Taro kei na iSaunitaro
“Au veiwalitaki e koronivuli niu dua na YDE. Au kila ni sa gadrevi meu tutaka na noqu vakabauta, ia e sa ka dredre! Meu na doudou rawa kina vakacava?
O sa donu ni sa gadrevi mo yalodoudou tu ni sotava na ituvaki oqo. Me itini, sa vakarota o Jisu Karisito, “Dou tucake ka rarama mai, io me cila yani na nomudou rarama me ivakaraitaki vei ira na veimatanitu” (V&V 115:5). Ia na rawati ni yaloqaqa mo vakacaudreva kina na nomu rarama ena rairai se rairai sega ni kena ibalebale na nodra vosa suruti o ira na vakasewasewani iko.
Ena sala cavaga, sa rawa ni o vakalaiva na veisaqasaqa me vakauqeti iko mo vinaka cake. Ena nomu cakacaka vakaukauwa ni vaqaqacotaka na nomu ivakadinadina, sa rawa ni o taracake na mataqali yaloqaqa malua ena vukei iko ni vosataka se tomana voli ga na ka e dodonu, veitalia ke ra veivakasewasewani e so tale.
Sa rawa ni vakatuburarawa na vakasagai voli, ia nanuma ni sa rawa ni o masu mo vakatawani ena loloma cecere e rawa ni ra vakila kina mai vei iko e so tale na loloma i Karisito (raica na Moronai 7:48). Baleta ni sa duatani na ituvaki kecega, vakasaqara na veituberi ni Yalotabu mo kila na iwalewale ni sausaumi ni gauna yadua ena sala va-Karisito.
Vakatau voli ena ituvaki, ena rairai vinaka sara mo veivosaki vata kei ira ka a veiwalitaki iko se mo kakua ni kauwaitaka soti na veisagai tawadodonu ni tomani voli me bulataki na nomu vakabauta. Kevaka era sega ni maleleta e so tale na vakarorogo ki na ka mo tukuna, na nomu ivakaraitaki ni yalololoma, veivosoti, kei na yalomalua sa na rairai itukutuku vinaka duadua o rawa ni vakauta.
Vakaraitaka na Yaloqaqa Dina
Era na rairai sega ni cegu vakarawarawa o ira na veiwalitaki iko baleta na nomu doudou voli mo kerei ira mera muduka, ia era na rairai muduka ni ko vaqaqacotaka na nomu yaloqaqa ena nomu bulataki iko—e dua na Yalododonu Edaidai. Ni bera ni o kila, na rarama ni veivakadonui ni Tamada Vakalomalagi ena caudrevi iko, ena vakanuinui ni na tadolava na matadra ki na kosipeli vakalesui mai ena nomu bula.
Bright U., yabaki 17, Imo State, Nigeria
Kune Kaukauwa ena Ka Rawarawa
E sa ka bibi na masumasu kei na lolo baleta ni rau na vukei iko ni sotava rawa na veiwali kei na bolebole e so e koronivuli, me vaka ga a sotava o Jisu Karisito na veivakalialiai levu ena gauna a tiko kina e vuravura. Rau na vukei iko ni taracake na loloma kei na yalomalua levu cake kivei ira na tamata.
Walter C., yabaki 15, Jaén, Peru
Tuberi Voli ena Masumasu
Ena dua na gauna balavu au a lewenilotu duadua ga ena noqu koronivuli. E vaka mera kilai au matata na noqu itokani voleka sara, ia era veiwalitaki au na vo ni itokani vakavuli. Au a masu ena dua na siga ka vakila na gagadre meu vosa ki na dua vei ira ka a vakayaloqaqataki ira tale e so mera veiwalitaki au. Au vakamacalataka niu sega ni cudruvi koya, ia au a kerei koya me vakaraitaka vei au na veidokai ena vinakata o koya. Ni oti na rogoci ni neirau veivosaki, a dau taqomaki au tu ga e dua na noqu qasenivuli ni raica ni yaco e dua na ka. Au kila ni na tiko vata kei iko na Turaga ni ko vosa vei ira na tamata oqo.
Shanela S., yabaki 14, Pangasinan, Philippines
Taracake na Nomu iVakadinadina
Matai, rawata rawa e dua na ivakadinadina ni dina e so o vinakata ni wasea kivei ira tale e so. Qai lomani ira na tamata ka veiwali voli ka kakua ni vakavu veiba, baleta ni sega ni tokona na Kalou na veileti (raica na 3 Nifai 11:29). Ka bibi sara, saga me tiko vataga kei iko na Yalotabu. Na Yalotabu ena vukea me levu cake na nomu loloma kei na yaloqaqa, ka na cakava o Koya mera kaukauwa na nomu vosa.
Julia F., yabaki 19, Hesse, Jamani
Lomani Ira na Nomu Meca
Au sa sotava na mataqali tuvaki vataga. Kevaka e tiko vei iko na vakabauta ka vakayalomalumalumutaki iko, ko na vakalougatataki ena kaukauwa kei na vakabauta o gadreva mo “lomani ira na nomudou meca, vosavinaka vei ira sa rukaki kemudou, … ka masulaki ira” (Maciu 5:44). Au na vakayaloqaqataki iko mo vakasaqara na ivolanikalou me baleta na isaunitaro e so ni iwalewale mo kaukauwa kiina. Masu ni ko sa lomagalili voli ena nomu vakabauta. Roma 8:31 e kaya, “A cava me da qai kaya ena veika oqo? Kevaka sa totaki keda na Kalou, o cei me noda meca?” Sa tiko vei iko na Kalou ena yasamu! Sa rawa na ka kecega.
Reagan T., yabaki 15, Utah, Amerika
Kakua ni Rere
Vosataka vakalevu cake na nomu lotu se nakita voli ni cakava na veika mo laveta cake kina. Au a tiko ena dua na ituvaki vataga ka vola, “Au Taleitaka Voli ni YDE” ena noqu kato dreketi. Ni caka vakakina, au a dolava na katuba ki na vica vata na madigi e so ni kaulotu ka vakaraitaka vei ira na tamata niu a sega ni rere meu vakatakila vei ira o au na YDE. Na cavaga o cakava, kakua ni vakavuna mera rawai iko. Masulaki ira kei iko talega. O na qai vakarau raica ni kevaka o vakanamata tu ki na nodra vakabulai na tamata tale e so, o na sega ni rere ni vakatakila vei ira na dina ni kosipeli ni Tamada.
Savanna P., yabaki 14, Texas, Amerika