Kevaka Madaga MO DAU MAMADUA

Mai vei Elder José A. Teixeira

Ena Vitusagavulu

Elder Jose A. Teixeira

Vakararavi vua na Turaga, ena qai vakalougatataki iko o Koya ena nomu sasaga mo wasea na kosipeli.

shy missionary

Niu a se peresitedi vou ni kaulotu e Brazil, au a vakatarogi ira voli e vica na italatala qase. Au a taroga e dua me tukuna vei au na veika e baleti koya.

“Au sa madua saraga,” a kaya o koya. A lomaleqataka o koya ni sa vakaseva voli na nona rawa ni veiqaravi na nona madua.

Au taroga, “O kila li ni na rawa ni vukei iko na Turaga mo dua na daukaulotu vinaka?”

“Au vakabauta na Turaga sa rawa ni cakava e dua ga na ka.”

“Ia laiva me vukei iko o Koya. O kila li ni o rawa ni cakava oya?”

“Au rawa,” a kaya o koya.

Sa dodonu meu vakatusa ni gauna a lako tani kina, au a vakasama no, “Ia, au vakanuinui ni na cakacaka.”

Era tasiri na macawa ka vakalailai sa ra gole tale mai na daukaulotu vataga me baleta na veivakatarogi. Ena gauna oqo a kaya na itokani ni italatala qase madua, “Peresitedi, au sega ni kila na ka o a tukuna vua, ia e vakayacora saraga e dua na duidui. Sa mai vinaka sara o koya ni veivosaki kei ira na tamata.” Kau sa vakanamata voli ni veisotari vata tale kei koya.

Ni sa lako mai ki na noqu valenivolavola o koya, e a raica sobu na yavana.

“E tiko vei au e so na itukutuku vinaka,” a kaya o koya. “Au se madua tikoga, ia au a kerea na Turaga me vukei au. Au sa qai tadolava na gusuqu ka tekivu vosa. Ia kila na cava? Au sa cakava tu ga oqo ena veigauna. Au sega madaga ni nanuma na ka au tukuna. Na ka veivakurabuitaki oya ni ra taleitaka na tamata. Era sa vakila na Yalotabu. Era veitaratara vata kei au kei na veika e tu meu talaucaka kivei ira.”

Au sa kurabui ni raica na iwalewale a veisau kina na daukaulotu oqo ena nona nuitaka saraga na Turaga. A yaco o koya me dua na iyaya ni cakacaka levu ena nodra vakamarautaki e vuqa na tamata.

Na Vorati ni Rere

Ni da wasea na kosipeli, eda lomataqaya ena so na gauna. Ia me vaka sa vakaraitaka na daukaulotu madua oqo, ena tuberi keda na Turaga kevaka eda nuitaki Koya. Na Yalo Tabu ena vukei keda ni kila na ka me tukuni (raica na 2 Nifai 32:2–3), kei na gauna era vakila kina na tamata na Yalo Tabu, era dau sauma lesu ena sala dodonu. Vuqa era lomatarotarotaka na ka eda vakabauta ka via kila e levu cake.

Na Reki Levu

E tiko vei au na ivakadinadina ni na tuberi keda na Tamada Vakalomalagi ena noda sasaga ni wasea na kosipeli, ka da na vakila na reki levu ena ivakarau oya. Vakaidina, na reki oya ena tiko vata kei keda sega walega oqo ia ena vuravura talega ka lako mai. (Raica na V&V 18:16.) Oya sa dua na vuna vinaka mo lako tani mai na nomu itutu dinamati ka cakava e dua na ka, veitalia kevaka o madua.

Tolu na Rere O Rawa ni Valuta

Tikiva na madua, au kila e tolu na ikuri ni rere ka vakavuna e so vei keda me kaya, “Au rere ni kevaka au tukuna na veika me baleta na kosipeli, au na vakayali ira na noqu itokani.” Yalo vakacegu ni, vata na vakabauta, na rere oqori sa rawa ni vorati.

1. Au sega ni kila vakarauta.

   Kevaka e lailai na nomu kilaka me baleta na kosipeli, sa rawa ni veivuke o ira na daukaulotu tudei. Sa rawa ni ra vakatavulici keda ena itukutuku ni Veivakalesuimai, vukea na kena vaqaqacotaki na noda vakabauta na Turaga o Jisu Karisito, ka vukei keda ni kila vakamatata na veivutuni kei na iwalewale eda rawa ni tutaka kina ena noda bula kei na vuna e bibi kina na papitaiso kei na isolisoli ni Yalo Tabu. Dua tale na ivurevure levu ni kilaka oya na Vunautaka na Noqu Kosipeli. Au na vakayaloqaqataka na cauravou kei na goneyalewa kecega mera taukena e dua na ilavelave ka cakava me tiki ni nomuni vuli ivolanikalou e veisiga.

2. Au sega mada ni se cakava oqo eliu.

   Kevaka e lailai na veika o sotakaya taumada, vakatovotovo vata kei ira na daukaulotu! Sa rawa ni ra vukei iko mo kila na ka mo kaya se kakua ni kaya ena dua na mataqali tuvaki. Ni ko tiko voli vata kei ira na daukaulotu, o na vakila na loloma e tiko vei ira me baleta na kosipeli kei ira na wekadra. Era sa kunea na yalodoudou mera wasea na kosipeli; sa rawa ni ra vukei iko ni cakava vakakina.

3. Au sa rere ni wasea.

   Ni da wasea na noda ivakadinadina, eda sa vukei ira na noda itokani mera raica na veika cecere, ka ra sa tekivu dokai keda ka taleitaki keda ena dua na rarama duatani. Oqo e yaco voleka ni veigauna kecega. E levu na itabagone era kaya, “Au a rere, ia na gauna au vosa kina vakadodonu, sa tekivu vakadinati au na noqu itokani ka vakataroga e levu cake na taro.” E sega ni dodonu meda rere ni wasea voli na ka e tu vei keda. E sa ka vakasakiti baleta ni sa lako mai vua na Kalou. Ka sala vinaka cava tale meda vakaraitaki loloma kina vei ira na noda itokani mai na kena wasei vei ira na ka eda kila e sa dina.