na lako ka vakila ni ko ni sa laki solia e dua na isolisoli vinaka.”
Me kena ivakaraitaki, e kila o Peresitedi Robson ni o Elder Malmrose e vosa vaka Varanise ka na veivuke sara vakalevu ni lewe levu mai Aferika era vosa vaka Varanise. Au sa raica ni o koya e vakaitavi vakalevu ena veilakoyaki kei na kerei ni visa,” e kaya o President Robson. “Ia ni yaco mai eke, au a qai vakila ni sega ni tiko e kea na nona kila vakacakacaka. Au sa qai sureti koya me vakayagataka na nona kila matai va-komupiuta. E sa vakabulai keitou o koya ena vica vata na aua. O Elder Malmrose e dau vukei ira vakalevu na daukaulotu vakauasivi o ira na kila na vosa Vakavaranise ka vakarautaka na yaca Vakavaranise ena cakacaka ni valetabu baleti ira na nodra matavuvale. O Sisita Malmrose e dua ka vakaivola ena veiqaravi vakavuniwai e a qai lesi me laki cakacaka vata kei na vuniwai ni kaulotu kei na nasi.
O Koya ena Vakarautaka na Sala
Vakataki rau na Malmrose era sa raica na veiwatini ni ra vakararavi vua na Turaga o Koya ena vakarautaka na sala O ya na ka e yaco vei Alvin kei Corazon Rieta mai Kawit, Cavite, mai na Yatu Filipaini.
“Vo tiko e rua na yabaki me keirau qai mai veivosakitaka na kaulotu keirau sa biuta vata tu e vica na vakatutu baleta na neitou bisinisi ni matavuvale,” e vakamacalataka o Elder Rieta. Na luvei keirau tagane kei na yalewa erau sa tauri ivola oti mai na koliji ka rawa ni rau sa liutaka mai vei keirau ia keirau lomaleqataka se o cei ena walia na leqa vakabisinisi kei na nodra na vakatubu veivosaki na neirau isema ni bisinisi ni ra sa kila na neirau vakatutu.
Leqataka talega o Sisita Rieta ni sa na biuti tinana tu ni sa qase tiko mai. “Au lomaleqataka de na qai yali nona bula ni daru tu yawa mai vei koya,” e a kaya. “Au vakabekataka tale tikoga na noqu na rawa ni laki vakavulica na kosipeli.”
Erau a laki veitalanoa kei nodrau Bisopi kei na dua na veiwatini era sa veiqaravi oti mai Davao. “O ira kece era vakadinadinataka ni Turaga ena veituberi vei ira na veiwatini mera kila na cakava mera cakava baleta na ka era sotava tiko mai vale, nodra matavuvale kei na ilavo baleta nodrau kaulotu,” e a kaya o Sisita Rieta.
“Ni keirau vakasaqara na veituberi,” e a kaya o Elder Rieta, “Na neirau lomaleqa sa vaka e vukei mai lako vinaka na neirau bisinisi dina ga ni tu na bolebole era vakaraitaka na neirau isema ni bisinisi ni ra taleitaka na ka sa yaco tiko ka keitou sa veivolekati sara na matavuvale ena maroroi ni tinaqu sa tauvimate tu. Keitou sa qai tekivu kila mai ni Turaga ena vukei keitou vakaidina.”
O rau na Rieta erau sa veiqaravi tiko ena nodra tokoni na lewenilotu kei na iliuliu ena Tabana ni Kaulotu mai Cagayan de Oro, Yatu Filipaini.
E Levu sara na Ka o Rawa ni Cakava
E so na veiwatini era leqataka na ituvaki ni bula vakayago, ia vei Keith kei Jennilyn Maurman mai Utah, Amerika e rau sega sara ni leqataka oqori. Ena vicavata na yabaki sa oti ka qai oti ga e va na vula na nodrau a vakamau ena Valetabu na Los Angeles California e a vola yaca o Keith ka vakau yani kina ivalu. Ni iliuliu ni dua na ilawalawa ni sotia, e a liutaki ira tiko yani na vo ni sotia qai kacabote e dua na bomu. E a vakayalia ruarua na yavana. Ni sa yaco lesu mai ki vale, e a vakusakusa yani o Jennilyn me laki tiko e yasana.
“Au kila ni sa sega ni dodonu meu lomaleqa,” kaya o Keith “baleta ni keirau sa vakamau tawamudu tu. Sa tokoni au tu o watiqu ena gauna taucoko oqo. Se tokoni au voli ga oqo ena veisiga.”
Ni sa mai cegu na cakacaka o Sisita Maueman, erau sa qai vakadeitaka me rau laki kaulotu. Ia, ena vakaevei li o Elder Maueman ena ituvaki ni nona bula ena vakaleqa li na nodrau lalawa? “E tiko eso na ka au sega ni cakava rawa,” e a kaya. “Ia e tiko e levu na ka au rawa ni cakava keirau kila ni na tiko na vanua me na neirau.”
Na gauna e rau vakalewena tiko kina na nodrau fomu ni vakatutu e a makataka o koya e dua na kato ka vakaraitaka ni a veiqaravi tu ena mataivalu. Vakalailai ga e rau sa ciqoma e dua na qiri mai na Veimaliwai ni Lotu kei na Mataivalu. Tiko vei au e dua na ID card ka na vakatara me keirau curu kina dua ga na itikotiko ni mataivalu ka ratou sa qai kerea mai na neirau veivakadonui me ratou vakatututaka me keirau sa laki kaulotu veimaliwai kei na mataivalu.
Erau sa qai kacivi na Mauermans me rau laki veiqaravi ena itikotiko ni mataivalu mai North Carolina, e Amerika. Nanuma lesu vakaoqo o Elder Mauerman. “Na ivakatakilakila e matamata e a kaya, ‘Fort Bragg, Home of the Airborne.’ Na gauna e kidavaki keirau kina na yadra ena ibole ni vuka e macawa, ‘Vakadua!’ sa imatai ni gauna meu rogoca kina ena vica vata na yabaki. Sa vaka sara ga na tiko mai vale, dina ga niu se bera vakadua ni butuki Fort Bragg. Au sa kila ni neirau veikacivi ni kaulotu sa ivakadei saraga ka sa kilai keirau vinaka sara tu ga na Turaga
“Keirau vakavulica na lesoni ni bula rawati koya kei na igu ni yalo ni rawata kei na vaqaqacotaki ni bula vakawati,” e a kaya o Sisita Mauerman. Ni se qai tekivu keirau a sega ni via wasea na neirau italanoa ia, keirau sa qai raica ni kena wasei sa na vakayaco ka sara ga vakalevu. Era raici keirau na sotia kei ira na watidra ka kaya, ‘kevaka mo drau rawata, keimami na rawata talega.’”
Erau a taleitaka sara vakalevu na Mauerman na veiqaravi mai North Carolina ka rau mani kerea kevaka e rawa ni rau laki veiqaravi tale. Nikua erau lakova tiko rauta ni 40 na maile (64 km) mai na nodrau itikotiko e Orem Utah ki Salt lake vakarua ena dua na macawa me rau laki veiqaravi ena valenivolavola ni Veimaliwai ni Lotu kei na Mataivalu Erau vakavulici ira talega na veiwatini qase mai na koronivuli ni kaulotu mai Provo, na vanua erau kunea kina ena ilawalawa kecega ena tiko kina e dua ka sa lako curuma oti mai na dredre vata ga keirau a sotava me rawa ni ra kaulotu.
iVosavosa Raraba
Ni rau kacivi kina Brazil, Culabi Miission erau a lomatarotaro kina o Randy kei Lou Ellen Romrell. Dina ga ni a laki veiqaravi ki Brazil o Elder Romrell ni se cauravou e a sa vakaweleweletaka voli mai na nona vosa vaka Potukali. Ka sega talega ni kila tu o Sisita Romrell e dua na vosa vaka-Potukali. Na kena sasagataki me vulici e a vukei Elder Romrell me nanuma lesu nona Vosa vaka-Potukali ka kila talega mai kina o Sisita Romrell. Sa vaka talega kina e dua na ukalele.
“Au a sega ni namaka niu na kauta mai,” kaya cake o Sisita Romrell, “ia e a vakauqeti kina o Elder Romrell ka sa veivakadrukai sara ga na ka e sa cakava. Ni keirau vakavulici ira na dauvakatataro ka cakava na veivakabulabulataki kei na veitokoni sa ka talei ni rawa ni vakayagataki me vakauqeti ira na lewenilotu mera lagata na serenilotu. Keirau vulica na vosa ka kauta mai na serenilotu e dua na yalo ni veivakauqeti.
Dina ga ni se bera sara ni kila vinaka na vosa vaka Potukali ia sa taladrodro toka na itovo ni nona veimaliwai. “Na ivakatagi e dau kauti ira vata mai na tamata,” e a kaya “Kevaka sara mada ga au sega ni kila e dua na ka era kaya tiko ena gauna keimami sota kina, na gauna keimami lagasere kina, keimami sa semati sara ga.” Ni keirau sureti me laki vosa kina veikoronivuli baleta na olodei ni Amerika ka vakatokai na “Thanksgiving” erau dau lagata ga na sere ni vakavinavinaka ka tokoni mai na qiri ni ukulele. Dau vakayagataka o Sisita Romrell na piano me veitokoni ena lagati ni serenilotu ena gauna ni lotu.
Vakapotukali? “Kevaka sara mada ga e sega ni taladrodro me vica mada ga na vosa sa talavo oya,” e kaya o Sisita Romrell. “Na vakayadra vei ira na tamata ena veivuke sara vakalevu. Vakaraitaka vei ira ni ko sa vulica tiko. Vakayagataka na ka rawarawa ka vakararavi kina Yalo. Na Yalo, sa ikoya e dua na ivosavosa e rawa ni vakayagataka kece na tamata.
Veiqaravi mai Vale
O Paul kei Mar Jean Lewis mai Utah erau sa kaulotu oti vata vakatolu (Pamyra, New York Temple, Hong Kong, China Temple, kei Croatia, Serbia, kei Slovenaia). Era a vakarau tiko me rau laki veiqaravi tale, ni tarogi rau na nodrau Pereitedi ni iTeki, “Ko drau na vinakata li mo drau veiqaravi tikoga ena nodatou iteki ena tokoni ni vanua ni kaulotu eda bula tiko kina?”
“Keirau mata vou mai eke ka sa ka talei sara vei keirau na madigi totoka oqo,” e a kaya o Sisita Lewis “Keirau veiqaravi vata kei ira na cauravou kei na goneyalewa ka veivolekati sara kei peresitedi ni kaulotu keirau lakova na bose ni tikina kei na iwasewase, ka cakacaka vata kei ira na iliuliu ni kaulotu.” E rau dau sikovi ira na dauvakatataro kei ira era sa mai luluqa tu.
“Keirau sa sotavi ira na tamata vivinaka ka na sega ni a rawa kevaka e sega na mai kaulotu,” e a kaya o Sisita Lewis “wili kina o ira era sa lako sese mai na salatu. Ni da raici ira ni ra sa lesu mai ciqoma na cakacaka vakalotu, ka lako kina valetabu sa dua na ka totoka.”
“E levu na veiwatini ni ra vakasamataka na kaulotu era leqataka na cava era na cakava baleta nodra vale kei na motoka se na cava era na calata mai na nodra matavuvale.” e a kaya o Elder Lewis “Keitou sa bula tu ga ena neitou vale ka draivataka tu na neitou motoka. Keitou vakauqeti me lakova na soqo ni matavuvale me ra kakua ga ni vakaosoosotaki na itavi ni kaulotu. Keirau a mai tiko sara ga e ke ena sucu ni makubui keirau.”
Veivakalougatataki ni Matavuvale
Ena dua tale na yasana, o Jill kei Kent Sorensen, mai na iteki vataga erau kaya ni dua na ka e vaqaqacotaka na nodrau matavuvale sa ikoya nodrau veiqaravi tani mai na nodrau matavuvale. Kaya o Sisita Sorensen, “Dua na iulubale ni nodra sega ni rawa ni laki kaulotu na veiwatini sa ikoya na makubudra, luvedra ka ra sotava tiko na dredre, luvedra yalewa ka vakarau vakasucu tiko, itubutubu sa ra qase tiko mai,—se cava ga era na kaya. Na matavuvale sa dau tu sara ga e liu ka ra na calati sara ga vakalevu ena veisiga. Ia na lako kina kaulotu sa na vakauta e dua na itukutuku bibi sara, ni cakacaka ni kaulotu sa ka bibi talega.”
Ena itukutuku nei Elder Sorensen, “ena levu sara na sala ena rawa tiko kina na veitaratara ena nomu sa na rawa ni tarai ira tiko ena veigauna kece.”
Rau tekivu kaulotu na Sorensen ena tolu na yabaki sa oti, ni a sureti rau nodrau bisopi me rau qarava na soqoni ni yasanibuka ena veivula baleti ira na veiwatini era sa vakananuma tiko mera na kaulotu. “Ni rau sa dau veitalanoataka tiko vakawasoma,” kaya o Sisita Sorensen, “O keirau me keirau sa na lako sara madaga!” Erau a ciqoma na veikacivi me rau laki veiqaravi kina Yatu Kuka, na vanua e a laki veiqaravi kina na Tubui Jill ena 50 na yabaki sa oti.
Nikua mai na veitavi tale e so me rau qarava erau sa dau taura tiko na kalasi ni vuli iVolatabu ena veikoronivuli.
“Keirau dau vakatavuvulitaka ni o Karisito na vatu,” kaya o elder Sorensen. Keirau dau solia vei ira e yadua na vatu ka vakauqeti ira mera tudei vaka na vatu vei Karisito. Nikua era sa dau kaya ga mai ena vanua ga keirau lako yani kina, ‘Vatu kaukauwa.’
Lako Mai ka Veivuke
Kevaka o vakasamataka tiko e dua na kaulotu tudei se kaulotu vagauna, o ira kece na veiwatini oqo era na taroga vei iko na taro vata ga e a taroga o Peresitedi Robison vei Gerald kei Lorna Malmrose. E rawa mo lako mai ka mai veivuke?” Ka ra na tukuna vei iko se na mani vakacava sara na nomu vakaitavi na yalayala ga sa dei. O iko o sa gadrevi, ena rawa ni ko dodoliga ka ko na kalougata kina ka lomani.