Vakasama vakatitobu
E Vakaibalebale Li na iDusidusi?
Na dauvolaivola ka a vakaitikotiko e Colorado, Amerika, sa leqa ena yabaki sa oti.
E vakadeitaka vei au e dua na ilakolako ni vodo basikeli ni dodonu me dau talevi wasoma na mape ni noda ilakolako ena bula oqo.
Ena vica na yabaki sa oti au a lako kina ena dua na ilakolako ni vodo basikeli mai Varanise vata kei taciqu yalewa, na wati ganequ kei luvena yalewa. Ena veimataka dau soli vei keimami e dua na idusidusi matailalai, ni kevaka me vakamuri vakavinaka sara ena rawa ni kauti keimami yani ki na vanua me keimami yaco kina ena dua na siga. Keimami vodo tu yani ena loga ni veivaini, ka na tukuna na idusidusi me keimami gole kina “vualiku me 165 na fiti (50m) ka gole ki na imawi me 330 na fiti (100m).” Levu na gauna na idusidusi ena tukuna ga na ivakatakilakila kei na yaca ni gaunisala.
Dua na mataka keitou muria yani e dua na gaunisala rairai vinaka sara ka keitou qai raica ni sa sega ni veisotari tiko na ivakamacala ena idusidusi Ni sa kilai ga ni keitou sa vakacalai tiko keitou sasaga sara vakatotolo me keitou lesuva tale na vanua dodonu keitou a tiko taumada kina.
Sa dina sara, ni gauna ga keitou yaco yani kina keitou qai raica e dua na ivakatakilakila lailai ni gaunisala ka tiko ena neitou idusidusi, ka keitou a sega ni raica taumada. Vakalailai ga keitou sa baci toso tale yani ena neitou sasaga ena vakasotari vata ni idusidusi ka sa vakaibalebale sara ga na veika e tukuni tiko kina.
Na veika e sotavi o ya sa dusia sara ga e dua na isaunitaro au a dau vakataroga voli: Cava na vuna, e lutu tani mai kina e dua ni sa mai rawata e dua na nona ivakadinadina ni kosipeli? Sa matata sara ga mai vei au ni da sa vuki cala ga ena dua na gauna (ivalavala ca) se talaidredre ena dua na ivunau ni Kalou, na idusidusi (na vosa ni Kalou) sa na sega tale ni vakaibalebale. Na mape ka tiko oya sa sega tale ni qai sotava na vanua keitou sa tiko kina ena gauna o ya. Kevaka me keitou sega ni se yali sara vakadede ena rawa beka me keitou na kila ni o ya e neitou cala, ka dodonu me keitou lesu tale (veivutuni) se talairawarawa tale ki na ivakaro ni Kalou ki na vanua keitou na kila kina ni sa vakamuri vinaka tiko na idusidusi ni ilakolako.
Levu na gauna ni sa sega ni veiraurau na idusidusi ena vanua eda tiko kina, eda vakataroga na idusidusi. Ni sega mada na vuki lesu, eda sa bilitaka na idusidusi ka qai guilecava ira vakadua sara. Eda sa qai viiritaka laivi sara ga na rai baleta na noda icavacava, eda sa qai mai yali tu yani, ka vakamuria na sala e sega tu na inaki ni kena vakamuri, ka na sega ni kauti keda ki na vanua eda mua tiko kina.
Eda dau sotava na madigi ni kena wiliki na ivolanikalou ena veisiga. Ena vei ya ono na vula eda dau lakova kina na koniferedi raraba ni Lotu. E sega li ni o koya na gauna oqo meda dau raica lesu kina na noda mape meda vakadeitaka na noda icavacava?. Dua na gauna niu a vakarorogo tiko ki na koniferedi, au qai vakila, ena keda ituvaki sega ni taucoko, ni da rawa ni kila se da sa muri donu tiko se sa vakaibalebale tiko li vei keda na idusidusi.
Dina ga ni na kauti keda ki na noda icavacava na vakamuri ni idusidusi ena bula oqo, na vulici ni ivolanikalou kei na talairawarawa vei ira na parofita ena vakadeitaki keda meda railesuva ka veimuayakitaka na noda ilakolako me rawa ni da na yaco ki na noda itikotiko vakasilesitieli.