Cauravou kei na Goneyalewa iTabaqase iTuvaki
iRairai ni Veivakalougatataki mai Madaqasika
Dina ga ni dredre na bula vakapolitiki kei na bula vakailavo mai nona vanua, ia o Solofo e vakararavi ga kina veivakalougatataki e kauta mai na bulataki ni kosipeli.
iTaba e vakarautaki mai vei Solofo Ravelojaona; e ra © iStock/Thinkstock
Ni oti na rarawa ni yalo ena vakalutu nei watina ena imatai ni nona bukete, e vakila o Solofo Ravelojaona ni nodrau masu sa qai saumi mai ni oti e dua na yabaki ena nona sa bukete tale o watina. O koya kei watina, o Hary Martine, e rau vakasamataka ni sucu mai ni luvedrau goneyalewa me dua na veivakalougatataki levu vei rau. Vakamacalataka o Solofo ka kaya, “Baleta ni keirau kerea vua na Kalou ka solia mai o Koya vei keirau ka keirau solia vua e dua na yaca ka kena ibalebale ena vosa vaka Malaqasi, ‘isaunitaro mai vua na Kalou.’”
O Solofo, e dua na itabagone qasecake mai Madaqasika e taura matua tu na kila ni Kalou ena sauma na masu ka na vakalougatataki ira na vakabauta. “Dredre na bula,” e kaya o Solofo, “ka ni gauna era sega ni rawata kina na tamata na ka era vinakata; e so era na taroga, ‘na cava e yaco kina vei au na ka oqo?’ Era na rairai biuta beka na Lotu se vakataroga na nodra vakabauta na Kalou. Ia ni da bulataka tiko na kosipeli ka wilika na ivolanikalou ena rawarawa sara. Na gauna ko na bulataka dina kina na kosipeli, ko na qai raica dina kina na veivakalougatataki.
Na bula ena dua na vanua e levu na kena bolebole me vaka na dravudravua ca sara, sega ni tudei na veiliutaki ni matanitu, na ituvaki ca ni yaya ni veiliutaki, kei na vakacaca ni duidui ni draki, sa rauta me dredre na bula vei Solofo. Ia, vei koya na veivakalougatataki ni bulataki na kosipeli e ulabaleta na veidredre kecega. “Au sega mada ga ni wilika rawa na veivakalougatataki au ciqoma tiko, ena noqu bulataka na kosipeli,” e a kaya.
Me vaka ni vou sara na Lotu mai Madaqasika, na imatai ni tabana e a tauyavu ena 1990, e a kaya o Solofo, ni ka e dredre duadua baleta na lewena na lotu, sai koya na itukutuku lasutaki kei na veicalati ni veika baleta na Lotu. Tukuna o Solofo, ni nanuma na Tadra nei Liai baleta na vunikau ni bula, era na sega beka ni ciqoma vakavinaka na tamata na kosipeli baleta nodra maduataki ira nodra itokani ka lomaleqataka de ra na sega ni ciqomi mai vei ira nodra matavuvale. Na cava e dutani kina o Solofo, e a kaya o koya, “Au na sega vakadua ni maduataka. Au bulataka na kosipeli, kau dau vinakata tu ga meu wasea vei ira na noqu itokani dina ga no so vei ira era sega ni via rogoca.” Levu ga na nona wasea nona ivakadinadina, ka ra sa vakatokai koya tu nona ilawalawa me “talatala.”
Ena loma ni dredre ni bula vakailavo kei na bula vakapolitiki o Solofo kei Hary Maritine erau sa vakararavi ga kina nodrau veivakalougatataki ni veiyalayalati ni valetabu (rau a vakamau ena valetabu mai Johannesburg e Sauca Aferika ni oti e dua na yabaki ni nodrau kaulotu—o koya mai Uganda kei watina mai Madaqasika) kei na nodrau vakararavi vua na Turaga. “Tiko vei au na kosipeli, kau sa laiva sara ga na noqu bula ena liga ni Kalou,” kaya o Solofo Ena rawa ni vakararavi kina nona ivakadinadina baleta ni sa tiko rawa vua na vakabauta ni na “sauma na taro na Kalou”