Vinaka Vakalevu na Nomu Veiqaravi

Tarovi na vakaraitaki ni yaca

Ko sa nodra ivakaraitaki na marama me vaka mai na gauna e Nauvoo, era sa veiqaravi vakataki ira ena veisiko lomani ka veivakauqeti.

Au sega ni kila na yacamu, na nomu yabaki ni bula, se dua tale na ka me baleti iko, Na ka ga au kila rawa ni o kemuni na dauveisiko nei Jowana, kau sa vakavinavinakataka na nomu veiqaravi gugumatua mai na vuniyaloqu taucoko.

Au kila na sikovi ni dua na sisita luluqa tu me vakataki Jowana (sa veisautaki na yaca), na vugoqu, e sega ni ka rawarawa, ni sega ni dau veikauwaitaki soti o koya. Au vakabekataka ni a vinakata o koya mo lako taumada mai. Ia e tukuna vei au o Jowana ni ko sa dua dina na itokani kivua, ena nomu veikauwaitaki kei na veiciqomi ki na ituvaki ni nona bula.

Ena 19 na yabaki ni nona vakawatitaki luvequ tagane tu kina o Jowana, oqo na matai ni gauna me tukuna kina o koya ni sa dua tiko na nona dauveisiko. A se qai tukuna wale toka ga vei au o koya na wasoma ni nomu veisiko kei na nomu dau veinanumi ka yalovinaka tu ga. E kaya o koya ni o sa vukei koya ena vica na gauna a tauvimate kina ka kerea talega mo kauta na makubuqu yalewa ki na soqoni ni Goneyalewa.

Ena 10 na yabaki sa oti, o koya, o luvequ tagane, kei na nodrau matavuvale sa vakaitikotiko voli me drau vakacaca na maile mai vei keitou. Au sa masulaka mera na lomani iratou ka vukei iratou na tani me vakai au, kau sa tagicaka kivua na Tamada Vakalomalagi mera na tosovi iratou yani na tani me vaka au na cakava kevaka eratou a tiko voleka. Mai na ka e tukuna o Jowana, sai iko saraga na isau ni noqu masu.

Kevaka mada ga e sega ni maroroya na Vosa ni Vuku o Jowana kei na luvequ tagane ka sega ni dau laki lotu, erau se tamata vinaka tikoga ka rau lomani ira na luvedrau. Ia a sega mada ni vakabuwawataka na matamu na kubou ni tavako nei Joana. Ko sega ni raici koya me vaka e dua e sega ni dau lako yani ki Lotu. Mo na kilai koya ka vulica ni o koya e tina dauloloma ka vinakati luvena yalewa me dau lako wasoma ki lotu ka laki rawata mai e dua na nona ivakadinadina. Na gauna a sele kina o Joana, ko a kauta mai na ivakayakavi ka sega ni via kila se kauta mai o koya e so tale na leqa me mai vakaleqai kina.

Au sa vakavinavinaka dina ni ko sa mai ivakaraitaki vinaka sara ga vua na makubuqu yalewa. O koya sa na rawa ni raici kemuni cake me vaka e dua e sa rui veikauwaitaki vei ira na tani ka sa dau sasagataka sara ga me ivakaraitaki ni yalololoma. O koya e kaya vei au ni dua na siga e a sega tu kina nomu motoka ko qai taubale mai rauta ni dua na maile mo yaco ki nodratou vale vata kei iratou na luvemu lalai ka kau kuki mai vei iratou.

“Au sa dau vakasamataki iko tiko vata kei tinamu ka vinakata meu cakava e dua na ka vinaka baleti kemudrau—baleta walega,” o a kaya vua.

Au gadreva meu vakavinavinakataka na nomu yalodina ki na nomu itavi vaka dauveisiko Ko sa ivakaraitaki sara ga ni marama mai na gauna kei Nauvoo era a dau veiqaravi vakaiira ena veisiko yalololoma ka veivakauqeti. Ko sa ivakaraitaki dina ni veiqaravi ena yalololoma ena nomu sa dau mai sikova tiko na vugoqu yalewa ka sa sega tu ni dau laki lotu.

Vinaka.