Dina ni Kosipeli
Na Matabete: Dua na IYAQA TUDEI
Mai vei Elder L. Tom Perry (1922–2015)
Ena Kuoramu ni iApositolo Le Tinikarua
Na itukutuku oqo a vakarautaka o Elder L. Tom Perry ena ika 28 ni Me, 2015, rua na siga ni bera na nona leqa, me wasei vei ira na lewe ni matabete itabagone.
Na kaukauwa levu duadua ena noqu bula sa ikoya na matabete ni Kalou. Au vakabauta ni na dua talega okoya na kaukauwa dei kivei kemuni na cauravou. Ia me rawa ni vakavure kaukauwa okoya ki na nomu bula, sa gadrevi mo kila vakamatata ka vakayagataka.
Veika Sotavi Taumada ena Matabete
Au a tubucake ena dua na yasana vinaka e Logan, Utah. Au a sega ni leqataka na kakana se vale se vuli vakagone lailai. Ia dina ga ni sa rawarawa tu na bula, au a gadreva e dua na ka meu tautauri kina me na rawa ni vakadeitaki au.
Vei au na veivakadeitaki oya na matabete ni Kalou. Au a tu ena dua na ituvaki tawamacala ena noqu tubu cake voli. A kacivi o noqu ta me bisopi niu se qai yabaki dua, ka sa noqu bisopi o koya me 19 na yabaki. Na nona veituberi vakatama ka vakayalo e sa dua na veivuke cecere kivei au.
Au vakila oya sa vuna levu duadua na noqu namaka voli meu ciqoma na Matabete i Eroni ena ika tinikarua ni noqu siganisucu. Au nanuma na siga vakasakiti au a vakila kina na ligai tamaqu ena uluqu ena nona vakatikori au. Ni oti oya, au a tosocake ena veilesilesi ni Matabete i Eroni ka ciqoma na veikacivi e so au a taleitaka saraga.
Na votayaki ni sakaramede a vakasakiti saraga vei au. O rawa ni raica ni ra veidinadinati na tamata mera talairawarawa kivua na Turaga ka maroroya na Nona ivunau ni ra taura na ivakatakilakila ni Yagona kei na dra.
Tubucake Voli ena Kilai Vakamatata ni Matabete
Ni toso tiko na gauna, au a tauritutu ena koronivuli levu, ka qai oti e dua na yabaki ena koronivuli torocake, au a kacivi ki na kaulotu. Au a rekitaka na veigauna kece ka taleitaki ira na noqu itokani. E dua vakatabakidua a vakaukauwataki au. Au a vulica e levu sara na ka mai vei koya ni keirau vakataucokotaka voli na neirau itavi.
Baleta ni a veivaluvaluti voli na vanua, niu lesu mai na noqu kaulotu au a lewena na Mataivalu ni Amerika. Ni sa oti na ivalu, au a lesu tale ki na koronivuli torocake, vakawati, ka tauyavutaka e dua na matavuvale. Na veitubuyaki ni rawaka vakacakacaka a vakauti au ki na vuqa na vanua e Amerika, kau a vulica mai kina e levu na ka niu veiqaravi tu ena veikacivi ni matabete e so. Au a qai mai cegu vakaoti e Boston, Massachusetts, kau veiqaravi kina vaka peresitedi ni iteki. Mai kea au a kacivi kina meu dua na ivukevuke ki na Tinikarua ka qai, oti e 17 na vula, ki na Kuoramu ni iApositolo Le Tinikarua.
Lesoni Vulici vaka-iApositolo
Na cava au sa vulica vaka e dua na lewe ni Kuoramu ni Le Tinikarua?
Au sa vulica ni sa tiko e dua na veituberi, dua na veivakadeitaki, kei na dua na veitaqomaki ena matabete.
E sa dau bula tu ga na matabete. Ni bera na lako mai ki vuravura o Atama, a tiko vua na matabete. Ni ra sa veiseyaki na kawa nei Atama vata na matabete, e sa mai veiganiti me tauyavutaki na iwalewale ni kena liutaki na matabete. E cakava oya na Turaga ena kacivi nei Eparama me vakatulewataka na nona matavuvale tauri matabete voli. Na isoqosoqo oqo a tomani mai vei Aisake kei Jekope, ka a veisautaki na yacana emuri me o Isireli.
Ena veisenituri emuri, era a tauri tu vakavesu na kawa i Isireli. A talai Mosese na Turaga me sereki ira, ia ni sa cakava, era a vakadinadinataki ira ni ra se bera ni vakarau tu vaka-kawatamata me baleta na Matabete i Melikiseteki. Ka ra sa biu tu vata kei na Matabete i Eroni me yacova na gauna ni iVakabula.
Au kauwai sara vakalevu ena ka a cakava taumada na iVakabula ena Nona tekivutaka na Nona ilesilesi. A tauyavutaka o Koya na Matabete i Melikiseteki. A kaciva o Koya e tinikarua na iApositolo ka vakatavulica vei ira na lawa kei na ituvatuva ni matabete. A kacivi Pita o Koya me iliuliu ni iApositolo, ka tauyavutaki e dua na ituvatuva dodonu ni lewa ena Nona Lotu. Ena gauna oya kei na gauna oqo, e sa i Jisu Karisito ka digitaka na Nona iliuliu ni iApositolo me vakatulewa ena Lotu, ka sa ikoya na iVakabula ka muataki koya ena nona itavi vakamatabete.
Ka sa tiko e dua na ituvatuva dodonu ni matabete mai vua na noda Turaga ka iVakabula curuma na iliuliu ni iApositolo kivei ira na iApositolo tale e so ka dewa yani kivei ira tale na tauri matabete ena Lotu. Era sa soli na idola ni dodonu ni lewa kivei ira na iApositolo, ka vakacava ga na dede ni nodra tiko na idola oya e vuravura, eda na tuberi voli mai Vua na Turaga. Na mua vakalou oqo e taqomaki keda ka vakadeitaka vei keda ni na sega ni veisau mai na dina na Lotu. Ena tudei voli baleta ni sa sega ni muataki mai na dua na ka sa vakavuravura. E sa muataki mai vua na Turaga.
Vulica na iVunau ni Matabete
Na ivakasala levu duadua e tiko vei au me baleti kemuni na cauravou oya mo ni vulica na ivunau ni matabete, kila vakamatata na kaukauwa e tiko vei kemuni ena cakacakataki ni nomuni matabete, ka vulica na iwalewale e rawa ni vakalougatataka kina na nomuni bula kei na nodra bula tale e so.
Au yalataka kevaka o na vulica na ivunau ni matabete ka vakataucokotaka na nomu itavi vakamatabete, na matabete ena dua na veivakadeitaki dina ka na taqomaki iko voli vakayalo ka vakavu reki vakalevu sara. Mo dua na kuoramu dina ni matabete. Dodoliga yani kivei ira na nomu itokani ka kauti ira mai ki na nomu kuoramu. Vakavurea e dua na mataveitacini ena nomu kuoramu ka na yaco me dua na yavu tudei ki na nomuni bula.