Kurabui, Yalorarawa, kei na iTuvatuva ni Kalou
E vakaitikotiko mai Albania o koya e vola.
Na veika kece e dredre ni sotavi ena noqu bula, au vakila ni Tamada Vakalomalagi e tiko vata voli ga kei au ena veigauna taucoko sara ni noqu ilakolako.
Droini mai vei David Curtis
Dua na mataka lailai ena yabaki 2008 ni a vakayadrati au o Tinaqu meu lako ki vuli. Au sa bau rekitaka sara ga na mataka o ya ia au sega ni kila ni na veisau me siga ca duadua ena noqu bula se me iotioti ni gauna meu na tiko vata kina kei koya. Au a sega ni vakaotia noqu kalasi ena siga o ya baleta ni dua na itokani ni noqu matavuvale e a mai kauti au ka kaya vei au ni o tinaqu sa vakamatei koya ga vakaikoya. Au a se qai yabaki 12 walega.
Au vakananuma,“Meu na bula vakacava ni sa sega na tinaqu?” O koya na noqu itokani vinaka duadua.
Au a tagi voli ena vica vata na vula. Au sa sega ni via lako ivuli baleta ni ra sa rui vakademeni au vakalevu na gone ka ra sa dau vakaraitaka tu ga nodra rarawa ni sa yali na tinaqu Au sega ni kila se cava meu cakava. Na ka ga au kila sa ikoya meu vakaukauwa baleti ira e so tale.
Dua na siga ni oti e ono na vula na mate nei tinaqu au a tiko taudua ena noqu rumu ka dabe toka ena yasa ni katuba leka, kau tagi ka tovolea meu kila se cava au mai cakava tu eke. Vakasauri niu sa rogoca ni dua na domo e na noqu vakasama “O iko na luvequ yalewa au na sega ni laivi iko mo rarawa.” Au kila ni o ya na Kalou! Ia e vakidacalataki au baleta niu sega tu ni vakabauti koya, vakabibi niu vakila ni o koya sara ga sa mai kauti tinaqu laivi mai vei au. Dina ga niu sega ni kila na cava e via kaya, au sa yalo vakacegu ga.
Tolu na yabaki e muri au a gole ki Roma meu laki sikovi noqu momo. Tukuna tikoga vakawasoma vei au o koya na lotu e a lako kina Dua na Siga Tabu sa qai kauti au o koya me keirau lako vata Au na dau nanuma tikoga na noqu sa lako tiko yani vakadodonu kina katuba ni valenilotu ena imatai ni gauna kau sa vakila sara tu ga na loloma ni Tamada Vakalomalagi, ka niu sa curu ki loma, sa vaka sara ga na tu mai vale.
Au sa tekivu lako sara tikoga ki lotu ena vei Sigatabu yadua kei na vei itaviqaravi ena loma ni macawa. Au taleitaka na tiko ena soqoni ni itabagone. Era sa vakamarautaki au sara ga. Era nanuma ka vakabauta me vakataki au ga. Ni sa oti e tolu na vula sa mai cava noqu gade ni vakacagicagi ka meu sa lesu tale ki Albania.
Niu sa lesu ki vale, au a tukuna vei tamaqu na veika au a vakila kei na noqu sa rui yalovinaka sara ga ena gauna taucoko au tiko kina mai kea. O koya e qai sega ni taleitaka. Tukuna o koya vei au ni na sega ni vakadonuya meu lako tikoga ki lotu se vulica e so tale na ka me baleta. Meu sa na vosota mada ga ena tolu na yabaki mai oqo me yacova niu sa yabaki 18. Au sa na qai rawa ni vakatulewa vakataki au ka papitaiso sara.
Ena gauna kece oqo au a kalougata ni levu na tamata era raici au ka ra dau wasea vei au na ka era sa vulica mai valenilotu. E dua vei ira oqori o Stephanie O koya e a tu mai Itali ena gauna e a curu kina o noqu momo me lewena na Lotu ia o koya e qai lesu tale ki nona vanua mai Amerika. Tukuna o noqu momo ni na vinaka kevaka me keirau veitaratara tiko mada ga ena ivola, kau sa mani biuti koya ena noqu Mataivola.
Dina ga ni keirau a se bera mada ga ni veisotari, au sa vakavinavinaka vakalevu vua ena nona vukei au meu tara cake noqu vakabauta ka vulica e levu na ka baleta na kosipeli i Jisu Karisito. Dau volavola mai vei au o koya ena vei Sigatabu ka tukuna mai na veika kece e vulica mai valenilotu ka qai dau sauma mai na noqu vakatataro. O koya sa mai noqu itokani vinaka sara.
Ni sa mai cava e vica na yabaki ni vosota vakadede au sa qai mai papitaiso ni vo toka e rua na siga meu yabaki 18. Vakalailai ga oqo, au sa na rawa ni wasea vata kei tinaqu na marau au vakila ena siga o ya baleta niu sa na laki papitaiso ena vukuna. Au kila ni na marautaka na veika au sa digitaka.
Au vakila na veivakalougatataki ni Tamada Vakalomalagi, baleta ni a tiko vata voli ga kei au ena noqu ilakolako ena veigauna kece. Meu sa na wawa toka mada ga ka vosota baleta ni tiko e dua na nona ituvatuva me baleti au. O Koya sara ga e vakaukauwataki au meu lako curuma kina na dredre au sotava. O Koya ena dau tu ga me vukei au meu bulamarau.