Kakua ni Vana!

Tarovi na vakaraitaki ni yaca

Au a dabe vata toka kei Bob ena neirau motoka ni ovisa, ka waraki voli e dua na ivakaraitaki ni veitosoyaki ena gaunisala e ra. Keirau a tekivutaka na neirau vakasasa ena rua na aua eliu ni oti na kena raici na motoka a tukuni ena dua na retio veivakasalataki ni ovisa.

“Na butako ena ivalavala kaukauwa sa yaco,” a kaya na veivakasalataki. “Rua na tagane, vakayaragi ruarua. Rau a se qai laurai ga ena dua na motoka roka moli bota. Era kaya na vakadinadina ni rau tamata voravora ka rawa ni veivana.”

Na butako tawanamaki e so ena vakayagataki ni yaragi a yaco wale tikoga oqo ena yasayasa, ia mai na neimami sasaga vinaka taucoko, era a dro veitaravi ga na daubutako. Na veivakanananu oqo a yali mai na noqu vakasama ena gauna ga au a raica kina e rua na ituvaki ni lako tani mai ena dua na itikotiko ena gaunisala butobuto ka lade ki na motoka roka moli bota. Oqo rau sa gole tiko mai kivei keirau.

“Kerei tiko e dua na iwase ni veitokoni,” au a kaya. “O rau na beitaki sa gole vaka ki na vualiku mai na vanua keirau tiko kina.”

Na neirau veitokoni, e rua na ovisa vakalecaleca vakaisulu taukei ena dua na motoka tawamakataki, a gutuwa sara ka laki toka ena iliu ni motoka (roka moli bota) niu vakamumuri voli yani kei Bob. Ni oti na kena curuma yani e dua na wavu na neitou motoka e tolu, a kele vakasauri vakababa ena wavu na neirau veitokoni ena muailiu ni motoka roka moli bota ka keirau kele e dakuna, sogoti rau voli na beitaki. Voleka ni gauna vataga, a kele na motoka ka rau veicuvari tani yani na ituvaki e rua.

“Butu tani mai na motoka vata kei na ligamu ruarua ena ulumu!” Au a vakarota ni oti noqu lako tani mai na neirau motoka. Sega ni dua e yavala.

Niu duri vinaka ka vakarau tu ni vana, au a vakarota tale, “Butu tani mai na motoka vata kei na ligamu ruarua ena ulumu. Cakava saraga oqo!”

Vakasauri na duri cake nei draiva ka vuki donui au. Au sa rawa ni raica e dua na iyaya roka siliva ni caudre e ligana.

Na veituberi au a lako curuma ena ovisa kei na yalomatua a vakatulewa meu tabaka na ivakasaribariba ka vakabulai au. Ia ena dela ni veika e sotavi voli oqo, au a rogoca e dua na domo. E a malumu ia e doudou ka kaukauwa: “Kakua ni vana!”

Au sa namaka meu na lauvana ena dua ga na gauna, ia au a waraka me vana vakailiu e dua ena motoka. Ia mani, laveta cake ruarua na ligana o draiva, a laveta cake ki uluna na ka e rairai vaka na dakai, ka vakalutuma na ligana ruarua ki na sagana.

“Tu vakadua!” Au a kaya niu cici yani ki na motoka. “Kakua ni yavala!”

Sa vaka na vakaraitaki ena RY (Retio Yaloyalo) na ka e yaco oqo—me yacova niu sa kila rawa ni o rau na dauvakacaca voravora oqo e sa rua vakaidina na yalewa gone rere vakalevu. Na ka au a nanuma me dakai e sa dua walega na icobacoba ni beleti ni motoka.

O rau na yalewa, keitou mani siqema rawa, a solia na motoka ki na nodrau itokani tagane. Rau a sega ni kila na mataqali tagane vakacava rau a vakataka tu.

“Au nanuma ga o sa mate, Cal!” A tukuna malua vei au o Bob. “Sa voleka sara meu vanavana. Au sega ni kila na vuna au sega kina.

E rau tukuna na ka vataga na ovisa vakalecaleca ena motoka tawamakataki, dina ga ni sega ni dua ia koi au ga a rogoca na domo. Au kila ni kaukauwa duadua ga ni lomalagi sa rawa ni vakabulai rau na yalewa oya mai na mate kei na va na vakailesilesi ni ovisa mai na vakayacori ni dua na cala bibi sara. Na ka e sotavi oqo a vakavurea vei au e dua na kilaka matata ni Tamada Vakalomalagi e rawa ka na veivakameautaki ena veika e yaga vei keda.