Me Vakaruataki

Kaylee Baldwin, Arizona, Amerika

iVakatakilakila

violin

Na imatai ni noqu sotavi koya, au a taura tu na noqu vailini

E a tosovi au voleka mai ena noqu sa curu kina valenikana, ka sa sabica sara vakaukauwa na yavaqu na noqu kato ni vailini.

“Vailini,” e a kaya, ni sa toso tiko mai,

“Io” au a kaya.

Au se bera mada ni veivosaki kei na dua e leqa tu na ituvaki ni yagona kau sega ni kila se cava tale meu na kaya. E a muri au kina noqu teveli ka laki dabe sara e yasaqu, ka dusi kina kato ni noqu vailini.

“Vailini,” e a kaya tale.

Au dolava na noqu kato ka raica ni vaka e waqa na matana. E a qiria vakasausa na kena wa. E a ririko na yaloqu niu vakila ni rawa ni cavuka e dua na wa ni noqu vailini kau tavia tasogo malua yani na kena isogo. E a mokoti au ka sa biubiu me sa gole lesu tale.

Dau vakawasoma na noqu raici koya ena so na gauna mai e muri.

Ena veigauna ni dau raici au e dau lako mai ka mokoti au ka reguca na uluqu.

Ena veigauna ni vuli e muri, au dau tovolea meu vunitaki au niu sa raici koya ni sa lako tiko mai. Na gauna e dau raici au kina ka ologi au ena nona i moko kei na nona dau reguca na uluqu au dau vosota na ka e dau cakava kau dau dredrevaki koya ka dro tani yani ka sega ni bau cavuta e dua na vosa.

“Oi, lelei,” Au a kaya yani niu sa raici koya ena vakatasuasua ni noqu mataivakatagi e koronivuli. Ni sa oti na vakatasuasua, e a sasaga sara mai o koya kina vanua au tucake tu kina vata kei ira na noqu itokani ena taudaku ni vale.

Era vagalala na noqu itokani ni sa yaco mai ena matadredredre kei na nona mai mokoti au.

“William!”

Au vuki ka raica e dua na yalewa ni sa lako sara tiko mai vakatotolo kina vanua keirau tucake tu kina.

“Vosota,” e a kaya mai ka mai dreti koya laivi. “Dau taleitaka o William na vailini. E a kerei au mau kauti koya mai kina vakatasuasua oqo ena bogi nikua. Daru lako, daulomani.”

Me yacova mai na gauna o ya, au qai kidava mai niu sega mada ga ni bau kila na yacana. Au a se sotavi William ena rua na yabaki yani ki liu ia au dau saga tu ga meu vunitaki koya ka sega vakadua ni bau tovolea meu kilai koya vakavinaka. Ena noqu sa raici William ni rau sa biubiu yani sa dua na ka na levu ni noqu madua.

Ena vica na yabaki mai e muri niu sa mai vakawatini, au a vakasucuma e dua na gonetagane rairai vinaka ka vakaleqai voli na ituvaki ni nona bula ka keirau vakatokayacataki koya o Spencer. Au dau vakila ni noqu vakasama e a lesu tikoga vei William niu dau raici luvequ kau dau vakananuma se na sotava talega o Spencer na veika vata ga vaka ko ya. Era na drovaki koya li na tamata baleta ni dau viregu vakaukauwa ka dau veimoko vakasausa? Era na vakayalolailaitaki li na nona ilawalawa baleta na kena ituvaki vakaleqai?

Ni sa vula va o Spencer au a kauti koya ki valenibula me laki laurai kina. Niu sa vakasoburi koya tiko mai na motoka, au raica e rua na tamata ni rau curu mai tautuba ni valenibula Ena yalo e tawa vakabauta, au qai vakila ni o William vata kei tinana.

“William!” Au a kaci yani ni keitou sa veivolekati ka sa vavadugudugu tu na utoqu.

“Bula.” E a takoso mai ena ikelekele ni motoka ena mata dredredre. E a dodoka mai na ligana ka boboka na ligaqu ena lululu ni veirekitaki.

“Sa vakaevei tiko”? Au tarogi koya yani.

“Vailini,” e a kaya mai ka vaka e malaude na yalona ni vaka e serau mai na matana.

Vailini. E a nanumi au talega tikoga o koya. “Io,” au a luvuci ena noqu sasaga meu dredre, “Au a dau vakatagitaka na vailini.”

Ena neirau veivosaki tiko, e a tubucake na noqu icegu ena masu ni kere yalololoma mai vua na Tamada Vakalomalagi ka klila vinaka tu na noqu gagadre meu sotavi William tale vakadua. Au vakavinavinaka ni raici au na Kalou—e dua na tina gone ka sasagataka tiko na bula nei luvena ka lomaleqataka na nona veisiga ni mataka, ka vakalesuya mai na vakasama ni o Koya e kilai keda vinaka tu.