Vakatavulici Ira mera Wilika na iVola i Momani

Emilien Rioux, Quebec, Canada

Donuya na neirau veiqaravi voli ena Tabana ni Kaulotu e Geneva Switzerland, au a kacivi ka vakadeitaki meu sa peresitedi ni tabana, ka sa kacivi na watiqu me peresitedi ni iSoqosoqo ni Veivukei. Keirau a cakacaka vata ena neirau kaukauwa taucoko ni vakabulabulataka na tabana sotavi dredre voli. Dina ga ni a tauyavutaki ena 1960 vakacaca, a sega ni se vakayacori na papitaiso ena vuqa vata na yabaki ka se sega ni vakauti e dua na daukaulotu ki na buturara ni kaulotu me 15 na yabaki.

A vakadinadinataki ni keirau a gadreva na veivuke ni Turaga me rawa ni laurai kina na iwali e so ni leqa a sotava tu na tabana. Ni oti na noqu masulaka na bolebole e so ni tabana, a tukuna vei au na Yalo ni Turaga, “Vakatavulici ira na lewenilotu mera wilika na iVola i Momani, ka o na qai rawaka.”

Ena gauna vata oya, keirau sa tuvatuvaka ena nodra vakacolati na lewenilotu taucoko mera sa tekivu wilika na iVola i Momani.

A muria mai na vatukana veivakasakiti. A lesu mai ki na tabana na vakacegu kei na Yalotabu. Era lewena na Lotu na matavuvale vou. Ni vakayaloqaqataki ena nona gagadre me veiqaravi, a biubiu ki na kaulotu e dua na cauravou. Era a vaqaqacotaki e vica na bula vakawati sotavi dredre voli, ka ra vakavolekataki na matavuvale. Sa tomana tiko me rawaka na tabana oqo nikua.

Keirau sa vakadinadinataka vata kei ira na lewenilotu na kaukauwa veivakurabuitaki ni iVola i Momani. E sa vatudola vakaidina ni noda lotu kei na noda ivakadinadina me baleta na kosipeli kei Jisu Karisito. Keimami taleitaka ena lomai keimami taucoko. Sa ikoya na ivurevure ni kilaka tawacava ka tawaveisautaki rawa.

Na ka e sotavi oqo sa vakatavulica vei keirau ni iVola i Momani e sa ivurevure matata duadua ni nodra vukei na tacida kei na ganeda mera lako tani mai na yaloyalo ni butoubuto vakayalo e so e ovica tu na vuravura. Na ivola oqo e kauta mai na vakacegu, reki, bula marau, kei na dua na gagadre kaukauwa ena muri ni iVakabula o Jisu Karisito.