Vakadewataki ni iVolanikalou: Ki na Vosa ni Yaloda
Levu sara na ka sa sotavi sa vakaraitaka na liga ni Turaga ena kena vakadewataki na Nona ivolanikalou
iYaloyalo ni tabani iVola i Momani vaka Japani, Potukali, kei na Jamani mai vei Laura Seitz, Deseret News
Na veika sa sotavi oqo era kila vinaka tu o ira era sa vakaitavi tiko ena kena vakadewataki na ivolanikalou mai na vosa vaka-Valagi kina veivosa tale e so. Sa dau yaco sara vakawasoma.
E dua na cauravou ni Amenia ka taura tu e dua na ilavelave ni iVola i Momani ka se qai vakadewataki wale tikoga oqo ki na nona vosa a tosova yani e dua na lewe ni timi ka veivuke ena vakavakadewa: “Vinaka vakalevu,” a kaya mai. “Au sa wilika oti na iVola i Momani ena vosa Vakavalagi. Au sa wilika na iVola iMomani ena kena vaka Rusia Au sa wilika na kena vaka Ukrain Ia, me yacova mai na noqu sa wilika na kena vaka Amenia au a sega sara ni kila vinaka. Niu sa mai wilika na kena vaka Amenia sa qai vakaibalebale mai vei au. Sa vaka sara ga niu sa curu tu mai ki vale.”
Curu Mai ki Vale
Kevaka me noda vale vakayalo na kosipeli i Jisu Karisito, sa dodonu meda loma vinaka ka kila vinaka na kena ibalebale. Eda na vakacegu e vale. Eda na vakani kina. Eda veivosaki kei ira eda lomana ena vosa eda vulica mai vei tinada Oqo na vosa ni yaloda, ia me vaka ni yaloda na vanua me tara na kosipeli, na noda wilika na ivolanikalou ena vosa ni yaloda e sa ka bibi sara.
Sa vakatu o ya na vakatutu ni Vunau kei na Veiyalayalati E vakaraitaka kina na Kalou ni, ena idola ni matabete ka tiko vei iratou na Mataveiliutaki Taumada, “ena vakaraitaka kina na ligana na Turaga, io ena vakaraitaka mai ena kaukauwa mera vakabauta kina na veimatanitu … na kosipeli mera bula kina.
“Ni na qai yaco ena siga ko ya, era na rogoca kina na taucoko ni kosipeli ko ira na tamata kecega ena nodra vosa, kei na nodra ivosavosa, mai vei ira era sa tabaki ki na kaukauwa oqo, ena nona veiqaravi na Dauveivakacegui, ka soli vei ira me ra vakatakilai Jisu Karisito kina” (V&V 90:10–11).
O Jim Jawel, ka cakacaka tiko ena timi ni vakadewataki ni ivolanikalou mai na itikotiko liu ni Lotu, e talanoataka na kena rawa ni voleka sara mai ki vale na ivolanikalou ni sa vakadewataki ena ivosavosa e kila na yalo.
“Ena vakadewataki tiko ni iVola iMomani kina vosa vaka Sesotho ka vakayagataki ena vanua mai Aferika na yacana o Lesotho, ena gadrevi me keitou kunea e dua me vukei keitou ena kena vakadeuci na nodratou cakacaka na timi ni vakavakadewa. Na supavaisa ni cakacaka o Larry Foley e a raica mai e dua na lewe ni Lotu mai Lesotho ka sa tauri koroi mai na Utah State University. Mai Lesotho na vuli e dau caka vaka Valagi, sa vakakina vua na marama oqo kei ira na luvena ni ra a vuli ena vosa vaka Valagi mai na kalasi dua ka lako yani, ia eratou dau veivosaki ga mai vale ena vosa vaka Sesotho.
“E a vakadonuya me qarava na vakavakadewa Na nona vakadeuca na ulutaga keitou vakauta vua a sa veivuke sara vakalevu Keitou dau vakauta vagauna vua na taro e so ka gadrevi me kilai na kena vakamuri vinaka na taladrodro ni vakavakadewa, ia sa vakalesuya mai o koya ena yalo vakacegu. Ia, keitou qai raica ni rokataka tu o okoya e so na tikina ka keitou sega ni taroga kina e dua na ka. Ni keitou tarogi koya baleta na tikina rokataki, qai kaya mai: ‘Isa, oqori na tikina e tarai au sara vakabibi, kau a sega tu ni vakila na kena ibalebale ena vosa vakavalagi. Au rokataki ira me rawa niu na laki wasea vei ira na luvequ.’”
Dua na iVakaraitaki ni Vakavakadewa ni iVolanikalou
Na vakadewataki ni iVola Tabu sa dua na italanoa balavu, tekivu mai na vakadewa ni tikina e so ni Veiyalayalati Makawa mai na Iperiu ki na Kirisi. E muri, sa qai vakadewataki na iVola Tabu mai na vosa vaka Kirisi ki na vosa vaka Latini kei mai na Latini, Iperiu, kei na Kirisi ki na vuqa tale na dui vosavosa.1 Kena vatuka, Na Lotu i Jisu Karisito ni Yalododonu Edaidai e sega ni vakadewataka na iVola Tabu ki na veivosa tale e so ia sa vakayagataka ga na kena era sa vakadonuya na veimataqali vosa era sa lotu va-Karisito ka ra vakayagataka tiko na vosa o ya.2
E levu ga na vakavakadewa e qarava na Lotu sa ikoya na iVola i Momani (na imatai me vakadewataki), Na Vunau & Veiyalayalati kei na Mataniciva Talei. Na vosa e vakadewataki mai kina na ivola oqo na vosa vakaValagi na vosa e vakayagataka na Parofita o Josefa Simici sa ikoya nai vosavosa ni yalona. Na icakacaka ni kena vakadewataki na ivolanikalou kina veivosa e sega ni vaka-Valagi e dodonu mera kila vinaka na gonevuli ni iTukutuku ni Lotu. Sa na via tautauvata kei na kena e a vakayagataka na parofita me vakadewataka na iVola i Momani kina vosa vaka valagi.
O Josefa Simici e gone yalomalua, susu ena vanua ni teitei ka sega ni vuli. Ia e tu vua na kila kei na iyaragi e kila na Turaga ni gadrevi me vakavotukanataka na cakacaka me na caka. Ia eratou sa vakarautaki tu o Josefa kei na nona matavuvale me ratou qarava na itavi oqo.3
Soli talega vei Josefa na veivuke– ruarua vakalou kei na ke na vakatamata–ena vakadewataki ni itukutuku kei Nifai. Dau sikovi Josefa tiko o Moronai ena va na yabaki ni bera ni soli vua na ivolatukutuku. Eda sega ni kila na matailalai ni veika e vakavulica o Moronai vua na Parofita ia na nona dau rairai mai e mai vakaukauwataki koya vakayalo ka vakayago ena itavi sa tu e matana.4
Na Turaga sa vakarautaka talega na dauvakadewa me rawa ni ra na vakadewataka e dua na vosa sa mai yali. Vakamacalataki ni rua na vatu vesu vakavinaka, oqo erau gacagaca tautauvata ka vakatokai na vatu ni daurairai ka vukea na Parofita me vakadewataka na itukutuku vaka-Nifai kina vosa Vakavalagi. E a sega ni vakamatailalaitaka na Parofita na kena icakacaka, e a vakadinadinataka ni vakadewataka na iVola i Momani ena isolisoli kei na kaukauwa ni Kalou.”5
Me ikuri ni veivuke vakalou ka soli vua, e a vakarautaki talega na dauvolavola me vola na veika e vakadewataki tiko me ra na qai laki tabaka, sauma, ka veisoliyaka, kina veiyasai vuravura.
Sega ni tautauvata na veivuke a ciqoma o Josefa ena nona vakavakadewa o ira era sa lesi mera veivuke ena vakavakadewa nikua era sa vakarautaki mai vua na Turaga ena nodra cakacaka—ena kena vakalou kei na kena vakayago.
Dua na Cakacaka ni iVakatakila
Na kena vakabulabulataki na vakavakadewa sa ka dina sara ga vakayalo ka kena ivakamacala levu vinaka duadua na ivakatakila ena veivosaki ena matabose. Na rua se tolu na tamata era digitaki mera vakadewa eratou na qai cakacaka vata kei na vica tale na tamata me dua na timi ni cakacaka. E tiko nodra supavaisa mai na itikotiko liu ni Lotu, o ira mera riviu e nodra vanua, dua na lekisikoni me dauveivuke6 ivukevuke ni vakavakadewa, parokaramu ni komupiuta, kei na veitokoni mai na iliuliu ni matabete ka na lako cake sara kina Mataveiliuitaki Taumada. (Raica na jati ka sa curu tiko yani.) Ni sa solia mai na Mataveiliutaki Taumada na iotioti ni veivakadonui, sa na tuvai sara na matanivola, tabaki, ka veisoliyaki. Ni a vakarautaki ena dua na ituvatuva tabaki vakomupiuta, e sa biu tale tu ga ena LDS.org ka vakakina ena Gospel Library app.
Na veitokoni ni kena tabaki sa bau veivakayadrati sara ga. Sa na vakaliuci sara ga na vakanamata kina itavi me na qaravi, kei na irairai ni kena sa vakadewataki oti na vakadewa ena railesuvi ena vica vata na itagede vakabibi ena itagede ni matabete ka na vasaqara na veivakadonui ni Turaaga. Na gauna sa soli mai kina na veivakadonui o ya sa na qai toso ki liu na vakavakadewa. Dina ga ni na sega ni tauvata kei na nona a vakadewataka na iVola i Momani na Parofita o Josefa Simici, ia na kena icakacaka sa veidusimaki tiko kina na Turaga—ena Nona isolisoli kei na Nona kaukauwa.
E sega ni kena ibalebale o ya ni vakavakadewa sa vinaka sara ena kena imatai ni qaravi. Ena so na gauna o ira era railesuva na cakacaka e qaravi era na vakatututaka me vakavinakataki na kena tuvai vakavosa kei na veivosa e vakayagataki na kena sipelitaki na vosa e so kei na tuvani matanivola me tabaki. Tu yadua sara na kena na veisau na ivunau e tiko ena dua na vakavakadewa. Ni sa caka na kena oqo, sa na caka sara ga ena veidusimaki mai na Mataveiliutaki Taumada.
Ena Vakarautaka na Turaga
Na Turaga ena dau tokona na vakavakadewa oqo ena so tale na kena sala. Sa dau ripotetaki wasoma mai na timi ni vakavakadewa mai na itikotiko liu ni Lotu ni sa dua na ka ena gadrevi, na Turaga ena vakarautaka na ka.
Dua na kena ivakaraitaki, e a gadrevi e dua na vakavakadewa ena vakadewataki kei na katoni ni dua na iyaya ni Lotu mai Mam (cavuti vaka na mum dua na kawa ni Maya na kena vosa vaka na vosa mai Guatamala). Vei ira na daukaulotu ka ra a kacivi mera lako ki Guatamala e tiko kina e dua na italatala ka dau vosa vaka Mam, o tukana. E a susugi ena siti o daukaulotu ka dauvosa tu ga vaka Sipeni. Ia ena veibogi e dau lako mai vua o Tubuna ena tadra ka vakavulici koya ena vosa vaka Mam. A yaco na daukaulotu gone oqo me dauvakadewa ni Mam ena Lotu.
Levu na gauna e dau qaravi na vakavakadewa ena dua na soli igu kei na vacacabo. Vakatau mai na ituvaki vakailavo e so na dauvakadewa era volodiataka nodra gauna e so tale era saumi me rawa ni ra na vakayagataka nodra gauna ena vakavakadewa.
A saumaki ki na Lotu mai Pakistan na tamata ka yaco me dua na dauvakadewa ni Urdu ni cakacaka voli vakaqasenivuli. Na revurevu ni nona veisau sa mai sega kina ni qasenivuli, kau laivi nona vale ni a vakarautaka na koronivuli , ka ra sa sega kina ni vuli na luvena. Dua na supavaisa ni vakadewa ena Lotu e a vosa vei koya ka solia vua e dua na isau vakailavo. Ni sa mai cakacaka voli vakadaunivakadewa me vica na vula, e a qai laki raica na supavaisa na tamata oqo ka kerea me volia mada e dua na nona peni ni volavola. Na kena e a vakayagataka tiko sa maca na kena iqi. Sa qai kidava na supavaisa ka walia e dua na cala vakaivola ka a vakavuna me ciqoma vakalailai kina o daunivakadewa na kena isau.
Me vaka ga na nona a vakalougatataki Josefa Simici na Turaga me rawa kina ni vakacavara na nona itavi sa vakalougatataki ira vakakina na Turaga ena nodra vakavakadewa. Me kena ivakaraitaki na dauvakadewa ni Latvia, e a loya ka a laki vuli mai Rusia na vanua a veisautaki koya kina na kosipeli vakalesuimai. Ni lesu mai Latvia sa mai tauyavutaka sara na nona bisinisi. Sa mai kacivi talega me peresitedi ni tabana E a sa osooso sara ga ia, na Lotu e gadrevi koya kei na nona kabani me vakayagataka ena vosa Vakavalagi.
E a kerea na gauna me laki vakasamataka mada baleta ke vaka me sa vakadonuya na kerekere nei koya na mata ni Lotu, sa vaka “e kauta laivi mai matadratou na luvena e dua na veleti kakana ena dela ni teveli ni kana” Ni oti na nona masu sa mani vakadonuya na kerekere ia e kerea na Turaga me vakalougatataki koya me rawa ni qarava na veika dredre vakayalo sa basika mai oqo vua ka na taura e levu sara na gauna.
A tekivu me sa lako ki na nona valenivolavola ni vo tiko e dua na aua me tekivu na cakacaka, me laki vakadewataka na iVola i Momani. A vakaotia o koya ni se bera ni cava na lima na yabaki ka dau taura voli. Vakaidina, oqo e sa dua na vakadewa totolo duadua mai na gauna a vakadewataka kina o Josefa na iVola i Momani ena 60 na siga vakacaca.
E levu sara tale na veika sa yaco oti me vakaraitaka na nona tu vakarau na Turaga me veivuke ena kena vakadewataki tiko na nona vosa. Era vakaraitaka kecega ni oqo e Nona cakacaka ka sa ka bibi sara Vua. E vakarautaki ira na tamata mera cakava na Nona cakacaka. E vakarautaka na iyaya ni cakacaka me vakusakusataka na cakacaka O Koya sa na qai vakauqeti ira ka vakalougatataki ira ni ra sa tekivu veiqaravi yani.
Na vatuka sai koya e dua na vuravura e vakasinaiti tu ena vosa ni Kalou, ka sa soli vei ira na Luvena ena vosa ni yaloda.