QAQACO Vakayalo Ta ni Dua na Waqa Sega ni VOCA RAWA

Mai vei Elder Dale G. Renlund

Ena Kuoramu ni iApositolo Le Tinikarua

Mai na dua na vosa ena soqoni ni lotu ena Brigham Young University ena 16 ni Sepi, 2014. Me baleta na kena vakavalagi taucoko sikova na speeches.byu.edu.

Eda gadreva na bula vakayalo qaqaco vinaka meda na lako curuma rawa kina na bula oqo ka lesu bula tale kina noda itikotiko.

Ena itekivu ni ika 17 ni senitiuri, e a tavoca kina e dua na waqanivalu na tui mai Suwiteni o Gustav II Adolf me na vakatokai na Vasa. Na waqa e matataka tiko e dua na ivurevure ni iyau, vakabibi na oki ka na ta mai kina na waqa. E a raica sara ga vakavoleka o Gustav Adolf na ta ni waqa ka sa vakadeitaka sara ga ni Vasa ni na sotava na nona nanamaki.

Ni sa tekivu na ta waqa e qai otataka o Gustav Adolf na Vasa me ta me balavu cake. Me vaka ni sa caka oti ka vakadeitaki na kena raba mai na oki vakamareqeti sa mani vakaroti ira ga na taya tiko na waqa na tui mera tosoya na kena balavu ka sa rauta tu ga na kena raba. Dina ga ni o ira na dautawaqa era kila ni kena caka oqori ena vakaleqa na ituvaki ni Vasa ni sa na soko era rerevaka na tukuna vua na tui na veika e sega ni via rogoca. Era sa mani vakamuria ga. Vakadreta o Gustav Adolf na waqa me na kakua ni dua ga na kena itabavale ni dakai ia me tolu na kena itabavale ka me na davo koto e cake sara na dakai bibi duadua. Era sa baci vakadonuya tale na dautawaqa na vakatutu oqo ena lomalomarua.

Ena ika 6 ni Okosita 1628 sa tekivuna kina na Vasa na itekivu ni nona soko. Ni sa seredali mai na toba na Vasa e a liwava mai e dua na cagi kaukauwa na kena laca ka sa tekivu sara ga me vakalakala na waqa. Sega ni dede, “sa tekivu me vakatobuicu ka sa tekivu curuma mai na wai na dakai me yacova sara ni sa lai davo koto mai boto ni sauloa vata kei na kena laca kei na kena iyaya taucoko.”¹ Na Vasa kei na nona imatai ni ilakolako sa yacova ga na 4,200 na fiti (1,280 m).

Na gagadre nei Gustav Adolf me dua na nona ivakaraitaki ni itutu sa mai suruta tu na pusi na icakacaka ni dua na waqa ka dodonu me dua na waqa totoka na waqaniivalu kaukauwa taudua. Na nodra sega ni via vosa cake na dautawaqa—na nodra rerevaka na cudru nei koya na tui—sa sega kina ni kila kina na tui na ka era kila kei na nodra rai. O ira kece era vakaitavi kina era sa mai vakuwai ena rai kei na inaki ni tawaqa; me maroroi o Suwiteni ka taqomaki na kena irogorogo kina veivanua tani. Ni dua na waqa e sega ni muria na ivakaro ni lawa ni veiqaravi e caka sa na ganita ga me na kua ni soko rawa na waqa ko ya.

Vei keda, meda na vakauta vakamatau na noda itosotoso ena bula oqo eda na gadreva na bula vakayalo e tudei me valuta na cagi vakacevaruru, kei na cagi veitemaki, veisautaka vakamatau na toso, ka lesu bula kina noda itikotiko. Era tu eso na ka eda rawa ni cakava me vakalevutaka na noda tudei vakayalo Au na tara e va.

Talairawarawa kina iVakaro ni Kalou

Na imatai na talairawarawa kina ivakaro ni Kalou. Me vaka ga ni Vasa e vesuki tu ena lawa ni tawaqa, eda sa vakatalega kina o keda ena lawa ni bula yakayalo E sega ni dua me na vakuwai mai kina. Dodonu meda talairawarawa kina lawa vakayalo ka da dau raica ni ra ivakaro ni Kalou.

Na vakamuria na lawa ni tamata ena ta ni waqa e a rairai veivakuwai vei Gustav Adolf, ia na Vasa ke a sega ni luvu ni bera ni tekivu nona qaravi itavi kevaka me a vakamuria na lawa oqori. Ke a sega ni rawa vua me galala ka lewa vakaikoya na ka ga e dodonu me cakava.

Sa vakakina na talairawarawa kina ivakaro ni Kalou e taqomaka noda galala veivagalalataki kei na igu ni rawa ka. Na ivakaro e sega ni soli me vakatabui keda. Ia na kena vakamuri ena muataki keda yani kina tosocake ni tudei ni bulavakayalo kei na marau tawayalani.

Na talairawarawa sa noda digidigi. E a kaya o Jisu, “Raica, au sa solia vei kemuni na ivunau; ia mo ni talairawarawa ki na noqu ivunau” (3 Nifai 15:10). E rawarawa sara. Raica me caka Vakatulewataka sara ga oqo mo sa talairawarawa sara ga. Ena sega ni dua na ka me na vakalevutaka vakalevu na tudei ni bula vakayalo. Ena sega ni dua na ka me na solia vei keda vakalevu na galala meda vakacavara na noda inaki ena bula oqo.

Rogoca na iVakasala Ka Raica mo Vulica Sara Mo Kila

Ai karua e dodonu meda qaqarauni ka rogoca na ivakasala mai vei ira eda vakararavi kina ka raica meda vulica sara meda kila.

Dua na coga ni rawati ni kila ka sa ikoya na vakilakila ka na yaco mai ni da nanuma eda sa kila na veika kece ka sa sega na betena meda laki vuli tale. Eda sa raica oqo vei ira na tamata yadua ka ra nanuma ni ra sa kila na veika kece e ganiti ira. Sa bau ka dredre na vakavulica e dua sa kila na veika taucoko.

Qarauna na kena oqo ka saga mo dau gumatua na vuli, e a kaya vakaoqo o Peresitedi Henry B. Eyering, iMatai ni Daunivakasala ena Mataveiliutaki Taumada, “Au e dua na gone, ka se levu na ka e dodonu meu vulica.” E lewe levu e rawa ni ra vakavulici au ena so na ka.”² Ena nona a kacivi au meu dua na Vakaitutu Raraba, e a vakavulica vei au o Peresitedi Eyering e dua na lesoni bibi. E kaya ni rogoca ni dua e talanoataka e dua na italanoa ka sa rogoca oti se vakayagataka e dua na tiki ni ivolanikalou ka sa kila vinaka tu, sa dau tarogi koya lo tu, “Na cava na vuna e lainitaka tale kina na Turaga vei au na kena oqo, kei na, “Na cava tale sa vo vei au meu vulica mai na italanoa o ya se tikini ivolanikalou oqori?” Kevaka meda vinakata meda tosoya cake noda tudei ni bula vakayalo eda na tu vakarau meda vuli, eda na yalomalua, ka ciqoma na ivakasala kece e soli mai vei keda.

Na veika oqo e noda digidigi. Eda na vakarorogo kina ka vakamuria na ivakasala ka ra na solia vei keda na iliuliu ni Lotu vakabibi o ira eda tutaka ni parofita, daurairai ka dauvakatakila mai vei ira na itubutubu kei ira eda dau vakararavi kina. Eda na rawa ni sasaga meda na dau vuli voli ga ena vo ni noda bula. E rawa me da vakarabailevutaka na noda tudei ni bula vakayalo. Kevaka meda na sega ni vakalevutaka noda tudei ni bula vakayalo eda na tautauvata kei na Vasa e dua na waqa ka na sega ni ciri rawa.

Qaravi Ira na Tani

Ai katolu ni da dusimaki mai tuba, ena nodra kauwaitaki ka vukei na tani eda sa vakalevutaka tiko na noda tudei ni bula vakayalo.

Na bula tawamudu ena matata sara mai ni da sa vakanamata vei ira na tani ena noda sasaga meda vukei ira na luvena na Tamada Vakalomalagi Au sa kunea ni sa ka rawarawa sara meda ciqoma na veivakayarayarataki niu sa masu tiko meu raica seu na vukea vakacava e dua, mai na noqu dau masulaki au tikoga vakai au.

Eda na vakabauta ni dua na gauna mai muri eda na tu ena dua na itutu e na vinaka cake meda na veivuke kina. Na kena dina ga, ni sa kena gauna sara ga oqo. Eda na vakacalai kevaka meda nanuma ni da na vinaka cake sara ni sa na levu noda gauna, levu na ilavo, ka levu na veika tale eso meda qaravi ira kina na tani. Sa toka kina vei keda e dua na digidigi. Eda na veivuke li vei ira na tani se sega? Eda na vakawaletaka na vakatovotovo ni bula oqo kevaka meda na sega ni vukei ira o ira era gadreva tu na veivukei. Ia, kevaka me da na veivuke eda sa na vakalevutaka noda tudei vakayalo.

Noda Digitaki Jisu Karisito me Noda Yavu

Ai kava, me kena iotioti ka bibi taudua na noda tudei vakayalo ena vakalevutaki vakatikina kina kena yavu ga a tauyavu kina vei Jisu Karisito me noda yavu.

Kevaka me sega o Jisu Karisito eda na vakaciriciri vaka e dua na waqa ena viritaki koya wavoki na ua ni waitui E sega veikeda na kaukauwa ni sega vei keda na laca. Ena sega vei keda na tudei ena gauna ni cava, baleta ni sega noda iyaqa. Ena sega na vanua eda mua kina se inaki baleta ni sega na iuli me uli keda yani. E dodonu meda tauri Karisito me noda yavu.

Me na rawa ni sotavi, ravuta, ka vakavakarau yani kina covulaca kei na idre ni bula sa dodonu meda na muria na ivakaro ni Kalou, meda yalomalua, tuvakarau, ka vakarau meda na vuli tikoga, qaravi ira na tani ka vakaduri Jisu Karisito me yavu ni noda bula. Ni da sa cakava tiko, eda sa na vakalevutaka na noda tudei vakayalo. Sega ni tauvata kei na Vasa, eda na rawa ni lesu bula tale kina toba ena kena sa rawati na inaki ni soko.