O Koya na Bisopi?
Na dauvolaivola e vakaitikotiko mai Illinois, Amerika.
Baleta ga niu a luluqa tu ena vica na yabaki sa oti, a sega ni vakabauta e dua na lewenilotu ka kilai au ena gauna oya niu sa kacivi meu dua na bisopi.
Droini mai vei Mark Smith © 2016
Donuya e dua na soqoni ni komiti ecake ni matabete, a ripotetaka na neitou daukaulotu tudei ni rau sotava e dua na lewenilotu ka a sega ni tiko ena tabanalevu na nona ivolatukutuku e so. Au a kila rawa sara na yaca ka vakaraitaka ni keirau a lewena vata e dua na tabanalevu ena vuqa na yabaki sa oti.
A kaya e dua vei rau na daukaulotu, “Io, bisopi, a vakaraitaka qori o koya ka vaka me kidroa ni ko sa bisopi.”
Au tarogi rau, “Na cava e kaya o koya?”
Rau tukuna ni kurabui saraga o koya ka kaya, “O Koya na bisopi?”
Au a dredre ka vakamacalataka ni a kilai au tu na sisita oqo me vaka e dua na tamata duatani sara ena 30 na yabaki sa oti.
Niu raitayaloyalotaka na ka oqo emuri, au vakasamataka na balavu ni gauna e sa veisau kina na noqu bula donuya na yabaki 30 vakacaca oya keitou sa lewenilotu tu kina vakamatavuvale. Au sa kila tu e vuqa na lewenilotu ena neitou tabanalevu me 20 na yabaki ka sa veiqaravi vakaperesitedi ni tabana ka bisopi talega, ia e sega ni dua vei ira na lewenilotu oqo a kilai au ena 30 na yabaki sa oti. Dina ga niu dau wasea vakavudua e so na ka mai na noqu gauna eliu meu vakatavulica kina na veivutuni kei na Veisorovaki i Jisu Karisito, e levu sara ena tabanalevu e sega tu ni kila na ilakolako veivakurabuitaki e sa mai vaka tu kina na noqu bula ena Lotu.
Keitou a vakatakilai vakamatavuvale ki na Lotu ena Me ni 1979, kau sa kila kusarawa ni sa ikoya oqo na vanua keitou sa vakadeitaki kina. Keitou a papitaisotaki ena June, ka vakatekivu keitou a bulabula taucoko, ia a sega ni dede na noqu sa vakalutu mai ka lesuva tale na ivakarau makawa e so. A sega ni tiko vei au vakaidina e dua na vakatitiqa me baleta na dina taucoko ni kosipeli kei na Veivakalesuimai, ia au sega ni nanuma ni tiko vei au na ka e gadrevi meu dua kina na lewe ni Lotu vinaka.
Ena 1982, me baleta na tomani ni noqu vakasausataka na alakaolo, a saga na veisere na watiqu, e dua ka sega ni luluqa na nona vakabauta. Ena gauna oya a tiko voli na noqu matavuvale e Oklahoma, Amerika, ia au a lesu ki Illinois, Amerika, na vanua kau a susu kina. Au sa mai yacova tu na idusi meu sa na vakarau vakayalia kina na ka duadua ga e vakabetena vakaidina vei au: na noqu matavuvale.
Au sa tekivu tekiduru ka masumasu voli ena mataka kei na bogi ki na dua na Kalou au a sega ni vakadeitaka ni bula tiko se, kevaka e bula o Koya, au kila ni sa na rairai guilecavi au makawa o Koya. Ia au a masumasu voli ena yalodina me tolu na vula. Ena dua na mataka lailai, niu a masumasu voli vakabibi, a tuburi au e dua na vakacegu levu kau kila ni sa bula na Kalou, ni sa kilai au o Koya, ka sa lomani au o Koya. Au sa kila talega niu na sega ni tara tale e dua na turu ni alakaolo.
Ena bogi vataga oya au a ciqoma kina e dua na qiri mai vua na watiqu me vakatakila vei au ni sa na vakauta tiko mai ena meli na pepa e so ni veisere meu sainitaka. Donuya na veivosaki oya a kaya vakasauri o koya, “E tiko e dua na ka duatani sara me baleti iko. Au sega ni vakabauta ni ko na rawa ni gunu tale, kau sa na mai dresulaka kece na pepa oqo.” Keirau a vakaduavatataki, ka rua na yabaki e muri a vakasucuma o koya na ikatolu ni luvei keirau tagane.
Sa rawa ni navuca e dua niu sa na rawa ni lesu vakataucoko ki na itaviqaravi ena Lotu, ia o au e dua na tamata drava. Au a lesu vagauna ka mani ciqoma e dua na veikacivi meu dauniveituberi ena kuoramu ni italatala qase. Ia au a mani tekivu yalolailai ena veivakatavulici ka yaco tale me luluqa.
Ena 1991 keitou a toki ki na dua na tabana lailai. Vica na vula ni bera na ikawalu ni siganisucu ni luvei keirau tagane gone duadua, a tarogi koya na watiqu, na peresitedi ni Lalai, se o cei e vinakata me na papitaisotaki koya. Sa vakaidina ni vinakati tamana o koya me qarava na cakacaka tabu vakalotu. A tukuna vua na watiqu ni na rairai sega toka ni yaco oya. A sega ni vakadonuya o koya na isaunitaro oya ka tutaka na itavi ena nona vakabulabulataki o tamana. A sega ni vakacauoca o koya, ka ni dua na gauna lekaleka au a kacivi meu veiqaravi vaka-iliuliu ni Sikauti, kau a papitaisotaka ka vakadeitaka malua na luvequ tagane.
A veivakalasai na walu na vula ka salamuria na noqu vakabulabulataki. Keitou a vauci vakamatavuvale ena Valetabu e Chicago Illinois, kau a kacivi tale meu dauniveituberi ena kuoramu ni italatala qase, ia na gauna oqo au a sega ni vakasuka. Au a qai kacivi me dua na daunivakasala ena mataveiliutaki ni tabana, ka oti e lima na vula au a kacivi meu veiqaravi vaka-peresitedi ni tabana. Ni oti toka e dua na vula na noqu kacivi, au nanuma ni vakasamataka voli, “O au na peresitedi ni tabana?”
Au sa tukuna ki na vuqa na Yalododonu sasaga dredre voli ena veiyabaki ni kevaka au sa rawa ni toso ki liu ena kosipeli, sa rawa vakakina kivei cei ga. E sa ka ga ni kena kilai vakamatata na kaukauwa dina ni iVakabula kei na Nona Veisorovaki ka taura voli na ikalawa e so mo lako mai ki Vua.
Au na vakavinavinakataka tu ga na watiqu kei ira na luvequ kei ira taucoko na dauveituberi vakavuvale, iliuliu ni kuoramu, bisopi kei na Yalododonu yalodina tale e so ka a tutaka na ivakaraitaki momona kivei au. E sa mai dua na madigi talei na qaravi ni Turaga kei ira na Yalododonu ena 20 na yabaki sa oti oqo. Sa mai vakalougatataki na noqu bula ena veika kece au na sega ni rawa ni kinoca rawa.