Nodaru Veiyawaki

Vakalougatataki ena Talairawarawa ki na Lawa ni iKatini

Sabrina T., São Paulo, Brazil

Niu a se lailai, au a lako curuma kei na noqu matavuvale e vuqa na veivakatovolei vakailavo ka yaco voli me yacova na noqu sa mai yabaki 10. A sega ni rawa ni kunea tale e dua na cakacaka o tamaqu, ka sa cakacaka vaka e dua na dauvolivolitaki e gaunisala ka rawailavo vakalailai sara. A tiko ga e vale o tinaqu me qaravi au kei na ganequ gone.

Ia dina ga ni lako curumi na veidredre e vuqa, a tiko vei keitou e dua na ivakadinadina ni soli ikatini kei na solika tale e so. Keitou a sauma vakaidina na neitou ikatini ena veivula ka sega ni leqataka e dua na ka. Keitou kila deivaki ni keitou sa vakalougatataki tiko vakaveitaravi mai na yalovinaka tawayalani ni Turaga ka baleta ni dau maroroya o Koya na Nona yalayala ni da sa talairawarawa ki na Nona ivunau.

A mai tini vakadua na neitou veisiga ni veivakatovolei vakailavo E sa veivakurabuitaki dina na veivakalougatataki sa solia vei keitou na Turaga ena vica na yabaki sa oti.

Au kila ni o ira na sauma vakaidina na ikatini ka sauma na nodra isolisoli e so ena loloma vata na takete ni vakalougatataka voli na nodra bula tale e so, ena sega na ka e leqa ka sa rawa ni yaco e dua na ka vinaka cake, me vaka vei au kei na noqu matavuvale. Na veivakalougatataki oqo ena tubucake. Au kila oqo. Au a bulataka oqo.

Yalodina ena Ka Kecega

Alivsi H., Jalisco, Mexico

Ena itekivu ni iwase kecega ni vuli, keimami taura wale e dua na ivakarau ni iyaya e umani kina e dua na ivola lailai, e dua na ituvatuva, kei na dua na sabolo ni iyaya cavaga. Dua na yabaki au a tuva tu meu taura na noqu ivakarau ka kila rawa ni sabolo au a taura e sa yaga saraga vei au.

Ena icava ni siga, au raica ni ra solia voli e rua na sabolo ni iyaya vataga. Ena rawarawa sara meu na tuvani tale ka taura na ikarua ni ivakarau, kau sa navuca ni cakava. Dina ga, era sa soli wale, kau sa gadreva na iyaya oya.

Au a cegu vakatotolo ena valelailai, kau a raica kina e dua na talevoni tuberi a rairai guilecava tu e dua na goneyalewa. E a dua vei ira na kena mataqali vou, kau a se qai vakayalia ga na noqu talevoni ena macawa sa oti. Ia au a sega madaga ni navuca meu maroroya. “Oqori na butako,” au a kaya vakaiau.

Ia, ena noqu gole yani ni taura na ikarua ni ivakarau ni iyaya soliwale, au a kila rawa ni oya ena oka vakatawadodonu me vaka na maroroi ni talevoni baleta niu na lasu kina ka kaya niu se bera ni taura e dua eliu.

Au sa vakavinavinakataka na ka lailai a sotavi oqo ka sa vakatavulica vei au e dua na lesoni levu. Au a vakalesuya na talevoni ka gole ki vale vata kei na dua ga na ivola lailai, dua na ituvatuva, kei na dua na sabolo ni iyaya, ia vata kei na vakanananu totoka ni dina voli ena veika kecega, se vakacava na kena ka lailai.