Tobo na iLawaki nei Setani

Mai vei Dennis C. Gaunt

Na dauvolaivola e vakaitikotiko mai Utah, Amerika.

Ni da sa sotava na ilawaki ni veika vakayalo, sa na rawa ni vukei keda na iVola i Momani me da kila na ka e dina kei na ka e sega.

iVakatakilakila

woman with money

Au a sa biuta tiko e so na ilavo noti kina loma ni noqu pausi mai na sitoa ka qai dreta na mataqu e dua vei ira na noti. Au nanuma ni roka drokadroka e vaka e mamare mai vei ira na kena vo kau sa qai vakaraica sara vakavoleka. Au qai raica ni irairai kei Peresitedi George Washington e sega sara ni rairai totoka sara. Na pepa sara mada ga e vaka e veicalati. Oqo e dua na ilavo lasutaki Sa veisautaka sara o vunivola kei na dua na noti dodonu ka solia sara na noti lasutaki vua na manidia ni sitoa.

Au sa dauvakasamataka vakalevu sara na noti lasutaki o ya me yacova mai nikua. Au vakananuma se sa vakacava na kena sa na wavoki voli ka sega ni dua e kidava ena veigauna sa oti. Ia kena dina ga ni kevaka beka au a sega ni kidava, keu a vakaisini talega kina. Ia ena noqu veidutaitaka ga kei na kena e dodonu kei na vakanamata kina duidui ka sega ena kena tautauvata au sa rawa sara ga ni tukuna na kena ka lasutaki.

E sinai tu ena iVola iMomani na ivakaraitaki ni veika lasutaki vayalo mera muri Setani ena nona sala ni veilasutaki ki na veitemaki me ra rawa-ka kina e so na tamata. Ena kena vulici na iwalewale kei na ilawaki eda sa na raica ni cala kei na leqa ena sala vata ga kina rai sa vakavulici me raica na duidui ni ka e dina mai na ka e sega ni dina Na levu ga ni noda vakaraica na duidui na vinaka ni noda vakarau meda kila na kedrau duidui na ka dina mai na ka lasu.

Vakasoqoni vata ni kila na ka vuni baleti Setani kei na Nona Veilasutaki

O Setani ena vinakata me vakauti keda yani kina nona ilawaki ni veilasutaki vakayalo ka kevaka meda sega ni yadrava eda na vakaisini. E veivakasalataki kina o Peresitedi Joseph F. Smith (1838–1918): ka kaya O Setani sa rui matai na vakalecalecaka ni sa tu ga na dina ni kosipeli ka sa soli tu ki vuravura ena kena levu taudua sa qai vakatetea o koya na ilavo lasutaki ni ivakavuvuli lasu. Qarauna na nona ilavo lasutaki ena sega ni volia rawa vei iko e dua na ka vakavo ga na yalo ca, yalorarawa, kei na mate vakayalo.”¹

Na tataqomaki vinaka duadua e tiko vei keda me da kakua ni vakacalai kina lawaki ca nei Setani me da sa na kila vinaka sara ga na dina ni kosipeli. Na titobu ga ni noda kila na dina, na rawarawa ni noda na toboka na duidui ena kauta mai o Setani ni sa tevuka mai na nona ilawaki. Ena gauna e yaco kina meda sasaga ka kila na duidui ka sega na tautauvata me vaka ga au a cakava kei na noqu ilavo noti, baleta ni o ya ga na vanua ena kilai kina na lasu e caka mai.

E vakavulica kina o Peresitedi Ezra Taft Benson (1899–1994): “Na iVola i Momani e vakatakilai ira na meca i Karisito. Na veika tawamudu mai liu, sa kila tu na Kalou, ka sa tuvanaki kina na iVola i Momani meda raica rawa kina na cala ka kila na sala meda valuta rawa kina na ivakavuvuli lasu ni veika vakavuli, politiki, vakalotu, kei na filosofi ni noda gauna oqo.”²

Nikua eda sa veivaluvaluti tiko kei Setani O keda e dodonu me vaka e dua na mataivalu, dodonu meda kila tiko na ka ena vakarau cakava na meca. Na kilai ni gauna kei na vanua ena kabakoro mai kina, me kena ivakaraitaki, sa itukutuku yaga vakalevu dina sara. O ya na vuna e vakasoqoni vata kina na itukutuku ka qai vakatokai me kena ivosavosa, “vakasoqoni itukutuku vuni.” Na noda kila na noda meca sa ikoya mo matai cake sara mai vua na kemu meca. Na iVola i Momani ena rawa ni vukei keda meda “vakasoqona vata na itukutuku vuni” ni nona dau veilasutaki o Setani.

Na Vosa Kamikamica e Dau Veilasutaki

Sivia na veimama ni veilasutaki ena i Vola i Momani era vakayagataka na vosa kamikamica kei na ivukivuki matalia mera vakayaco lomadra kina. “A sa tamata kilaka, ka kila vakavinaka sara tu na nodra vosa na tamata; o koya sa rawa kina vua me vakayagataka e vuqa na vosa ni veivakamari vakailasu, kei na kaukauwa ni vosa veirawai me vaka na kaukauwa ni tevoro” (Jekope 7:4). O ira na beteivalavala ca ni Tui o Noa era vakayagataka na “vosa ni veicavilaki” (Mosaia 11:7), ka vakavuna vei ira na tamata mera vuki kina kalou matakau ka ivalavala ca. Sa vaka talega vei Koriori ena nona gauna “ni sa rawa e vuqa na tamata” (Alama 30:18). O Amalekaia kei Ketianitoni erau vakayagataka na nodrau matai ni vosa kamikamica me rau rawata kina na mataivalu ni tamata ivalavala ca (raica na Alama 46:10; Ilamani 2:4).

Oqo e sega ni vakacalaka. Na vosa kamikamica e vovodea, sega ni dina, e lala, ka vakalevulevui. Io, era na lewe vuqa era na vakatavuvulitaka vakaoqo na ivakavuvuli vakailasu ka tawayaga ka sesewa, ka ra sa vakalevulevui e lomadra, ka segata matua me ra vunia na nodra inaki vua na Turaga; ia na nodra cakacaka sa tu ga ena butobuto” (2 Nifai 28:9).

Na vosa kamikamica e vakayagataki me veivakacalai, dau tiko na vuna e caka kina se kena inaki vuni. Na vosa kamikamica e vakaicakacaka kei na kena vakanananu ka na dau veirawai vei ira na vakawelei ka vakatamata tu ga nodra bula. Ia na parofita ena tukuna vei keda vakarawarawa sara na dina ena gadrevi meda rogoca.

Na vosa kamikamica sa ikoya na ivosavosa nei Setani. O Peresitedi James E. Faust (1920–2007) na iKarua ni Daunivakasala ni Mataveiliutaki Taumada e vakamacalataka: “Na domoi [Setani] ena rogorogo vinaka toka nida rogoca kei na nona itukutuku ena rawarawa na kena ciqomi. Sa domo sara ga ni veikerei, veirawai ka rogo malumu. E sega ni kaukauwa ka sega ni rogo vakatani. Sega ni dua ena vakarorogo vei Setani kevaka me rogo kaukauwa se rogo ca.³

iVakatakilakila

whispering

Ni sa vakaraitaka mai o vuravura e dua na vakatutu, filosofi se vakasama ka na kauta na vakasama me vesuka se voleka tale nida sega ni vakabauta rawa na kena dina, oqori sa dodonu meda taura vakaivakasala vei keda. Tauri ira na veivakasama oqori mera ka lasutaki. Vakatautauvatataki ira kei na dina era vakavulica na parofita ni Turaga. Vakaraica na ka era duidui kina ka sega ni ka era tautauvata kina.

O Neori—e dua na Dauveilasutaki Kilai

Vakayagataka sara ga o Neori na iwalewale ni veivakayarayarataki nei Setani Meda sa dikevi koya mada me vaka e dua na kisi ni dauveilasutaki vakayalo. Na ivunau nei Neori e vaka me ciqoma sara ga na ivakavuvuli ni dua na dauniveisereki e taleitaki vakalevu ka matai sara ni vunau vei ira na Nifai E a tubera cake o. Neori e so ena nona ivakavuvuli ni “ra na vakabulai kece na tamata ena ivakataotioti ni gauna” ka na “rawata na bula tawamudu” (Alama 1:4).

E rawa beka meda raica na vuna e sa rui talei kina vakalevu na ivunau i Neori? E vakatavuvulitaka tiko o koya e dua na Kalou e rawarawa tu ga ka veivakawelei—e dua na Kalou, e lomana na tamata kecega ena vakabulai ira kecega veitalia ga se cava. Sa ikoya mo lako ga ka cakava na ka ga o via cakava, baleta ni ra vinaka taucoko. Sa dua na ivakavuvuli veirawai ka sa ciqomi vakalevu sara ga mai vei ira na tamata era bula donuya na gauna nei Neori (raica na Alama 1:5) me vakataka e levu sara na tamata ena gauna oqo. Dua na tikite sega ni saumi ki lomalagi sa ikoya e dua na ka e levu sara na tamata era vinakata

Ia, na cava ga e leqa ena itukutuku nei Neori? Ia me da raica mada na itukutuku bibi ni nona ivunau:

Na Kalou e bulia na tamata kece sara—dina.
Na Kalou e lomani ira taucoko na tamata—dina.•
Dodonu meda rokova na Kalou—dina.•
Dodonu meda marautaka na vakasama ni veivakabulai—dina.

Sa levu sara mai na ka e tautauvata na ivakavuvuli nei Neori kei na dina ni kosipeli. Dodonu mo nanuma tiko me vaka ga na ilavo lasutaki dodonu meda raica na duidui ka sega ni ka e tautauvata kina. Meda raica mada na iotioti ni—vakasama nei Neori.•

Na Kalou ena solia na bula tawamudu vua na tamata kece sara—lasu!

Sa ikoya oqo na duidui e bibi ka na tukuna vei keda ni o Neori e tamata dauveilasutaki vakayalo. Na veivakabulai mai na mate vakayalo sa vakadeitaki vua tamata kece sara, ia na veivakabulai vakayalo mai na mate vakayalo sa na vakatau mai na noda tuvakarau meda veivutuni. Kevaka meda veivutuni sa na rawa ni da vakaivotavota ena bula tawamudu (raica Jekope 6:11). Ia, e sega ni na yaco na vodo loto.

O Kitioni kei Alama erau a Raica Rawa na Veilasutaki

Na cala nei Neori e a vakatakilai ena siga erau sota kina kei Kitioni e dua na qasenivuli yalododonu ena Lotu ni Kalou. E a tucake e matai Tui o Noa o Kitioni ena vica na yabaki yani ki liu ka a sa sotava mai kina na veilasutaki vakayalo (raica na Mosaia 18:4–8). Sa “tekivu me veisaqasaqa vakaukauwa sara o Neori vata kei koya me na rawa ni vakauti ira laivi na lewe ni Lotu, ia e dei o [Kitioni] ena nona vakasalataki koya ena vosa ni Kalou” (Alama 1:7). Sa raica o Kitioni ni o Neori e dua na dauveilasutaki. Ni sa kilai sa tekivu o Neori me vakayagataka e dua na iyaragi nei Setani—o ya me laba. Ia, na mate nei Kitioni sa sega ni vakawaletaki. Era sa qai kauta na dauveilasutaki o Neori vei Alama me laki lewai.

Sega walega ni raica o Alama ni sa cala o Neori ena qaravi kaloutani kei na laba, ia sa biuta koto e dua na mavoa levu, qaravi kaloutani vei ira na tamata sa na “vakavuna sara ga na nodra vakarusai” (Alama 1:12). Sa qai lewai o Neori me mate ka sa qai vakamatei ena “imatemate beci sara” (Alama1:15).

O Kitioni kei Alama erau sa ivakaraitaki vei keda kece sara. Ni sa tiko kei keda na Yalotabu eda na raica ka rogoca na veika “ena kedra ituvaki dina” (Jekope 4:13). Eda na raica na lasu kei na ilawaki nei Setani, “me vaka ga dou sa kila na rarama mai na butobuto” (Moronai 7:15).

Na keda meca ni veilasutaki sa rui matai ia me vakataki Alama kei Kitioni oi keda eda rawa ni matai cake sara. Me vaka ga na noqu a raica na duidui e tiko ena noqu noti ilavo sa na rawa vakakina ni da na raica ena noda vakasama kei na mata ni yaloda na duidui e tiko ena ka dina kei na ka lasu. Ni da vakayacora oqo, eda na raica na veilasutaki ka vorata na nodra dau lasu.